Етимология

Етимология як оддѣл языкознаня, гр. έτυμολογια < ετυμον истина, основне значѣня слова + λογος понятя, учѣня — наука, котра выгледуе походжѣня слова, а тыж историчны змѣны штруктуры слова и его значѣня.^[1]

Автор поуживать застарѣле значѣня слова «етимология» = фонетика + морфология

Не поплетьте з Етиология.

Иншы значѣня

Етимология може тыж означовати походжѣня слова, циже можеме повѣсти «етимология слова».^[2][1]

В XIX. сторочу в языкознаню термин «етимология» означовав тыж простый выклад граматикы, котрый переважно учив о звуках (фонетика), частях речи и будовѣ слов (морфология).^[2][1]

Методология

Етимология закладать ся на закономѣрностях звуковых змѣн, морфологичных змѣн слов. Операть ся на регуларны переходы такых ци иншакых типох лексичных единиць в иншы типы: метафоризация, метонимия, зужѣня и росширѣня значѣня слова.^[1] Такы змѣны и переходы суть зафиксованы в историчных жерелах, описаны и вызнаны независимыма ученыма, прото можеме етимологию посуджовати за помѣрно строгу науку, хоть в дакотрых припадах суть ей резултаты несполягливы и оспорьованы.

Народна етимология

Зачатки етимологии мож видѣти уже у Платона, в тот час появив ся и термин «етимология». Тота етимология але не основала ся на научных методах, лем на подобности слов. Днесь таку етимологию называють «народнов».^[2]

Напримѣр, народна етимология выводить назву села Сокырниця од властного имени Сокырка, на оправданя чого придумана и неправдоподобна легенда. Зась научна етимология одводить назву од «сокорина» (чорна тополя).^[3]

Жерела и одказы

• Жеребило Т.В.: Словарь лингвистических терминов. Изд. 5-е, испр. и доп. — Назрань: ООО «Пилигрим», 2010. – 486 с. ISBN 978-5-98993-133-0
• Языкознание. Большой энциклопедический словарь / Гл. ред. В. Н. Ярцева. — 2-е изд. — М.: Большая Российская энциклопедия, 1998. — 685 c. ISBN 5-85270-307-9
• Sebestyén Zsolt (2014-08-15). Máramaros megye helységneveinek etimológiai szótára (по мадярскы). MEK OSzK. http://mek.oszk.hu/13200/13208/index.phtml. [перевірено 2019-05-14].