Florisuga

Florisuga er ei slekt i kolibrifamilien (Trochilidae) som omfattar to artar heimehøyrande i neotropane. Utbreiingsområdet strekkjer seg frå sørlege Mexico gjennom Mellom-Amerika og store delar av Sør-Amerika, til nordlege Bolivia, nordaustlege Argentina og Uruguay.

Florisuga
Svartkolibri (Florisuga fusca)
Kvitnakkekolibri (Florisuga mellivora)
Systematikk
Rike:	Dyr Animalia
Rekkje:	Ryggstrengdyr Chordata
Underrekkje:	Virveldyr Vertebrata
Klasse:	Fuglar Aves
Orden:	Seglarfuglar Apodiformes
Familie:	Kolibriar Trochilidae
Underfamilie:	Florisuginae
Slekt:	Florisuga Bonaparte, 1850

Det feminine latinske slektsnamnet Florisuga kjem frå orda floris, som tyder «blome», og sugere, som tyder «suge» eller «slurpe».^[1]

Kjenneteikn

Artane i denne slekta er mellomstore kolibriar, og måler mellom 11 og 13 cm i kroppslengd. Dei har svært ulike fjørdrakter: Kvitnakkekolibri (Florisuga mellivora) viser tydeleg kjønnsdimorfisme, hannar har ein glitrande kombinasjon av blått, grønt og kvitt, medan hoene har meir dempa fargar. Svartkolibri (Florisuga fusca) har ikkje kjønnsdimorfisme, og begge kjønn er hovudsakleg svarte og kvite. Begge artane har rette, svarte nebb.^[2][3]

Systematikk

Fleire fylogenetiske studiar har vist at slekta Florisuga, saman med Topaza, utgjer ei basal grein innan kolibrifamilien. På bakgrunn av dette plasserer somme systematikarar desse to slektene i ein eigen underfamilie Florisuginae.^[4]

Arten Florisuga fusca har tidlegare vore plassert i ei monotypisk slekt kalla Melanotrochilus, men etter at ho blei overført til slekta Florisuga, blir det gamle slektsnamnet rekna som eit synonym.

Artsoversyn

Slekt Florisuga i rekkjefølgje etter IOC World Bird List V15.1, 2025,^[5] med norske namn etter Norske navn på verdens fugler.^[6] Verdas naturvernunion, IUCN, har vurdert begge artane som livskraftige:^[7]

Bilete	Norsk namn	Vitskapleg namn	Autor	Utbreiing
	Kvitnakkekolibri	Florisuga mellivora	(Linné, 1758)
	Svartkolibri	Florisuga fusca	(Vieillot, 1817)