Fugleslekta Grus

Grus er ei biologisk slekt av særs store og langbeinte fuglar i tranefamilien. Utbreiingsområdet er i hovudsak Eurasia, i tillegg lever to artar i Afrika og ein i Nord-Amerika. Grus-tranene er trekkfuglar, unntatt dei afrikanske.

Traneslekta
Systematikk
Rike:	Dyr Animalia
Rekkje:	Ryggstrengdyr Chordata
Underrekkje:	Virveldyr Vertebrata
Klasse:	Fuglar Aves
Overorden:	Neoaves
Orden:	Tranefuglar Gruiformes
Familie:	Tranefamilien Gruidae
Slekt:	Traneslekta Grus Brisson, 1760

Taksonomi

Slekta Grus vart først skildra av den franske zoologen Mathurin Jacques Brisson i 1760.^[1] Namnet Grus er det latinske ordet for «trane».^[2] Den tyske ornitologen Peter Simon Pallas vart nokre gonger kreditert for å ha definert slekta i 1766, men Den internasjonale kommisjonen for zoologisk nomenklatur avgjorde i 1956 at Brisson skulle ha prioritet.^[1]

Slekta inkluderte tidlegare fleire artar. Ein molekylær fylogenetisk studie publisert i 2010 fann at slekta Grus, som då definert, var polyfyletisk.^[3] I den resulterande omorganiseringa for å lage monofyletiske slekter, vart kanadatrane, kvitnakketrane, sarustrane og brolgatrane flytta til den gjenoppretta slekta Antigone, først skildra av den tyske naturforskaren Ludwig Reichenbach i 1853.^[4] Snøtrane vart flytta til den gjenoppretta monotypiske slekta Leucogeranus.^[4]

Skildring

Dette er svært store fuglar, typisk 95-120 cm i kroppslengde. Vortetrane i Afrika skil seg ut med ei kroppslengd på 175 cm.^[5] Som andre traner har medlemmene i Grus særs lange bein og lang hals, og spisse, dolkforma nebb. Dei fleste har fjørdrakt i grått med innslag i kvitt, unntaket er trompetertrane som er mest kvit. Vengene har lange tertiærfjører som ser ut som ein buskete stjert når fuglen står oppreist.^[6] To artar, trane og jomfrutrane har ei vid hekkeutbreiing i Eurasia, av dei hekkar trane i Noreg, medan jomfrutrane er ein sjeldan streiffugl i Noreg.^[6] Vortetrane og blåtrane hekkar i Afrika. Ein art, trompetertrane, lever i svært innskrenka område i Nord-Amerika. Dei tre øvrige artane har utbreiing på mindre område i Asia. Alle artane er trekkfuglar unntatt dei to afrikanske tranene.

Artsliste

Fugleslekta Grus i rekkjefølgje etter IOC World Bird List V13.1, 2023,^[4] med norske artsnamn etter Norske navn på verdens fugler.^[7] IUCN-kategori er etter HBW and BirdLife Taxonomic Checklist.^[8]

Treliste

• • Slekt Grus
    • Vortetrane, Grus carunculata, Wattled crane, (Gmelin, JF, 1789), (VU)
    • Blåtrane, Grus paradisea, Blue crane, (Lichtenstein, AAH, 1793), (VU)
    • Jomfrutrane, Grus virgo, Demoiselle crane, (Linnaeus, 1758), (LC)
    • Japantrane, Grus japonensis, Red-crowned crane, (Müller, PLS, 1776), (VU)
    • Trompetertrane, Grus americana, Whooping crane, (Linnaeus, 1758), (EN)
    • Trane, Grus grus, Common crane, (Linnaeus, 1758), (LC)
    • Kvithovudtrane, Grus monacha, Hooded crane, Temminck, 1835, (VU)
    • Svarthalstrane, Grus nigricollis, Black-necked crane, Przevalski, 1876, (NT)