Ferdinand de Lesseps

Ferdinand de Lesseps (19 de novembre de 1805, Versalhas - 7 de decembre de 1894, Guilly) es un diplomata e administrator francés famós per son ròtle dins la construccion dei canaus de Suèz e de Panamà.

Retrach de Ferdinand de Lesseps entre 1872 e 1876.

Originari d'una familha nobla liada a Napoleon III, Ferdinand de Lesseps foguèt nomat vice-cònsol de Tunis en 1828. Quatre ans pus tard, foguèt nomat a Alexàndria onte descurbiguèt lei projèctes de construccion d'un canau maritim entre la Mar Mediterranèa e la Mar Roja. Gràcias a de contactes ben establits au sen dau govèrn egipcian, obtenguèt una concession en novembre de 1854 e fondèt la Companhiá Universala dau Canau Maritim de Suèz. De 1859 a 1869, aquela entrepresa cavèt lo canau que foguèt inaugurat lo 17 de novembre de 1869.

Après aqueu succès, Lesseps s'interessèt ai projèctes de construccion dau canau de Panamà. Fondèt la Companhiá Universala dau Canau Interoceanic de Panamà en 1879 e comencèt la construccion d'un canau dins la region. Pasmens, fòrça dificultats tecnicas apareguèron e lo còst aumentèt rapidament. Lei malautiás tropicalas foguèron tanben un problema constant. Menaçat de falhida, Lesseps deguèt corrompre plusors jornalistas e òmes politics per gardar lo sostèn deis autoritats francesas. Dins aquò, en 1889, la companhiá faguèt definitivament falhida. Aquò entraïnèt l'escandòl de Panamà que menèt a plusors condamnacions de responsables de la companhiá^[1]. En 1893, Lesseps foguèt ansin condamnat a una pena de 5 ans de preson que foguèt pas aplicada.

Liames intèrnes

• Panamà (canau de).
• Suèz (canau de).

Bibliografia

• (fr) Ghislain de Diesbach, Ferdinand de Lesseps, Perrin, 1998.