Viktor Mamatov

Viktor Fjodorovitsj Mamatov^[a] (21. juli 1937–27. oktober 2023) var ein sovjet-russisk tidlegare skiskyttar frå Belovo i Kemerovo oblast. Han vart verdsmeister i den individuelle øvinga under VM i skiskyting 1967, olympisk meister i stafett med Sovjetunionen både i 1968 og 1972 og verdsmeister i same øvinga i tre år på rad; 1969-71.

Viktor Mamatov
Statsborgarskap	Sovjetunionen, Russland
Fødd	21. juli 1937 Belovo
Død	27. oktober 2023 (86 år) Moskva
Yrke	skiskyttar
Språk	russisk
Politisk parti	Sovjetunionens kommunistiske parti

Aktiv

Mamatov var 29 år gammal då han vann gullmedaljen på 20 km under VM i skiskyting 1967 i austtyske Altenberg, den einaste individuelle øvinga i meisterskapen. Meisterskapen var elles hans fyrste, og han fekk også med seg ein sølvmedalje med Sovjetunionen sitt lag i 4 x 7,5 km stafett, gullmedaljen tok Noreg.

Frå Vinter-OL 1968 i Grenoble til og Vinter-OL 1972 i Sapporo deltok Mamatov på alle sovjetiske stafettlag i den årlege internasjonale skiskytings-meisterskapen; alle dei fem aktuelle tevlingane enda med gull til Mamatov og dei ulike lagkameratane hans, framom alle i lag med Aleksandr Tikhonov og Rennat Safin. I tillegg til dei to OL-gulla og tre-VM-gulla vann Mamatov bronsemedaljen i den individuelle øvinga under VM 1970 i Östersund, bakom landsmannen Tikhonov og sølvvinnaren Tor Svendsberget frå Noreg.

Medaljar og besteplasseringar i internasjonale meisterskap

• VM i skiskyting 1967 i Altenberg: Gullmedalje på 20 km, sølvmedalje i stafett
• Vinter-OL 1968 i Grenoble: Gullmedalje i stafett, nr 7 på 20 km
• VM i skiskyting 1969 i Zakopane: Gullmedalje i stafett, nr 14 på 20 km
• VM i skiskyting 1970 i Östersund: Gullmedalje i stafett, bronsemedalje på 20 km
• VM i skiskyting 1971 i Tavastehus: Gullmedalje i stafett, nr 6 på 20 km
• Vinter-OL 1972 i Sapporo: Gullmedalje i stafett, nr 7 i 20 km

Merknadar

1. Russisk skrift Виктор Фёдорович Маматов

Kjelder

• Sportsboken, aktuelle årgangar