உத்தரட்டாதி (பஞ்சாங்கம்)

உத்தரட்டாதி என்பது இந்திய வானியலிலும் சோதிடத்திலும் இராசிச் சக்கரத்தில் சொல்லப்படுகின்ற இருபத்தேழு நட்சத்திரக் கோணப் பிரிவுகளுள் 26 ஆவது பிரிவு ஆகும். இந்தியப் பஞ்சாங்க முறையில் சந்திரன் புவியைச் சுற்றி வரும்போது உத்தரட்டாதி நட்சத்திரக் கோணப் பிரிவுக்குள் இருக்கும் காலம் உத்தரட்டாதி நட்சத்திரத்துக்கு உரிய காலம் ஆகும். இந்திய சோதிடத்தின்படி, இந்தக் காலப் பகுதியில் பிறக்கும் ஒருவருடைய "பிறந்த நட்சத்திரம்" அல்லது "ஜன்ம நட்சத்திரம்" உத்தரட்டாதி ஆகும்.

ஒவ்வொரு நட்சத்திரப் பிரிவும் 13° 20' அளவு கொண்டதாக இருப்பதால், இருபத்து ஆறாவது நட்சத்திரமாகிய உத்தரட்டாதி 333° 20'க்கும் 346° 40'க்கும் இடையில் அமைந்துள்ளது.^[1] இந்தப் பிரிவு 3° 20' அளவு கொண்ட நான்கு சமமான பிரிவுகளாகப் பிரிக்கப்பட்டுள்ளது. இப்பிரிவுகள் உத்தரட்டாதி நட்சத்திரத்தின் முதலாம், இரண்டாம், மூன்றாம், நான்காம் பாதங்கள் எனப்படுகின்றன. இந்த நட்சத்திரம் முழுவதும் மீன இராசியில் அமைந்துள்ளது.

பெயரும் அடையாளக் குறியீடும்

ஆன்ட்ரோமெடா விண்மீன் கூட்டம்

இந்திய வானியலிலும் சோதிடத்திலும் நட்சத்திரப் பிரிவுகளுக்குரிய பெயர்கள் அவ்வப் பிரிவுகளில் காணும் முக்கியமான விண்மீன்கள் (நட்சத்திரம்) அல்லது விண்மீன் கூட்டங்களைத் தழுவி இடப்பட்டவை. இதன்படி உத்தரட்டாதி நட்சத்திரப் பிரிவின் பெயர் அப்பிரிவுக்குள் காணப்படும் பெகாசசு விண்மீன் கூட்டத்திலும் ஆன்ட்ரோமெடா விண்மீன் கூட்டத்திலும் காணப்படும் இரண்டு நட்சத்திரங்களைக் கொண்ட உத்தரட்டாதியின் (γ பெகாசி மற்றும் α ஆன்ட்ரோமெடாய்) பெயரைத் தழுவியது. உத்தரட்டாதியின் சமசுக்கிருதப்பெயரான உத்தர பத்ரபாத (Uttara Bhadrapada) என்பது "இரண்டாவது ஆசீர்வதிக்கப்பட்ட பாதங்கள்" என்னும் பொருள் கொண்டது. இதன் அடையாளக் குறியீடு "கட்டிலின் இரண்டு கால்கள்", அல்லது "இரட்டையர்" ஆகும்.

சோதிடத்தில் உத்தரட்டாதி

இயல்புகள்

இந்தியச் சோதிட நூல்கள் நட்சத்திரங்களோடு தொடர்புடையவையாகக் கருதப்படும் இயல்புகளைத் தேவதைகள், கோள்கள், விலங்குகள், பறவைகள், மரங்கள், இயற்கை மூலங்கள், சாதி, பால் போன்றவற்றின் மூலம் குறித்துக் காட்டுகின்றன. உத்தரட்டாதி நட்சத்திரத்துக்குரிய மேற்படி இயல்புகள் பின்வருமாறு:^[2][3]

கோள்	சனி
தேவதை	அபிபுத்னு
தன்மை	நிலைத்த
சாதி	சத்திரிய சாதி
கோத்திரம்	கிருது
பால்	ஆண்
குணம்	மனித குணம்
இயற்கை மூலம்	ஆகாயம்
விலங்கு	பெண் மாடு
பறவை	கோட்டான்
மரம்	வேம்பு
நாடி	சுழுமுனை

உத்தரட்டாதி நட்சத்திரக்கோயில்

• தீயத்தூர் சகஸ்ரலட்சுமீஸ்வரர் திருக்கோயில்