Wii

La Wii es una consòla de videojòcs domestica de Nintendo. Foguèt lançada en l'America del Nòrd lo 19 de novembre de 2006 e arribèt en Euròpa lo 8 de decembre.^[1][2]

Wii e Wii Remote

Logo de la consòla

Fa partida de la setena generacion de consòlas e competiguèt amb la PlayStation 3 de Sony e l'Xbox 360 de Microsoft. Popularizèt los contraròtles de movement amb lo Wii Remote e se centrèt mai suls jòcs casuals. Vendèt mai de 101 milions d'unitats; venguèt la consòla domestica Nintendo mai venduda fins que foguèt subrepassada per la Nintendo Switch.^[3]

Es la successora de la Nintendo GameCube; n'admet tanben los jòcs amb la retrocompatibilitat. La consòla foguèt seguida per la Wii U en 2012.

Nom

Abans que se causiguèsse lo nom final, la consòla èra coneguda coma "Revolution". Foguèt renomenada a "Wii" perque èra mai aisit de remembrar e de prononciar dins las diferentas lengas.^[4]

Segon la guida d'estil de Nintendo, lo nom n'es "Wii" e pas "*Nintendo Wii". En mai, las letras "i" son totjorn escrichas en minusculas e lo plural es pas "*Wiis", puslèu "consòlas Wii".^[4][5]

Lançament

La Wii foguèt lançada en l'America del Nòrd lo 19 de novembre de 2006.^[1] Arribèt en Japon lo 2 de decembre e en Euròpa lo 8 de decembre.^[6][2] La version sud-coreana de la consòla foguèt lançada lo 26 d'abril de 2008.^[7] Una version especiala de la consòla japonesa per Taiwan i foguèt lançada lo 12 de julhet de 2008; arribariá oficialament a Hong Kong lo 12 de decembre de 2009.^[8][9] Una version per la China Populara èra en desvolopament per iQue mas foguèt pas lançada a causa de l'interdiccion de las consòlas de videojòcs a l'epòca dins lo país.^[10]

I a doas variantas posterioras de la consòla: la Wii "Family Edition" e la Wii mini.

Contrarotlaires

Lo Wii Remote (drecha) e lo Nunchuk (esquèrra)

Lo contrarotlaire principal de la Wii es lo Wii Remote. A la forma d'una telecomanda e inclutz la deteccion de movement, en mai d'un sensor infraroge que permet als jogaires de lo puntar cap a una barra situada jos (o sus) lo televisor per seleccionar las opcions de l'ecran.^[11][12]

Nombroses accessòris pòdon èsser aponduts al Wii Remote en los connectant al pòrt a la partida inferiora de la telecomanda, dont los mai comuns son lo Nunchuk, un contrarotlaire suplementari, e l'accessòri Wii MotionPlus, que permet una deteccion del movement mai precisa e que es requerit per qualques jòcs coma Wii Sports Resort.^[12][13][14] I a tanben d'autres accessòris que se connectan pas al Wii Remote, coma la Wii Balance Board, utilizada per Wii Fit e Wii Fit Plus.^[15]

Fòrça dels contrarotlaires e accessòris de la Wii son utilizats tanben per la Wii U.

Jòcs

Sièis jòcs Wii son dins la lista dels 30 videojòcs mai venduts de l'istòria: Wii Sports (82.900.000 unitats), Wii Fit e Wii Fit Plus (43.800.000 unitats), Mario Kart Wii (37.380.000 unitats), Wii Sports Resort (33.140.000 unitats), New Super Mario Bros. Wii (30.320.000 unitats) e Wii Play (28.020.000 unitats).^[16]