Kaoma

Kaoma es un grop de musica francés e brasilian fondat en 1989 e inactiu dempuèi 2009, conegut per aver cantat (en portugués) La Lambada.

Los sòcis de Kaoma son per la màger part d'ancians musicians del grop senegalés Touré Kunda : Chico (bassista, originari de Martinica), Jacky (guitarrista, originària de Guadalope), Jean-Claude (clavierista, originari de Tolosa), Michel (batariá e percussions), Fania Niang (corista senegalesa de París), Loalwa Braz (cantaira brasiliana) e Monica Nogueira (cantaira brasiliana tanben).

La Lambada (o puslèu, mai simplament Lambada), primièr 45 torns del grop, es en realitat un plagiat de la cançon en espanhòl Llorando se fue, del grop bolivian de musica andina Los Kjarkas, ambe la flaüta de Pan remplaçada per l'acordeon dins Lambada de Kaoma. Los Kjarkas argumentaràn per lors dreches e obtendràn ganh de causa en 1991.

La video de la cançon Lambada difusada en bocla a la television francesa a contribuït a ne far lo tube de l'estiu de 1989 en França, lo 45 torns se classant quitament numèro 1 de las vendas.

La paura Loalwa Braz es estada retrobada mòrta assassinada lo 19 de genièr de 2017 al Brasil.^[1]

Lambada es estada parodiada en francés en 1990 pels Garçons Bouchers, La Lambada, on n'aime pas ça (La Lambada, aquò nos agrada pas).

Discografia

• 1989 : Worldbeat
• 1990 : Tribal-Pursuit
• 1998 : A La Media Noche

Cançons mai conegudas en Occitània

• Lambada (1989)
• Dançando Lambada (1989)
• Mélodie d'amour (1990)
• Dança Tago Mago (1991)
• Moço do dende (1992)