Novèla Politica Economica

La Novèla Politica Economica ò NEP es una politica economica seguida en URSS de 1921 a 1929. Èra basada sus una liberalizacion parciala de la societat sovietica per respòndre ai destruccions e ai trèbols sociaus entraïnat per la Guèrra Civila Russa. Permetèt de redreiçar l'economia sovietica, mai foguèt una fònt de tensions au sen dau Partit. Après plusors debats, foguèt abandonada per Estalin que privilegièt la collectivizacion de l'ensemble de la societat.

Istòria

L'idèa de la NEP apareguèt dins lo corrent de 1920 per remplaçar lo comunisme de guèrra. D'efiech, après sièis de guèrra, l'URSS èra minada per de conflictes sociaus, per de tensions entre revolucionaris e per lei destruccions causadas per lei combats. En particular, la revòuta dei païsans de la region de Tambov e l'insureccion de la basa navala de Cronstadt (febrier-març de 1921) foguèron considerats coma d'avertiments grèus dau desvolopament de la contestacion au sen de la populacion, comprés dins lo movement bolchevic.

Lo X^en Congrès dau Partit (8-16 de març de 1921) adoptèt donc una politica provisòria destinada a restaurar l'aliança entre leis obriers e lei païsans en vista d'encoratjar lo desvolopament economic e sociau dau país. L'objectiu oficiau demorava la victòria dau socialisme dins lei país occidentaus, mai la NEP èra en realitat una liberalizacion parciala de l'economia sovietica. Lei requisicions de produchs agricòlas foguèron abandonadas e remplaçadas per d'impòsts en natura. Venguèt tanben possible d'escambiar de produchs agricòlas còntra de bens manufacturats. Puei, la moneda e lo comèrci interior foguèron restablits en 1922. La NEP foguèt tanben estenduda au sector industriau. La creacion de companhiás privadas pichonas foguèt autorizada e d'entrepresas nacionalizadas foguèron rendudas a de particulars. L'Estat gardèt unicament lo monopòli de l'industria pesuca e dau comèrci exterior.

Après la catastròfa de la famina dins la vau de Vòlga (1922-1923), la NEP permetèt un redreiçament de l'economia sovietica. La produccion nacionala agantèt lei nivèus d'avans guèrra en 1926. Pasmens, la liberalizacion de l'economia suscitèt de problèmas coma la persisténcia d'un caumatge important, l'aparicion d'una classa de païsans aisats (lei kolaks) ò de borgés urbans (lei nepmen). Ansin, la NEP foguèt fòrça criticada per l'ala radicala dau Partit mentre que l'ala drecha desirava sa prolongacion. Aquelei debats venguèron un deis enjòcs dei luchas per la succession de Lenin. Inicialament en favor de la NEP, Estalin decidèt de l'abandonar en 1928-1929 per impausar un projècte d'industrializacion e de colllectivizacion massís dau país en abriu de 1929.