Hunzadalen

Hunzadalen (burushaski, wakhi og urdu ہنزہ‎) er ein fjelldal i Gilgit-Baltistan i Pakistan. Dalen ligg heilt nord i Pakistan med grense til Kina og Afghanistan. Hunzaelva renn gjennom dalen.

Hunza
dal
Land	Pakistan
Hunzadalen 36.31666667°N 74.65°E / 36.31666667; 74.65
Wikimedia Commons: Hunza

Historie

Baltit festning

Hunzadalen om hausten.

Hunza var tidlegare ein fyrstestat som grensa til Uyghurstan (Xinjiangi Kina) i nordaust og Pamir i nordvest. Området blei erobra av britane mellom 1889 og 1892, og den dåverande leiaren Mir Safdar Ali Khan flykta til Kashghar i Kina.^[1] Under Britisk India grensa han til Gilgit Agency i sør og fyrstestaten Nagar i aust. Staten blei endeleg oppløyst i 1974 av den pakistanske statsministeren Zulfikar Ali Bhutto.

Hovudstaden i fyrstestaten var Baltit (også kjend som Karimabad). I dag er Baltit eit viktig turistmål i Hunzadalen. I dag er likevel Aliabad eit viktigare økonomisk og administrativt senter.

Skredet frå 2010.

Skred i 2010

I 2010 demma eit skred opp elva og laga ein innsjø kjend som Attabad. Demninga truga 15 000 folk i dalen under og blokkerte 27 km av Karakoram Highway.^[2][3]

Klima

I mai kan temperaturen nå maksimum på 26 °C og minimum på 10 °C, i oktober er maksimum 23 °C og minimum 2 °C. Turistsesongen i dalen er som regel frå mai til oktober, ettersom Karakoram Highway ofte blir blokkert av snø om vinteren.

Innbyggjarar

Kvinner krysser Hunza-elva ved Passu.

Lokale språk i dalen er mellom anna burushaski, wakhi og shina. Dei viktigaste folkegruppene i dalen er:

• I nedre Hunza, frå Khizerabad til Nasirabad: Hovudsakleg shinakifolk som snakkar shina.
• Sentrale Hunza, frå Murtazaabad til Attabad: Hovudsakleg burushaskitalarar, men ei folkegruppe kalla domaki har lenge budd nær Baltit.
• Øvre Hunza (Gojal), frå Shishkat til Khunjerab: Hovudsakleg wakhitalarar, av sentralasiatisk opphav. Burushaskitalarar blei flytta hit under mir Nazim Khan.

Lesekunne blant innbyggjarane her er rekna å vera over 90 %.^[4] Nesten alle barn har minst grunnskule.^[4]

Dei fleste innbyggjarane er ismailimuslimar, tilhengjarar av prins Karim Aga Khan IV. I Ganish høyrer ein majoritet til tolvar-sekta av sjiaislam.