2009 செயற்கைக்கோள் மோதல்

2009 செயற்கைக்கோள் மோதல் (2009 Satellite collision) அல்லது 2009 ஆம் ஆண்டின் விண்வெளி மோதல் என்பது 2009 ஆம் ஆண்டு விண்வெளியில் பூமியின் வட்டப்பாதையில் இரண்டு செயற்கைக் கோள்கள் மோதியதைக் குறிக்கிறது.^[1] 2009 பெப்ரவரி 10 ஆம் நாள் ஒருங்கிணைந்த அனைத்துலக நேரம் 16:56 க்கு பூமியிலிருந்து 789 கிலோமீட்டர்கள் உயரத்தில் சைபீரியாவின் நேர் மேலே இவ்விபத்து நேர்ந்தது.^[2] இவ்விபத்து பூமியின் தாழ் வட்டப்பாதையில் நடந்த ஒன்றாகும்.

மோதலில் ஈடுபட்ட இரண்டு செயற்கைக்கோள்கள்: இரிடியம் 33 (வெள்ளி மற்றும் தங்கம்) மற்றும் கோஸ்மோஸ் 2251 இன் டிஜிட்டல் ரெண்டரிங் (நீல உருளை)

விபத்தைக் காட்டும் படம்.

விபத்தை ஏற்படுத்தியவை

இரிடியம் 33 (Iridium 33) மற்றும் காச்மாசு-2251 ( Kosmos-2251) ஆகிய செயற்கைக்கோள்கள் மோதிக் கொண்டன^[3][4][5]. இவை இரண்டும் 42,120 கிலோமீட்டர்கள் வேகத்தில் ஒன்றுடன் ஒன்று மோதிக்கொண்டன.^[6][7] இதில் இரிடியம் செயற்கைக் கோள் இரிடியம் தொலைத்தொடர்பு நிறுவனத்திற்குச் சொந்தமானது. காச்மாசு 2251 ருசியாவிற்குச் சொந்தமானது.

விளைவுகள்

இம்மோதலில் இரண்டு செயற்கைக் கோள்களும் சேதமடைந்தன. இதில் காச்மாசு--2251 செயற்கைக் கோளானது ரஷ்யாவால் கைவிடப்பட்ட செயலிழந்த செயற்கைக் கோள் ஆகும். இரிடியம் 33 செயற்கைக் கோள் பயன்பாட்டில் இருந்தது. காச்மாசு--2251 செயற்கைக் கோள் 1995 லிருந்து பயன்பாட்டில் இல்லை. அமெரிக்காவின் நாசா நிறுவனம் இம்மோதலினால் 10 சென்றிமீட்டர்களுக்கும் அதிகமான 1,000 பொருள்கள் விண்வெளிக் கழிவுகளாக மாறின எனத் தெரிவித்துள்ளது.^[8] சூலை 2011 ல் அமெரிக்க விண்வெளிக் கண்காணிப்பு அமைப்பு 2,000 விண்வெளிக் கழிவுகள் என வகைப்படுத்தியுள்ளது.^[9]

செயற்கைக் கோள்கள்

மாதிரி இரிடியம் செயற்கைக் கோள்.

• கச்மாசு-2251 செயற்கைக் கோள் 1993 ஆம் ஆண்டு சூன் மாதம் 16 ஆம் தியதி ஏவப்பட்டது. இரண்டு வருடங்களில் 1995 ன் பிறபகுதியில் கைவிடப்பட்டது.இது 950 கிலோகிராம் எடையுடையது. இது ராணுவப் பயன்பாட்டிற்கானது.^[10][4]
• இரிடியம் 33 செயற்கைக் கோள் 1997 ஆம் ஆண்டு செப்டம்பர் மாதம் 14 ஆம் தியதி ஏவப்பட்டது. விபத்தின் போது இது பயன்பாட்டில் இருந்தது. இதன் எடை 560 கிலோகிராம்கள் ஆகும். இது தொலைத்தொடர்பு பயன்பாட்டிற்கானது.^[4]