Henri Sainte-Claire Deville

Henri Sainte-Claire Deville (11 de març de 1818 - 1^èr de julhet de 1881) foguèt un quimista francés famós per son trabalh sus lo desvolopament dei procès d'industrializacion de l'alumini.

Retrach de Henri Sainte-Claire Deville.

Nasquèt dins l'illa antilhesa de Sant Tomàs onte son paire èra cònsol de França. Foguèt educat a París e venguèt mètge e doctor en sciéncias. En 1844, foguèt cargat de l'organizacion de la facultat dei sciéncias qu'èra en cors de creacion a Besançon. I ensenhèt la quimia de 1845 a 1851 avans d'èsser nomat a l'Escòla Normala puei a La Sorbona (1859).

Coma la màger part dei quimistas dau sègle XIX — periòde caracterizat per la descubèrta dei substàncias e de fenomèns quimics novèus gràcias au desvolopament de la quimia modèrna — menèt d'estudis variats. Ansin, en 1841, confirmèt una experiéncia dau quimista polonés Filip Neriusz Walter (1810-1847) e participèt a la descubèrta dau toluèn que li es de còps atribuida. Descurbiguèt l'acid nitric anidre (1849) e lo nitrur de potassi (1857) ambé Friedrich Wöhler). Puei, trabalhèt ambé Jules Henri Debray (1827-1888) sus lei metaus de la mina dau platin, especialament sus lo biais de lo purificar per fabricar un escandau de massa. Tornarmai associat ambé Friedrich Wöhler, estudièt l'allotropia dau silici. Enfin, estudièt lei reaccions quimicas ont es a l'origina de l'introduccion de l'importanta nocion de dissociacion.

Pasmens, sei trabalhs pus coneguts se debanèron dins lo corrent deis annadas 1850 quand s'interessèt a l'alumini. D'efèct, en 1855, capitèt de trobar un procès permetent d'obtenir d'alumini metallic. Fondèt alora la premiera manufactura productritz d'alumini e recebèt lo sostèn dau govèrn francés per perseguir sei recèrcas.

Liames intèrnes

• Quimia.

Bibliografia