Fosfat

Eit fosfat er eit salt eller ein ester av fosforsyre (H₃PO₄).^[1] Fosfat er eit naudsynt plantenæringsstoff.^[2] I alt liv er fosfat naudsynt, som del av DNA og RNA og som den energiberande delen av ATP-molekyla. Meir enn fjerdedelen av beina til ryggradsdyr er fosfat.^[3]

Kjemiske eigenskapar

Grunnforma til fosfat er eit ion samansett av eit fosfor-atom og fire oksygen-atom (PO₄^3-). Vekta er 94,97 gram per mol. Fosfationet er den konjugerte basen til hydrogenfosfat (HPO₄^2-), som atter er den konjugerte basen til dihydrogenfosfat (H₂PO₄^-), atter den konjugerte basen til fosforsyre (H₃PO₄). Alle dei nemnte fosfat-formene er å finna i vatn. Kva form fosfatet ligg på kjem an på pH-en i vatnet.