Ruby Bute

Ruby Angelica Bute (☆ 13 di januari 1943 na Aruba - 5 di november 2024 na Sint Maarten) ta un artista plastico, storyteller y poeta di Sint Maarten. Na 1989 e tabata e prome hende muhe na Sint Maarten pa publica su coleccion di poesia den forma di un buki, titula Golden Voices of S'maatin. Generalmente ta referi na dje como e "gran dama di artenan cultural di Sint Maarten" (ingles: first dame of St. Martin’s cultural arts)^[1][2]

 E articulo aki ta uza ortografia di Papiamento. Lo aprecia si por mantene e articulo aki na estilo di Papiamento.

Ruby Bute
Imagen desea: Ruby Bute
Informacion basico
Nacemento	1943
Fayecimento	5 novèmber 2024
Informacion profesional
Ofishi	pintor, eskritor, poeta
[Edita Wikidata] · [Manual]

Biografia

Ruby Bute a nace na 1943 na Aruba di mayornan di Sint Maarten.^[3][4] Nan a migra pa Aruba pa asina su tata por a traha como bombero. Na Aruba, Bute a casa, haña dos yiu, y despues a divorcia. Despues di tempo su famia, cu ya a muda bek pa Sint Maarten, a convence pa djòin nan eynan.^[5] Na november 1976 e ta establece su mes na Marigot, den e parti franses di e isla yamá Saint Martin.^[3][5]

Artista plastico

Bute a cuminsa pinta na un edad hoben. E tabata principalmente autodidacta,^[4][6] pues tin biaha tabata wordo referi na su obranan como arte folklorico.^[7] Despues di a muda pa Saint Martin, el a cuminsa bende su pinturanan den tiendanan riba e isla.^[5] E tabatin su prome show solista na 1983; e ta wordo considera e prome exposicion di un hende muhe na Saint Martin.^[8] Su pinturanan tabata documenta bida y cultura riba e isla den colonan vibrante.^[4][9] Bute a siña muchanan pintamento na John Larmonie Center na Philipsburg.^[3] E tambe a siña arte na prezu y turistanan, mientras nan tabata pasa nan vacacion riba e isla.^[10] Desde 1986 e tabata traha na e Departamento di Cultura y tabata e prome hende muhe pa organisa actividadnan despues di scol pa muchanan di scolnan básiko na Saint Martin.^[3] Ruby Bute tabata traha su obranan for di un studio na su cas na Friar’s Bay, Saint Martin.^[5][11]

Escritor

Bute su cuentanan cortico y poesia a enfoca riba asuntonan di hende muhe, particularmente e bida di hende muhe Afro-Caribense. Su prome coleccion di poesia, Golden Voices of S’maatin, a keda publica pa House of Nehesi Publishers na 1989 y ta ser considera e prome buki publica pa un hende muhe riba e isla di Sint Maarten.^[12][13] E tabata un bestseller riba e isla, bendiendo su prome imprenta den mas o ménos tres luna.[18] Un di dos coleccion, Floral Bouquet to the Daughters of Eve, a sigui na 1995.^[3][14] Un otro coleccion, Reflections, a keda publica na 2021.^[15] Na comienso di 2024 a sali su autobiografia Rising Spirit: The Autobiography of Lady Ruby Bute.

Bute tambe a aparece riba tarima como actriz den varios produccion teatral.^[16] Pa su storytelling e tabata uza varios medio, manera arte visual, poesia, musica y spoken word.

Bute a fayece dia 5 di november 2024, na edad di 81 aña.^[17][18] Na su morto, presidente di Conseho teritorial di Saint Martin, Louis Mussington, a bisa cu e artista “lo keda pa semper un simbolo cultural y spiritual di nos isla.”^[19]

Honor

Na 2004 Bute a ricibi un premio pa su obra completo for di Colectividad di Saint Martin.^[3] El a wordo honra cu un condecoracion den Orden di Oranje-Nassau na 2005.^[4] Na 2019, su pintura “185-Mile Winds,” cu ta describi e consecuencianan di horcan Irma, a wordo exhibi den varios edificio oficial na Den Haag, incluyendo e Tweede Kamer y Eerste Kamer di e legislatura Hulandes.^[20][21]