Bob Denard

Robert Denard, dich Bob Denard, nascut en Occitània lo 7 d'abril de 1929 a Bordèu (Gasconha) e mòrt en França lo 13 d'octobre de 2007 còsta París a Pontault-Combault en Sèina e Marna, èra un mercenari anti comunista occitan francofòn implicat dins de nombroses còps d'estat en Africa entre 1960 e 1995.

A 16 ans, en octobre de 1945, s'èra engatjat dins la Marina e èra alavetz partit en Provença a l'escòla dels aprendisses mecanicians de Sant Mandrier de Mar. S'es en seguida engatjat coma volontari per far la Guèrra d'Indochina.

Se tira de l'armada en 1952 e entre un pauc mai tard dins la polícia al Marròc qu'es a n'aquesta epòca un país jos protectorat francés. Aquí, acusat d'aver participat a un complòt en 1956 a Casablanca per temptar d'assassinar lo president del Conselh dels ministres francés Pierre Mendès France, Bob Denard a passat 18 meses en preson.^[1]

De 1960 a 1963, es mercenari al servici de l'Estat separatista del Katanga de Moïse Tshombé qu'a declarat son independéncia del Còngo lo 11 de julhet de 1960.

D'agost de 1963 fins a la fin 1964, a la demanda dels servicis secrèts britanics, participa ambe 17 autres mercenaris a la guèrra civila del Iemèn dins lo camp reialista contra los republicans eles sostenguts militarament per Gamal Abdèl Nassèr.

Anti comunista virulent, Bob Denard torna fin 1964 al Còngo, mas aqueste còp per ajudar lo govèrn congolés a domdar la rebellion comunista menada per Gbenie, Soumialot e Mulele.

Bob Denard interven tanben en Angòla en 1975, tornarmai a la demanda dels servicis secrèts britanics.

Bob Denard, lo « vicerei de las Comòras »

Lo 6 de julhet de 1975, las Comòras proclaman lor independéncia de França. En setembre de 1975, Bob Denard es alavetz engatjat per Ali Soilih que ven d'i far un còp d'estat per arrestar lo president Ahmed Abdallah que resistissiá en s'essent refugiat sus l'illa d'Anjouan. Mas lo 13 de mai de 1978, Bob Denard torna a las Comòras ambe 43 òmes per ne tirar Soilih del poder pr'amor que i aviá mes en plaça un regim comunista : Bob Denard preferís fin finala tornar lo poder a Ahmed Abdallah.

A partir d'aquí, Bob Denard a la carga de gerir la garda presidenciala compausada de 600 soldats comorians. Vengut aital pròche del regim comorian, Bob Denard a alavetz una gròssa influéncia dins la gestion del país, negociant quitament ambe Sud-Africa, en aquel temps país jos embarg militar, per trobar un sosten financièr per las Comòras. A tant d'influéncia qu'es quitament escaissat lo « vicerei de las Comòras » e regna de facto una detzena d'annadas sul país.

En 1989, Ahmed Abdallah balha l'òrdre a la Garda presidenciala de Bob Denard de desarmar las fòrças armadas : un còp d'estat lo menaça. Pauc après, un oficièr de las fòrças armadas seriá dintrat dins lo burèu del president Abdallah e l'auriá abatut, nafrant tanben Bob Denard. Bob Denard negòcia alavetz sa partença per Sud-Africa.

Dins la nuèch del 27 al 28 de setembre de 1995, Bob Denard fa tombar lo novèl president comorian Saïd Mohamed Djohar (elegit en 1990) ambe un trentenat de mercenaris armats. Pasmens, en reaccion a n'aquel còp d'estat, França interven militarament : encerclat, Bob Denard negòcia una amnistia pels insurgents abans sa reddition e la preparacion de son procès.^[2]

Participacion al genocidi del Rwanda

Se sap pauc de causas sul ròtle exacte qu'a pogut jogar Bob Denard pendent los massacres comeses pels Hutus suls Tutsis al Rwanda. Çò qu'es segur, es que lo governament hutu l'a recrutat en 1994, malgrat los avertiments dels servicis secrèts franceses que li desconselhavan d'intervenir. En tot cas, es estat pagat mai d'un milion de francs per son « trabalh » a n'aquesta periòda.

La retirada

Après lo Rwanda, de retorn en Occitània, se retira dins un primièr temps dins lo Medòc ont pensa de bastir sus son terren familial a Graian e l'Espitau un musèu de la descolonizacion.

En 1999, Bob Denard s'installa fin finala còsta París ont i passa las darrièras annadas de sa vida.