Hubert Booi

Hubert Obdulio (Lio) Booi (☆ 25 di juli 1919 na Nikiboko - † 20 di december 2014 na Aruba) tabata un poeta, autor, dramaturgo, traductor, docente, actor y declamador Boneriano-Arubano. E ta e autor di Himno di Boneiro y co-autor di Himno di Aruba. E tabata particularmente conoci como promotor di idioma Papiamento y bida cultural na Aruba.

 E articulo aki ta uza ortografia di Papiamento. Lo aprecia si por mantene e articulo aki na estilo di Papiamento.

Wak Booi (pagina di referencia) pa un otro nificacion di topico.

Hubert Booi
Imagen desea: Hubert Booi
Informacion basico
Nomber completo	Hubert Obdulio Booi
Nacemento	25 yüli 1919 Nikiboko
Fayecimento	20 desèmber 2014 Oranjestad
Lenga materno	Papiamento
Informacion profesional
Ofishi	poeta, dramaturgo, traduktor, reciter, stage actor, maestro
Obra
Genero	literatura
Movemento	Indjanismo
Lenga literario	Papiamento
Obra notabel	Himno di Boneiru, Aruba Dushi Tera
Famia
Casa	Flora (Ina) Coronel
Yui	6
Otro informacion
Distincion	Premio Cadushi di Cristal (1999) Cabayero den Orden di Oranje-Nassau
dbnl-profiel
[Edita Wikidata] · [Manual]

Biografia

Lio Booi a nace na Nikiboko, Boneiro na 1919. Na 1935 el a muda pa Aruba y a traha 23 aña na e sucursal Arubano di Hollandsche Bank-Unie (HBU). Seguidamente e ta drenta servicio di gobierno ocupando diferente puesto, entre otro na WEB, oficina di turismo y departamento di informacion (BUVO). Na 1963 e ta bira hefe di Oficina di Cultura y Educacion.

Den curso di e añanan, Booi a crece bira e figura di bida cultural na Aruba. Como miembro di directiva di Sociedad Bolivariana, e tabata cofundado di "Arubaanse Kunstkring" na 1946, cu tabata organisa presentacionnan di musico internacional, conhunto y gruponan di ballet. E mes tabata toca piano i tabata actor. Como pintor autodidactico, el a duna les di pintamento y tabata prefera di pinta paisahe y naturalesa Arubano. Booi tabata un promotor ardiente di Papiamento y tabata duna charla riba idioma y cultura na radio y television. Ademas, el a duna les di Papiamento y tabata un experto autodidactico den idiomanan, incluyendo Ruso. El a keda nombra miembro y secretario di Comision Daantje, cu a conseha gobierno na 1974 tocante introduccion di un ortografia oficial pa Papiamento.^[1] Entre 1967 y 1969 el a colecta, hunto cu G.F. ‘Ito’ Tromp, informacion tocante cultura tradicional Arubano pa medio di historia oral di e poblacion indjan mestizo.^[2] Na aña 1978 el a funda Instituto di Cultura como contrapartido di Oficina di Cultura y Enseñansa, cu a keda disolvi dia 1 di januari 1986 ora cu Aruba a bandona Antias Hulandes. E tabata e prome director di e instituto aki te cu su retiro na 1980.

Na e edad di 95 aña Booi ta fayece den Horacio Oduber Hospital. E tabata casa cu Flora Quintana (Ina) Coronel y hunto nan tabatin cinco yiu muhe y un yiu homber. Su yiu Lydia Booi ta conoci como cantante soprano.

Escritor, poeta y dramaturgo

Booi a skirbi poesia, cantica, obra teatral y cuentanan na Papiamento. Su poemanan tabatin un uzo magistral di idioma y musicalidad, cu a wordo caracterisa pa Cola Debrot como un “ritmo adagio fluyente”.^[3] Booi tabata conoci tambe como un declamador meritorio di su propio obranan. Pa Padu Lampe el a skirbi entre otro letra pa cantica, y na 1976 el a skirbi un couplet adicional pa e himno nacional di Aruba. Tambe el a skirbi e letra pa e himno nacional Boneriano, Tera di Solo y Suave Biento.^[4] Esaki a keda publica pa prome biaha na aña 1944 den e buki di cantica Nos ta canta di Nilda Pinto.^[5]

Estatua di Hubert Booi na Plaza Padu, Oranjestad, Aruba

Den añanan 1950, Booi tabata e prome dramaturgo cu a percura pa un repertorio di teatro Arubano. E tabata un di e escritornan mas importante di e grupo di teatro amateur Mascaruba.^[4] Banda di traduccion na Papiamento di obranan for di e repertorio mundial, el a skirbi tambe obranan original Arubano. Su obra mas importante pa Mascaruba tabata e obra di pasion traduci Golgotha (1956), cu a actualisa e storia di pasion biblico y a pone esaki den un ambiente local Arubiano. E obra aki a keda publica na 1967 den Antilliaanse Cahiers. Pa e grupo hubenil cultural “De Trupialen” el a skirbi e musical E perla di Caribe (1955), un obra original den e tradicion di ‘Indjanismo’. E estilo aki a surgi for di un movemento na Latino America pa dedica atencion na su gran pasado indjan, cu a wordo destrui door di colonisacion Europeo. E nombernan di e personahenan den e musical a wordo tuma for di luganan na Aruba, manera Arashi, Bubali, Jucuri, Butucu, Basiruti y Macuarima, loke tabata comun den e ‘literatura indjanista’.^[6][4]

Booi su obranan a wordo inclui den varios antologia, entre otro Di Nos di Pierre Lauffer (1971); Cosecha Arubano (1983), De navelstreng van mijn taal. Poesía bibo di Aruba / Living poetry of Aruba di Anton Claassen (1992); Pa Saka Cara (1998) y Isla di mi di Frank Williams (2000).^[3] E obra E Perla di Caribe a keda publica completo na 1998 door di BNA como e prome edicion di “Cosecha Literario Arubiano”.^[6] Un lista di su contribucionnan na idioma Papiamento por wordo haya den e buki Bibliografia di Idioma Papiamento (2005) di Maritza Coomans-Eustatia. Parti di su obra (no publica) a keda conserva den forma di grabacion riba tape y manuscrito y ta forma parti di e coleccion “Ito Tromp” di Biblioteca Nacional Aruba.^[3]

Reconocemento

• 1999 - a reconoce su trabou literario cu e Premio Cadushi di Cristal.
• 2010 - Fundacion Lanta Papiamento a nombra Booi miembro honorario.
• 2017 - Inauguracion di estatua di Padu Lampe, Rufo Wever y Hubert Booi na Plaza Padu (Oranjestad)

Obra

• E perla di Caribe, musical/comedia (1955)
• Golgotha (1967 den Antilliaanse Cahiers)
• Amor di Kibaima, musical/comedia (1969)
• Muchila, antologia di proza y poesia (1969)
• E flamingo di Aruba (2006, antologia di poesia, comedia, cuenta y ensayo)