Festival di Tumba di Kòrsou

Festival di Tumba di Kòrsou ta un kompetensia musikal di komposishonnan di tumba, ku ta wòrdu organisá anualmente na Kòrsou. Ta usa e komposishon ganadó komo roadmarch pa Karnaval i su kantante ta wòrdu proklamá "Rei(na) di Tumba".

 E artíkulo aki ta skirbí na ortografia di papiamentu. Lo ta apresiá si por mantené e artíkulo aki na estilo di papiamentu.

Historia

Na 1970 e komishon organisadó di Karnaval ta akordá ku e "Asosiashon di Músika" ku e roadmarch di Karnaval lo mester ta músika tipiko di Kòrsou. Ta skohe pa introdusí e ritmo di tumba ku letra na Papiamentu pa remplasá kalipso, un ritmo popular karibense usando letra na ingles. Promotornan tras di tumba komo músika karnavalesko tabata entre otro Boy Dap i Juan Camelia.^[1] Foi djaki ta nase e festival di tumba, unda un hurado ta saka e hit musikal bailabel ku lo wordu toka kontinuo durante fiesta i paradanan di Karnaval.^[2] Pa e kompetensia a fiha algun regla, entre otro pa ku e ritmo i e letra di e komposishon. Den kurso di tempo a amplia e reglanan, eliminando hasta komentario polítiko foi e letra.^[3]

Dia promé di febrüari 1971 e promé festival ta tuma lugá den Teatro Roxy na Willemstad. E kantante Boy Dap ta sali Rei di Tumba entre e 16 komposishon presentá dilanti un públiko di 384 persona. Despues di su inisio e festival a krese rápidamente. Curom tabata e promé radio emisora ​​pa transmití e evento bibu ku Hermanito Narvaez komo e promé reportero radial.^[4]

Na 1981 20 komposishon a wòrdu presentá pa un públiko di 5000 hende.^[5] Pa motibu di e krisis di corona no a tene e festival na 2021 i 2022.^[6] Na su lugá a organisá e Tumba Revival Festival, un festival sin kompetensia i sin públiko unda a presenta e 50 kansion ganadó den e historia di e festival di Kòrsou. Esaki a wòrdu transmití na Aruba, Boneiru i Kòrsou via kanalnan di televishon.^[7] E di 51 edishon di e festival a sigui na 2023, kontando ku un partisipashon di 48 komposishon nobo.^[8] Te ku 2015 e inskripshonnan pa partisipa tabatin un promedio di 60 partisipante, loke den e periodo despues te ku 2025 no a ser alkansa.^[9]

Islanan ABC

Desde 1971 tambe tin festival di tumba na Aruba i Boneiru den kuadro di e temporada di Karnaval. Kantantenan di Aruba i Boneiru tambe por partisipa na e festival di Kòrsou. Den e promé festival di tumba di Islanan ABC, ku a tuma lugá na Aruba na 1989, Boy Dap ta keda elegi e promé "Rei di Tumba di Antias i Aruba" ku su tumba Waya pasa bai.^[10]