Нарушеня нику

Нарушеня нику тото часточна вадь повна страта нику, можности видіти. Без лічіня ци помучных засобув ги корекційні аксесуары на очі, асистивных направ тай медичної помочи, нарушеня нику годно усложняти кажджоденні занятя, у тому числі читаня тай хожіня.^[1] Терміны слабозря́чость авадь сліпота́ часто ся хоснувут на такі нарушеня нику, котрі дуже тяжко ся кориґувут авадь не лічат ся домак тай читаво вливавут на кажджоденный жывут.^[2] Окрем фурташных нарушень сут дочасні, як наприклад amaurosis fugax (дочасна безбольова страта нику в окови), котрі указувут на серйозні проблемы из здоровльом.^[3][4][5]

Томмі Едісон, сліпый кінокритик, демонструє, як сліпый челядник годен сам паровати їдіня.

Майчастыма причинами нарушеня нику у світі сут рефракційні вады (43%), катаракта (33%) тай ґлавкома (2%).^[6] Межи рефракційными вадами сут близкорукость, далековидность, презбіопія тай астиґматізмус.^[6] Катаракта є майпошыренов причинов сліпоты. Сут ай другі розлады, котрі можут привести д проблемам из ником, наприклад макуларна деґенерація з роками, діабетична ретинопатія, замгленя рогувкы, сліпота у дітинстві тай шор інфекцій.^[7] Окрем того, нарушеня нику годні быти спричинені проблемами з мозґом, інсултами, передчасным рожденьом тай травмами.^[8]

Подля податкув ВООЗ, 80% нарушень нику пуддавут ся лічіню.^[6] На 2015. рук, 940 міліонув людий у світі мали якыйись ступінь страты нику.^[9] 246 міліонув были слабозрячі тай 39 міліонув — сліпі.^[6] Число трафункув нарушеня нику упало по 1990. роках.^[6]

Дефініція

У 2010. рокови ВООЗ поміняла дефініцію нарушеня нику тай теперь она ся збігат из дефініційов ICD-11, єденадцятої ревізії Межинародної класифікації бетегув.^[10]

Класифікація

На дистанції:

• Катеґорія 0: удсутноє вадь легкоє нарушеня нику — острота нику ліпша ги 6/18;
• Катеґорія 1: середньоє нарушеня нику — острота нику гурша ги 6/18 тай ліпша ги 6/60;
• Катеґорія 2: тяжкоє нарушеня нику — острота нику гурша ги 6/60 тай ліпша ги 3/60;
• Катеґорія 3: сліпота — острота нику гурша ги 3/60 тай ліпша ги 1/60;
• Катеґорія 4: сліпота — острота нику гурша ги 1/60 тай є сприятя світла;
• Катеґорія 5: сліпота — сліпота без сприятя світла.

Зблизка:

• Острота нику зблизка гурша ги N6 авадь M 0.8 при 40 см.

Украйина

В Украйині подля наказа Міністерства охороны здоровля № 561 за 05.09.2011 „Про затвердження Інструкції про встановлення груп інвалідності“^[11] тай постановы Кабінета Мініструв Украйины № 10 за 21.01.2015 „Про затвердження переліку анатомічних дефектів, інших необоротних порушень функцій органів і систем організму, станів та захворювань, за яких відповідна група [...]“^[12] сліпотов ся рахує „острота нику з переноснов корекційов менше 0.05 авадь концентричноє зуженя поля нику до 10 ґрадусув уд точкы фіксації.“

Причины

Майчасті причины нарушень нику по світови у 2010. рокови были:^[7]

1. Рефракційні вады (42%)
2. Катаракта (33%)
3. Ґлавкома (2%)
4. Макуларна деґенерація из роками (1%)
5. Замгленя рогувкы (1%)
6. Діабетична ретинопатія (1%)
7. Сліпота у дітинстві
8. Трахома (1%)
9. Невызначена причина (18%)

Майчасті причины сліпоты по світови у 2010. рокови были:^[7]

1. Катаракта (51%)
2. Ґлавкома (8%)
3. Макуларна деґенерація из роками (5%)
4. Замгленя рогувкы (4%)
5. Сліпота у дітинстві (4%)
6. Рефракційні вады (3%)
7. Трахома (3%)
8. Діабетична ретинопатія (1%)
9. Невызначена причина (21%)

Коло 90% людий из нарушенями нику жыют у розвивавучых ся крайинах.^[6] Макуларна деґенерація из роками, ґлавкома тай діабетична ретинопатія сут майчастыма причинами сліпоты у розвитых крайинах.^[13]

Ґалерія

• 
  Томмі Едісон, сліпый кінокритик, демонструє, як сліпый челядник годен сам паровати їдіня.
• 
  Довга складна бота
• 
  Сліпый чоловік из свойим псом-поводырьом у Брасілії, Бразилія.
• 
  Сліпа дівочка пытат мотор, обы почуствовати його форму, коло села Мана, Уттараханд, Індія.
• 
  Дівочка з нарушеньом нику улізат на скалу
• 
  Годинка про людий из нарушенями нику, из ґравірованьом брайльовым шрифтом

Ник. щи

• Інвалідность
• Паралімпійські бавища