Rollag kommune

Rollag kommune er ein kommune i Numedal i Buskerud fylke. Kommunen grensar i nordvest til Nore og Uvdal kommune, i aust mot Sigdal kommune, i sør mot Flesberg kommune, og i vest mot Tinn kommune i Telemark fylke.

Rollag kommune
kommune
Kommunevåpen
Land	Noreg
Fylke	Buskerud
Adm.senter	Rollag
Areal	449 km²
•  land	434 km²
•  vatn	15 km²
Folketal	1 414  (1. januar 2025)
Målform	nøytral
Ordførar	Viel Jaren Heitmann (Sp)
Kommunenr.	3336
Rollag kommune 59.983888888889°N 9.2952805555556°E / 59.983888888889; 9.2952805555556
Kart som viser Rollag kommune. Kart som viser Rollag kommune.
Wikimedia Commons: Rollag
Nettstad: www.rollag.kommune.no

Den offisielle skildringa av kommunevåpenet er «To oppstigende gullspisser, møtende i øvre skjoldrand, mot rød bakgrunn». Våpenet viser stilisert ein varde og er frå 1993.

Næringsliv og samferdsel

Rollag er ein jordbruks- og skogbrukskommune. Dei fleste gardane ligg på morenejord i hovuddalføret 200–300 moh. Jordbruket er basert på hald av husdyr (særleg storfe og sau), men det er også dyrka atskilleg korn. Kongsberg Automotive har ein fabrikk i Rollag, som er å rekna som ei hjørnesteinsbedrift i kommunen. I Rollag ligg Numedal folkehøgskole, ein folkehøgskole som fokuserer på idrett.

Fylkesveg 40 (Kongsberg–Geilo) går gjennom kommunen langs Lågen. Frå Veggli kyrkje går det sommarveg vestover til Tinn kommune i Telemark og frå dei sørlege delane av bygda over til Sigdal kommune. Numedalsbanen som gjekk frå Kongsberg til Rødberg har nå noko turisttrafikk i privat regi; overfor Veggli er det berre dressinkjøring.

Geografi

Rollag kommune omfattar Numedal frå Fossan til Vergja bru, i tillegg til fjelltraktene på begge sider. Dalsidene i Numedal er for det meste bratte og skogkledde, og åslandet på begge sidene av hovuddalføret er svært kupert. Nesten to tredelar av arealet i kommunen ligg høgre enn 600 moh. Det høgste punktet er Storegrønut som er 1289 moh. og ligg på Vegglifjell, på grensa til Telemark i nordvest.

Det er to tettstader i Rollag kommune, kommunesenteret Rollag og det noko større Veggli. Busetnaden i kommunen følgjer for det meste hovuddalføret der desse to tettstadene ligg.

• 
  Rollag stavkyrkje i Rollag.
• 
  Vegglifjell, det høgste fjellområdet i kommunen.
• 
  Åklinuten (1246 moh.)
• 
  På Åkli med utsyn mot Kroktjørnan og Viermyrnuten/Blenuten.