Londres (Guiana)

Londres es una anciana comuna occitana d’Agenés, dins lo departament francés d’Òlt e Garona. En 1839 foguèt annexada a Pugmiclan.^[1]

Pels articles omonims, vejatz Londres (omonimia).

Non confondre amb Londras.

Mapa de la comuna al s. XIX.

Toponimia

Londres es un masatge sus la rota de Marmanda a Tombabuèu. Sent Pèir de Londres e Sent Estèfe de Londres son doas parròquias qu’èran sul territòri de l’anciana comuna.

Sent Pèir de Londres

Sent Pèir de Londres es citat dins lo pouillé (inventari de bens eclesiastics) de Valèri (1520): In archiprebyteratu Vesalmensi [= de Vesaume], Rector de Leda sive Londres, Sancti-Stephani et Sancti-Laurencii.^[2] Sent Pèir es lo nom de l'apòstol e Leda, un idronime semblable al nom del riu del canton de Montflanquin deviá èsser lo prumièr nom del luèc. Aquò tomba fòrt plan perqué la glèisa es dins la comba d’un riu, Manet, afluent de Trec, çò qu’explica los aigats qu’arroïnèron la glèisa e la fasquèron abandonar. Lo riu a simplament cambiat de nom. La bastida del sègle XIV situada a proximitat portava lo nom de la capitala del duc-rèi.^[3]

Saint-Étienne de Londres (nom francés)

Sent Estève o Sent Estèfe ? Dins l'oèst occitan, las glèisas dedicadas al sent an sovent la fòrma mièja-sabenta Estèfe, mas aquò demandariá verificacion. Sent Estève es considerat coma lo primièr martir de la Glèisa^[4],[5]. Abans d'èsser de Londres, lo determinant èra de Prunhac^[2] (del nom latin d'òme Provinius e sufixe -acum, o de prunus, « prunièr » e sufixe -iacum.^[6] Lo vilatge a donc de las originas anticas.

Populacion

Londres aviá 226 abitants al recensament de 1836.^[7]

Nòtas