Степан Клочурак

Степан Клочурак, *27. фебруар 1895, Чорна Тиса, Мадярске кральовство (днесь Украина)^[2][3] — †8. фебруар 1980, Прага Чехословакия (днесь Чехия), — политичный дѣятель, украинофил прочехословацкой ориентации.^[4][1]

Степан Клочурак
Премьер влады Гуцулской републикы
Во функции:
9. януар 1919 — 11. юн 1919
Предходник	не быв
Наступник	не быв
Секретарь кабинета А. Волошина[1]
Во функции:
26. октобер 1938 — 14. марец 1939
Президент	Едвард Бенеш
Министер обороны Карпатской Украины[1]
Во функции:
15. марец 1939 — 17. марец 1939
Предходник	не быв
Наступник	не быв
Уродив ся	фебруара 27., 1895(1895-02-27) Чорна Тиса, Мадярске кральовство
Умер	фебруара 8., 1980 (84 р.) Прага, Чехословакия
Шаржа	надпоручник

Освѣта и военчина

Выростав в многодѣтной селянской родинѣ. Выходив народну школ в селѣ (1901-1905)^[2], пак учив ся в безплатных пиаристичных гимназиях в Ужгородѣ (1906-1910) и Мараморошськой Сиготи (1910-1914).^[1]

В року 1915 мобилизованый до австро-мадярского войска, воевав на восточном и румынском фронтах, войну закончив в шаржи надпоручника в Празѣ, был свѣдком выголошѣня независимости Чехословакии 28. октобра 1918.^[4]

Гуцулска република

По навернѣню до Ясѣня быв на челѣ самоорганизованой Гуцулской Народной Обороны ( людовой милиции). 8. новембра 1918 зобрав в Ясѣню людове вѣче, котре выбрало Украинску Народну Раду, 12-членну Головну Управу зоз самым Клочураком на челѣ. Въедно з Иваном Климпушом навщѣвив владу ЗУЛР в Станиславовѣ (де передали декларацию о желаню подкарпатскых Гуцулох прилучити ся к Украинѣ). Мадярска влада М. Кароли на одпор взникаючым в Подкарпатской Руси народным радам скликала до Будапешту 10. децембра 1918 Русинскый зъѣзд, на котром доминовала промадярска Руска Народна Рада. Клочурак быв участник в работѣ того зъѣзда, выступив против плана автономии Подкарпатской Руси в рамках Мадярщины и пропоновав зобрати всерусинскый зъѣзд в Хустѣ. Участнив ся в приготовлѣню Мараморошского зъѣзда народных делегатох (Мараморош-Сигет, 18.12.1918), и быв выбраный за члена Мараморошской Руской Народной Рады (предсѣдатель, Ю. Бращайко, подпредсѣдатель А. Штефан). Подля рады влады ЗУЛР, як скушеный офицер, став на чело восстаня в Ясѣню 8. януара 1919, за котрым была выголошена Гуцулска република. Пробовав росширити ей територию путьом окупации Мараморош-Сигета але румынскым войском быв одтѣсненый назад.^[4][1]

Вызнамна роль Клочурака в истории Гуцулской републикы описана в трьох романах (украинскых од Василя Гренджѣ и Уласа Самчука и чешском од од Зденка Кудея).^[1]

Чехословацка доба

По падѣ Гуцулской републикы 12. юна 1919 быв арештованый и засудженый на 6 мѣсяци за организацию напада и пробу окупации Мараморош-Сигета. Зоз арешта неодовго быв выслободженый вдяка ородованю украинской дипломатичной мисии в Букарештѣ.^[4]

Клочурак в 1920-30-х роках веде активну политичну и новинарску чинность спочатку в социал-демократичной партии, а од року 1934 в провладной аграрно-републиканской (украинске крыло) и в товаришствѣ Просвѣта. По приходѣ до влады кабинета Волошина ставать ся секретарьом кабинета.^[1][2]

По выголошѣню самостойности Карпатской Украины 15. марца 1939 быв му звѣреный пост Министра обороны, але то зостало лем на папѣрю, бо еще тот день цѣла влада утѣкла перед наступаючым мадярскым войском до Прагы.^[1]

В маю 1945 Клочурак быв выявленый в Празѣ агентами СМЕРШа, арештованый и вывезеный до Москвы.

ГУЛаг и останок живота

Клочурак быв засудженый на 8 рокы за «антисовѣтску чинность» и одбывав кару в ГУЛагу (Воркута). По одбытю быв еще раз засудженый на вѣчне оселѣня во Воркутѣ. В року 1957 было му дозволене як чехословацкому подданому вернути ся до Прагы. Клочурак написав спомины и выдав перву часть в Ню Йорку (До волѣ, 1978; о роках 1919-1945). Коли то зробив, была му чехословацков безпеков з дому конфишкованы вшыткы материалы, так же дале не мог писати.^[2][4]

О его смерти не было дозволене ани ознамѣня в пресѣ. Быв регабилитованый посмертно 28. марца 1990.^[2]

Жерела и одказы

• Magocsi P.R., Pop I. (eds.). Encyclopedia of Rusyn History and Culture, University of Toronto Press ISBN 0-8020-3566-3 сс. 227-228.
• Довганич О.Д.: Клочурак Степан Степанович. //Енциклопедія Закарпаття. Визначні особи ХХ століття. Закарпатський осередок НТШ. Під наук. ред. Довганича О.Д. «Гражда». Ужгород, 2007. ISBN 978-966-8924-33-0 сс. 162-163.
• Поп, И. Энциклопедия Подкарпатской Руси. Ужгород: Изд-во В.Падяка, 2001. 431 с. ISBN 966-7838-23-4 сс. 207-208.
• Мушинка М.І: Клочурак Степан Степанович. //ЕСУ Енциклопедія Сучасної України (ФОТО)