Мадярскый язык

Мадярскый язык, мад. magyar nyelv — угрофинскый язык з родины уралскых, еден з угорскых языкох.

Мадярскый язык (magyar nyelv)
Ареал хоснованя языка
Ареал	Мадярщина, Румыния, Словакия, Сербия, Украина, Израел, Австрия, Хорватия, Словения
Число бесѣдникох	14 млн.
Класификация	Уралскы языкы Угрофинскы языкы Угорскы языкы
Графика	Латинка
Статус языка
Регулатор	Лингвистичный инштитут Мадярской Академии Наук (Magyar Tudományos Akadémia Nyelvtudományi Intézete)
Урядный статус	Мадярщина Европска уния Войводина регионалный язык: Словакия Словения Австрия Украина Румыния
Коды
ISO 639-1	hu
ISO 639-2	hun (B) hun (T)
ISO 639-3	не екзистуе
Етнология	HNG
Википедия
hu.wikipedia.org

Ареал и число бесѣдникох

Мадярскый язык мать главный ареал в Мадярщинѣ (над 10 млн. особ, 98% обывательства), в Румынии (по розличных шацованях — од 1,7 до 3 млн.), около 600 тыс. Мадярох жиють на територии Словакии, около 450 тыс. во Войводинѣ, десяткы тысяч — в Австрии.^[1] В Украинѣ жиють 156,6 тыс. Мадярох.^[2] (2001). Обще число мадяроязычных особ во свѣтѣ шацують на 14,5 млн.^[1]

Мадярскы меншины появили ся в державах, межуючых з Мадярщинов по року 1920, коли в резултатѣ Трианона, од Мадярщины были одняты ²/₃ ей територии.

Мадярскый язык — найвекшый зоз вшиткых уралскых языкох.^[1]

Родинскы языкы

Покля иде о язык, найблизшов родинов Мадярам суть Ханты и Манси, народы сѣверного Урала. Тото е их самоназва, а в царской России называли их одповѣдно Остяками и Вогулами.^[3] Подля днесь принятой класификации тоты три языкы творять групу угорскых языкох.

История

Мадяры принесли зо собов з уралской праотчизны много ирано-туркийскых слов, в конци ІХ. ст. занявши територию Карпатской котлины, перебрали много нѣмецкых, славянскых, талианскых и латинскых слов.^[3] Славянска лексика переважно газдовска, нѣмецка переважно военска и технична, латинска переважно умѣлецка и научна. Туркийска лексика додала ся еще в часѣ османской окупации (1526-1687) Мадярского кральовства. Мадярскый литературный язык сформовав ся трудами Петера Пазманя около року 1600,^[3] але урядным языком став ся аж в року 1836, перебравши тоту роль од латины.^[4] Од року 1844 став ся основным урядным языком (державным языком), дозволяючым хосновати меншиновы языкы в окремых припадах.

Але перед тым нико не зробив вецей про розвой и обновлѣня языка од двох Давидох Сабовох. Спочатку Давид Сабов Баровти склав Малый словник (Kisded Szótár, 1789), котрый быв написаный дактиловыма вершами, а пак в другом выданю в року 1792 вышов в формѣ звычайного выкладового словника, де автор подав найинтереснѣйшы стары и новы зобраны ним слова, а додав и диалектизмы. А до тых ещи додав и дакотры створены ним самым неологизмы, напр.: erény мад. цнота, szörnyeteg мад. потвора. А пак ещи в новинцѣ подав велике множество пословиць и пригварьок, чим зробив службу, доднесь не стратившу цѣнность. Од него намного майсмѣлый, але менше хосновливый быв Давид Сабов Барцафалви, котрый продуковав неологизмы, як фабрика, «на провбу», же най сполоченство рѣшить, котры прийме. Достав немилосердну критику, а з его щедрой продукции лем мизерна часточка зостала доднесь в поужитю.^[5]

Жерела и одказы

• Révai nagy lexikona. 1-21. köt. Révai Testvérek Irodalmi Intézet Részvénytársaság, Budapest. 1911–1935. Том 13, сс. 184-185. мад.
• A két Szabó Dávid. https://www.arcanum.com/en/online-kiadvanyok/MagyarIrodalom-magyar-irodalomtortenet-1/kepes-magyar-irodalomtortenet-beothy-zsolt-3180/az-irodalmi-megujhodas-kora-3AC5/52-a-nyelvujitas-tortenete-imre-sandor-3D17/i-3D18/a-ket-szabo-david-3D27/. [перевірено 2021-11-13].мад.
• Венгерский язык. // Большая Советская Энциклопедия. русс.
• Венгерский язык. //Энциклопедия Кругосветрусс.