அத்தம் (பஞ்சாங்கம்)

அத்தம் என்பது இந்திய வானியலிலும் சோதிடத்திலும் இராசிச் சக்கரத்தில் சொல்லப்படுகின்ற இருபத்தேழு நட்சத்திரக் கோணப் பிரிவுகளுள் 13 ஆவது பிரிவு ஆகும். இந்தியப் பஞ்சாங்க முறையில் சந்திரன் புவியைச் சுற்றி வரும்போது அத்த நட்சத்திரக் கோணப் பிரிவுக்குள் இருக்கும் காலம் அத்த நட்சத்திரத்துக்கு உரிய காலம் ஆகும். இந்திய சோதிடத்தின்படி, இந்தக் காலப் பகுதியில் பிறக்கும் ஒருவருடைய "பிறந்த நட்சத்திரம்" அல்லது "ஜன்ம நட்சத்திரம்" அத்தம் ஆகும்.

ஒவ்வொரு நட்சத்திரப் பிரிவும் 13° 20' அளவு கொண்டதாக இருப்பதால், பதின்மூன்றாவது நட்சத்திரமாகிய அத்தம் 160° 00'க்கும் 173° 20'க்கும் இடையில் அமைந்துள்ளது.^[1] இந்தப் பிரிவு 3° 20' அளவு கொண்ட நான்கு சமமான பிரிவுகளாகப் பிரிக்கப்பட்டுள்ளது. இப்பிரிவுகள் அத்தத்தின் முதலாம், இரண்டாம், மூன்றாம், நான்காம் பாதங்கள் எனப்படுகின்றன. இந்த நட்சத்திரம் முழுவதும் கன்னிராசியில் அமைந்துள்ளது.

பெயரும் அடையாளக் குறியீடும்

லியோ விண்மீன் கூட்டம்

இந்திய வானியலிலும் சோதிடத்திலும் நட்சத்திரப் பிரிவுகளுக்குரிய பெயர்கள் அவ்வப் பிரிவுகளில் காணும் முக்கியமான விண்மீன்கள் (நட்சத்திரம்) அல்லது விண்மீன் கூட்டங்களைத் தழுவி இடப்பட்டவை. இதன்படி அத்த நட்சத்திரப் பிரிவின் பெயர் அப்பிரிவுக்குள் காணப்படும் கோர்வசு விண்மீன் கூட்டத்தில் காணப்படும் ஐந்து நட்சத்திரங்களைக் கொண்ட அத்தத்தின் (α, β, γ, δ, ε கோர்வசு) பெயரைத் தழுவியது. அத்தத்தின் சமசுக்கிருதப் பெயரான ஹஸ்த (Hasta) என்பது "கை" என்னும் பொருள் கொண்டது. இதன் அடையாளக் குறியீடு "கை" ஆகும்.

சோதிடத்தில் அத்தம்

இயல்புகள்

இந்தியச் சோதிட நூல்கள் நட்சத்திரங்களோடு தொடர்புடையவையாகக் கருதப்படும் இயல்புகளைத் தேவதைகள், கோள்கள், விலங்குகள், பறவைகள், மரங்கள், இயற்கை மூலங்கள், சாதி, பால் போன்றவற்றின் மூலம் குறித்துக் காட்டுகின்றன. அத்த நட்சத்திரத்துக்குரிய மேற்படி இயல்புகள் பின்வருமாறு:^[2][3]

கோள்	சந்திரன்
தேவதை	சவித்தா
தன்மை	இலகு
சாதி	பிராமண சாதி
கோத்திரம்	அங்கிரா
பால்	ஆண்
குணம்	தேவ குணம்
இயற்கை மூலம்	நெருப்பு
விலங்கு	பெண் எருமை
பறவை	பருந்து
மரம்	ஆத்தி
நாடி	இடை