Wii U
From Wikipedia, the free encyclopedia
La Wii U es una consòla de videojòcs domestica de Nintendo. Foguèt lançada en l'America del Nòrd lo 18 de novembre de 2012; arribèt en Euròpa lo 30 del meteis mes.[1][2]
Successora de la Wii e destinada als jogaires mai experimentats,[3] la Wii U comencèt la ochena generacion de consòlas e competiriá amb la PlayStation 4 de Sony e l'Xbox One de Microsoft.[4] Ne foguèron vendudas 13,56 milions d'unitats e foguèt seguida per la Nintendo Switch en 2017.[5]
Caracteristicas
Contrarotlaires
Lo contrarotlaire principal de la Wii U es lo Wii U GamePad. La caracteristica principala n'es un ecran tactil qu'es utilizat pels jòcs coma acompanhament de l'ecran del televisor.[6] Lo Wii U GamePad admet la comunicacion de camp pròche; permet d'utilizar de cartas de crèdit qu'utilizan aquesta foncionalitat e tanben de figuretas coma los amiibo.[7]
La Wii U es tanben compatibla amb los contrarotlaires e accessòris de la Wii, dont lo Wii Remote. Pòdon èsser utilizats amb de jòcs Wii e Wii U que los admeton; en fach, son necessaris per jogar a qualques jòcs Wii U, coma Wii Sports Club.
Retrocompatibilitat
La Wii U es compatibla amb los jòcs Wii. Pòdon èsser jogats dempuèi la foncionalitat Wii Menu, que reavia la consòla dins un mòde Wii limitat. Los jòcs Wii pòdon pas èsser contrarotlats amb lo Wii U GamePad. Lo mòde Wii es pas compatible amb fòrça foncionalitats, coma lo Photo Channel, WiiConnect24, l'enviament de messatges o los jòcs GameCube. Pasmens, qualques modificacions creadas per la comunautat reactivan aquestas foncionalitats.[8][9]
Una aplicacion lançada per Nintendo permet lo transferiment de las donadas d'una Wii a una Wii U, a l'excepcion d'aquelas ligadas a las foncionalitats çai sus.[10][11]
Grafics
La Wii U permet de grafics fins a 1080p amb HDMI. Foguèt la primièra consòla Nintendo a èsser compatibla amb de grafics HD.[3][12] Los jòcs Wii son afichats dins lor resolucion estandard originala.
Foncionalitats en linha
La Wii U utiliza la plataforma Nintendo Network pel servici en linha, tanben utilizada per la Nintendo 3DS. Los servicis ofèrts per la plataforma permeton als utilizaires fòrça opcions a travèrs Internet, coma jogar a de jòcs en linha, telecargar e crompar d'aplicacions e de jòcs sus Nintendo eShop o far de trucadas vidèo amb lors amics sus Wii U Chat.[13]
De mai, la consòla introdusiguèt lo servici Miiverse, una ret sociala que permetiá als jogaires d'interagir dins de comunautats en basa sus cada jòc. Se poiriá compartir de capturas d'ecran e de nòtas o de dessenhs manuscriches. Qualques jòcs avián d'integracions amb Miiverse e mostravan de publicacions d'autres jogaires dins lo jòc.[14]
La Wii U a tanben un navegador web.[14]
La màger part dels servicis en linha son ara indisponibles. Los servicis de Wii U Chat e de Miiverse foguèron barrats lo 8 de novembre de 2017.[15][16] La botiga Nintendo eShop foguèt barrada mai tard lo 27 de març de 2023.[17] Fin finala, lo servici multijogaire en linha de Nintendo Network foguèt barrat lo 9 d'abril de 2024.[18]
Jòcs
Los jòcs Wii U èran venduts en dos formats: fisicament, o digitalament a travèrs Nintendo eShop (aqueste darrièr es ara indisponible). Los jòcs fisics utilizan de discs optics similars als Blu-ray.[19]Los jòcs mai venduts ne son Mario Kart 8, Super Mario 3D World e New Super Mario Bros. U. D'autres jòcs importants de Nintendo son Super Smash Bros. per Wii U, Super Mario Maker e Splatoon; aqueste darrièr comencèt una de las franquicias mai popularas de l'entrepresa.[20]
Nòtas e referéncias
Wikiwand - on
Seamless Wikipedia browsing. On steroids.