Little Eva

Eva Narcissus Boyd betre kjent under artistnamnet Little Eva (29. juni 1943–10. april 2003) var ein amerikansk popsongar som hadde ein stor hit med «The Loco-Motion» i 1962.

Little Eva
Fødd	29. juni 1943
Fødestad	Belhaven
Død	10. april 2003 (59 år)
Dødsstad	Kinston
Fødenamn	Eva Narcissus Boyd
Alias	Little Eva
Opphav	USA
Aktiv	1962–2001
Sjanger	pop, danse-pop, rhythm and blues
Instrument	vokal
Plateselskap	Dimension, Collectables, Verve Records, Amy
Verka som	songar, musikar

Liv og virke

Boyd var fødd i Belhaven i Nord-Carolina i 1943 og hadde tolv søsken. Ho flytta til Brighton Beach i Brooklyn i New York då ho var femten.^[1][2]

Ho jobba som barnevakt og hushjelp for låtskrivar-ekteparet Carole King og Gerry Goffin. Dei valde henne til å syngja demoversjonen av «The Loco-Motion». Då den tiltenkte artisten for songen takka nei, blei Eva sin versjon gjeven ut og blei til ein hitt. Songen nådde fyrsteplassen på topplista i USA i 1962. Han selde over ein million eksemplar, og blei tildelt gullplate.^[2]

Little Eva heldt fram med å gje ut plater utover på 1960-talet, men fekk ikkje like stor suksess. Dei andre singlane hennar var «Keep Your Hands Off My Baby», «Let's Turkey Trot» og ein coverversjon av Bing Crosby-standarden «Swinging on a Star», som ho spelte inn med Big Dee Irwin (utan å bli godskriven på plata).^[3]

Ho opptredde framleis i 2001, då ho hadde fått ein kreftdiagnose.^[4][5] Ho døydde i 2003.^[1]