Howard Zinn

Howard Zinn (24. august 1922–27. januar 2010) var ein USA-amerikansk historikar og statsvitar. Han var frå 1960-talet ein markant forkjempar for borgerrettar og mot krig. I sitt virke var han inspirert av både marxisme, anarkisme, sosialisme og sosialdemokrati. Hans mest kjende bok, A People's History of the United States, er gitt ut på norsk under tittelen USA: Folkets historie: 1492 - i dag.

Howard Zinn
Fødd	24. august 1922 Brooklyn
Død	27. januar 2010 Santa Monica
Nasjonalitet	USA
Område	historie
Yrke	skodespelforfattar, statsvitar, historikar, skribent, universitetslærar, journalist, fredsaktivist, labor historian, menneskerettsaktivist, filmregissør
Institusjonar	Harvard University Spelman College Boston University
Alma mater	New York University Columbia University Thomas Jefferson High School
Barn	Jeff Zinn

Howard Zinn i 2004.

Samfunnskritikar og aktivist

Zinn la i 1958 fram doktoravhandlinga si om kongressrepresentanten Fiorello H. LaGuardia. Men det var som politisk aktivist han skulle verte kjent. I 1963 vart han oppsagt frå undervisningsstillinga si på Spelman College ved Atlanta University Center, etter å ha støtta eit studentopprør mot collegets filosofi om å utdanne «unge fruer». I 1964 begynte han ved Boston University der han vart aktiv i motstanden mot Vietnamkrigen. Zinn hadde krigserfaring frå 2. verdskrigen og hadde sjølv vore med første gong napalm vart brukt, og visste derfor at napalm drep ikkje berre soldatar, men òg sivile. Han har sagt at denne erfaringa har fått han til å stille spørsmål til andre tilfelle av bombing av sivile mål, som i Dresden, Hiroshima og Nagasaki.

I 1968 besøkte han Hanoi og hjelpte til med å få sett fri dei første tre US-amerikanske krigsfangane. Saman med Daniel Ellsberg og Noam Chomsky offentleggjorde han i 1971 hemmelegstempla dokument om dei diplomatiske relasjonane mellom USA og Vietnam i tida etter 1945. Zinn var i alle år ein av de fremste USA-amerikanske ekspertane på Vietnamkrigen. I tråd med dette kritiserte han amerikansk-leia krigføring i Jugoslavia, Afghanistan og Irak.

Historikar

Zinn er i dag mest kjend for A People's History of the United States, ei bok som er seld i over ein million eksemplar i USA. I motsetning til tradisjonell USA-amerikansk historieskriving ser Zinn utviklinga frå dei undertrykte si side, frå Columbus og dei første kolonialistane sine forsøk på utrydde urbefolkninga, via slavehandelen og dei uverdige tilhøva som USA-amerikanske arbeidarar har levd under, til borgerrettar og krigsmotstand.

Ymse

Zinn gav ut fleire verbalplater, og ei plate i lag med bandet Resident Genius. Han forfatta også skodespel.