Fusilhada del 12 de junh de 2016 a Orlando

La fusilhada del 12 de junh de 2016 a Orlando es un masèl als Estat Units d'America, dins la dicotèca gay lo Pulse, en Florida^[1].

Lo bilanç provisòri es de quaranta e nòu mòrts, en mai de l'autor del masèl que foguèt tuat per la polícia. S'agís, dins tota l'istòria dels EUA, del bilanç mai pesuc per un caple realizat per arma de fuòc en temps de patz^[2]. L'atemptat es revendicat per l'organizacion terrorista Estat islamic^[3].

Es tanben la segonda fusilhada en dos jorns a Orlando, la cantaira Christina Grimmie foguèt assassinada, a l'eissida d'un concèrt tengut a mens de cinc quilomètres del Pulse^[4].

Debanament

L'arribada dels secors pendent la fusillhada.

Casc en Kevlar del policièr tocat al cap.

Dins la nuèch del 12 de junh de 2016, per la gay pride, gaireben 350 personas assistisson a la serrada « Latin flavor » organizada per la discotèca omosexuala Pulse, naut luòc de la comunautat LGBT d'Orlando (Florida). Pau abans 2 h 0 ;EDT, un nomenat Omar Mir Saddiqui Mateen arrèsta son veïcul dins lo parcatge de l'establiment. Dintra dins lo club armat d’un fusilh d’assalt AR-15, d’un pistolet e fòrça municions e comença a tirar suls clients, vèrs 2 oras 02 minutas del matin^[5]. Lo club pòsta sul pic sus sa pagina Facebook lo messatge: « Everyone get out of Pulse and keep running. » ("Totes sortissetz del Pulse e corrissetz") Las fòrças de l'òrdre arriban lèu, alara que la fusilhada encara se debana. Lo terrorista arrèsta de tirar; l'atemptat vira a presa ostatges^[6] alara que se retira dins los comuns de l'establiment amb de personas^[5]. Un negociator es alara enviat. Lo tiraire anóncia èsser en possession d'un engenh explosiu^[7], mas fa pas cap de demanda particulara^[5].

Vèrs 5 oras, lo grop d'intervencion SWAT dona l'assalt. Après aver ensejat d'utilizar d'explosius, las fòrças de l'òrdre utilizan un veïcul blindat per enfonçar la paret de l'imòble. Los ostatges pòdon alara fugir pendent qu'un escambi de tirs comença amb lo criminal^[5]. Mateen es tuat, e una trentena d'ostatges liberats^[8]. Un policièr es tocat al cap per una bala del terrorista, es pas que nafrat, salvat per son casc de Kevlar^[5].

Victimas

Lo conse de la vila, Buddy Dyer, anóncia unas oras mai tard un bilanç de 50 mòrts — comptant l'assassin — e 53 ferits^[9],[10].

S'agís, dins l'istòria dels EUA, de la fusilhada mai murtrièra fòra dels periòdes de guèrra^[11],[4]</ref>^,[12], e del pièger acte de violéncia jamai realizat contra la comunautat LGBT^[13].

Enquèsta

Autor

Omar Mateen, perpetraire de la fusilhada, tuat pendent la liberacion dels ostatges.

L’autor d'aquela fusilhada, Omar Mir Saddiqui Mateen^[4]</ref>, es un agent de securitat estatsunian, demorant a Fort Pierce e trabalhant per la firma G4S Secure Solutions (en)^[14]. Nasquèt lo 16 de novembre de 1986 a Nòva York de parents afgans. L'FBI anóncia de possibles ligams del tuaire amb los mitans islamistas^[15].

Omar Mateen utilizèt un fusilh d'assalt de tipe AR-15, un modèl d'arma que ja foguèt untilizat pels autors dels masèls de San Bernardino e Sandy Hook.

Revendicacion

Pendent la presa d'ostatges, Omar Mateen fa lo numèro dels servicis d’urgéncia dels EUA per revendicar son acte^[5]; declara agir al nom del grop djihadista Etat islamic. L'atemptat es revendicat lo meteis jorn per l'organizacion^[16],[5].

L'endeman, la radio de l'EI torna sus l'eveniment, se felicitant de l'ataca menada contra los "sodomitas"  pel "fraire Omar Marteen, un dels soldats del califat en America"^[17].

Autre incident

Le meteis jorn, dimenge 12 de juin de 2016, las autoritats de Santa Monica en Califòrnia arèsta un òme pesucament armat que s'anava a  la marcha dels ufans de Los Angeles^[18]. L'enquèsta es en cors.

Reaccions

Nacionalas

Discors de Barack Obama après la fusilhada.

Manifestacion de sosten a Minneapòlis.

Unas oras après la fusilhada, lo president Barack Obama parla a la populacion mejans la television. Qualifica l'atemptat d' "ataca de terror e d'òdi", que punta "mai qu'una discotèca, un luòc de solidaritat, un luòc d'emencipacion". Obama torna per l'escasença sul problèma pausat per la liura circulacion de las armas de fuòcs als EUA, soslinhant fins a que los malfactors o los terroristas se ne pòdon procurar aisidament^[19].

Los candidats per l'eleccion presidenciala de novembre, Donald Trump e Hillary Clinton, tanben reagisson disent lor sosten a las personas tocadas pel drama. Donald Trump pren l'escasença per accusar lo president Barack Obama de flaquesa fàcia a l'islam radical, e per remembrat las sieunas proposicions per tòca d'enebir l'imigracion musulmana als EUA^[20]. Dins lo contèxte de la campanha presidenciala, aquel eveniment torna al còr del debat lo subjècte del contraròtle de las armas de fuòc, e aquekla de la luta contra lo terrorisme^[21].

Internacionalas

En Euròpa

•  França: lo president de la Republica francesa, François Hollande, "condamna amb orror lo masèl" e exprima lo sosten dels fraceses a la autoritats e al pòble american dins un comunicat de l'Elisèu^[22].
• Païses Basses: lo Primièr ministre Mark Rutte fa sas condolenças a Barack Obama e afirma que "totes los neerlandeses acompanhan las familhas e los pròches de las victimas" ^[23].
• Portugal: lo president de la Republica portuguesa, Marcelo Rebelo de Sousa, envièt al president Obama sas condolenças: "Avèm assitit, amb un planh prigond, al tragic atemptat d'Orlando, Florida, que causèt un nombre tant grand de victimas inocentas e que marquèt totes aqueles que partissèm las valors de la democracia, la promocion de la patz e lo respècte dels drechs de l'òme" ^[24].
• Reialme Unit: la reina Elisabèt II amb Tweeter ditz unas oras après lo masèl: "Lo prince Felip e Ièu meteis avèm estat tustat pels eveniments arribats a Orlando. Nòstras pensadas e preguièras van a aqueles que foguèron tocats" ^[25]. Lo Primièr ministre David Cameron, tanben sus Twitter, se ditz "orrificat pels recits del masèl d'aquela nuèch a Orlando".

Autoritats religiosas

Lo papa François, mejans lo preire Federico Lombardi, director del Burèl de premsa de la Santa Se, condamna l'atemptat. Lo papa exprimís "de sentiments plan prigonds d'execracion, de dolor, de treble fàcia aquela novèla manifestacion d'una folia murtrièra e d'un òdi insensat". "S'unís dins la preguièra e la compacion al sofriment de las victimas e del ferits e lo recomanda al Senhor per que trapan lo reconfòrt. Vogam que totas las causas d'aquela violéncia òrre e absurda, que treble prigondament lo desir de patz del pòble american e de tota l'umanitat, pòscan èsser determinadas e combatudas de biais eficaç al pus lèu^[26]}}.