అంజలీదేవి

అభినవ సీతమ్మగా పేరొందిన అంజలీదేవి (ఆగష్టు 24, 1927 - జనవరి 13, 2014) 1950-75 తరానికి చెందిన తెలుగు సినిమా నటీమణి, నిర్మాత.^[1] ఆమె అసలు పేరు అంజనీ కుమారి. ఆమె నర్తకి కూడా. తన నటనా జీవితాన్ని రంగస్థలంతో ప్రారంభించింది. ఆమె భర్త పి.ఆదినారాయణరావు తెలుగు సినిమా రంగములో సంగీత దర్శకుడు. సినీరంగానికి చేసిన సేవలకు గాను అంజలీ దేవి 2006లో రామినేని ఫౌండేషన్ వారి విశిష్ట పురస్కారము,^[2] 2007లో మాధవపెద్ది ప్రభావతి అవార్డును అందుకున్నది.

అంజలీదేవి
జన్మ నామం	అంజనీ కుమారి
జననం	(1927-08-24)1927 ఆగస్టు 24 ఆగష్టు 24, 1927 పెద్దాపురం, తూర్పు గోదావరి జిల్లా
మరణం	2014 జనవరి 13(2014-01-13) (వయసు: 86) చెన్నై, తమిళనాడు
భార్య/భర్త	పి.ఆదినారాయణరావు
ప్రముఖ పాత్రలు	లవకుశ చెంచులక్ష్మి శ్రీ లక్ష్మమ్మ కథ

అంజలీదేవి చిత్రపటం

బాల్యం

అంజలీదేవి 1927, ఆగష్టు 24న తూర్పు గోదావరి జిల్లా, పెద్దాపురంలో జన్మించింది.^[3] ఆమె చిన్నప్పటి పేరు అంజనీ కుమారి. సినిమా ప్రస్థానంలో దర్శకుడు సి. పుల్లయ్య ఆమె పేరు అంజలీ దేవిగా మార్చాడు.^[4]

చిత్ర సమాహారం

నటిగా

1936లో రాజా హరిశ్చంద్రలో అంజలీదేవి చిన్న పాత్రతో పరిచయమైంది. ఆ తరువాత కష్టజీవిలో నాయికగా నటించింది. లవకుశలో ఎన్.టి. రామారావు సరసన నటించిన సీత పాత్ర మంచి పేరు తెచ్చిపెట్టింది. ఆ పాత్ర అప్పటి గ్రామీణ మహిళలను బాగా ప్రభావితం చేసింది. ఆమె కొన్ని గ్రామాలను సందర్శించడానికి వెళితే కొంతమంది ఆమెను నిజమైన సీతాదేవిగా భావించి మోకరిల్లిన సందర్భాలున్నాయని 1996లో ఒక వార్తా పత్రిక ముఖాముఖిలో పేర్కొన్నారు.^[5] సువర్ణసుందరి, అనార్కలిలో ఆమె నటన మన్ననపొందింది. దాదాపు 500 తెలుగు, తమిళ, కన్నడ చిత్రాలలో నటించింది. బృందావనం (1992), అన్న వదిన (1993), పోలీస్ అల్లుడు (1994) ఆమె నటజీవితంలో చివరి చిత్రాలు.

నిర్మాతగా

ప్రధాన వ్యాసం: అంజలీ పిక్చర్స్

అనార్కలి (1955) లో అంజలీదేవి నాయికగా అక్కినేని నాగేశ్వరరావు జతన నటించిన సినిమాను నిర్మించింది. ఆ తరువాత భక్త తుకారాం (1973), చండీప్రియ (1980) నిర్మించింది. చండీప్రియలో జయప్రద నాయికగా శోభన్ బాబు, చిరంజీవి లతో నటించింది. మొత్తం ఈ సంస్థ 27 సినిమాలు నిర్మించింది.

కుటుంబం

ఆమె భర్త సంగీత దర్శకుడు ఆదినారాయణ రావు. ఆమెకు ఇద్దరు కుమారులు.

కొన్ని ముఖ్యమైన చిత్రాలు

ప్రధాన వ్యాసం: అంజలీదేవి నటించిన సినిమాల జాబితా

సంవత్సరం	సినిమా పేరు	భాష	పోషించిన పాత్ర	విశేషాలు
1936	రాజా హరిశ్చంద్ర	తెలుగు	లోహితాస్యుడు	అంజలీదేవి నటించిన మొదటి సినిమా
1949	కీలుగుర్రం	తెలుగు	మోహిని (రాక్షసి)	అక్కినేని మొదటి సినిమా.
1950	శ్రీ లక్ష్మమ్మ కథ	తెలుగు	లక్ష్మమ్మ
1950	పల్లెటూరి పిల్ల	తెలుగు	శాంత	అక్కినేని; ఎన్టీయార్ కలిసి నటించిన తొలి సినిమా
1953	పక్కయింటి అమ్మాయి	తెలుగు	లీలాదేవి, పక్కింటమ్మాయి	రేలంగి నటించిన ప్రముఖ హాస్యచిత్రం.
1954	పెన్	తమిళం
1955	అనార్కలి	తెలుగు	అనార్కలి
1957	సువర్ణ సుందరి	తెలుగు	దేవకన్య సువర్ణసుందరి
1958	చెంచులక్ష్మి	తెలుగు	చెంచులక్ష్మి/లక్ష్మీదేవి
1959	జయభేరి	తెలుగు	మంజువాణి	మంచి సంగీతభరిత చిత్రం.
1962	భీష్మ	తెలుగు	అంబ	ఎన్టీయార్ భీష్మునిగా నటించిన భారతకథ.
1963	లవకుశ	తెలుగు	సీతాదేవి	ఘనవిజయం సాధించిన చిత్రం.
1967	భక్త ప్రహ్లాద	తెలుగు	లీలావతి	రోజారమణి ప్రహ్లాదునిగా నటించిన చిత్రం భక్తి చిత్రం
1972	బడిపంతులు	తెలుగు	ఎన్టీయార్ భార్య	ఎన్టీయార్ బడిపంతులుగా నటించిన సందేశాత్మక చిత్రం
1973	తాతా మనవడు	తెలుగు	సీత, రంగయ్య భార్య	దాసరి దర్శకత్వంలోని సందేశాత్మక చిత్రం.
1975	సోగ్గాడు	తెలుగు	శోభన్‌బాబు తల్లి
1976	మహాకవి క్షేత్రయ్య	తెలుగు
1978	అన్నాదమ్ముల సవాల్	తెలుగు	అన్నదమ్ముల తల్లి	కృష్ణ, రజనీకాంత్ నటించిన ఏక్షన్ సినిమా.
1980	చండీప్రియ	తెలుగు		శోభన్ బాబు, చిరంజీవి నటించిన హిట్ చిత్రం.
1985	శ్రీ షిర్డీ సాయిబాబా మహత్యం	తెలుగు	బాయీజా బాయ్	విజయచందర్ నటించిన షిర్డీ సాయి జీవితచరిత్ర.
1992	బృందావనం	తెలుగు	రాజేంద్రప్రసాద్ తల్లి	మంచి కుటుంబ కథాచిత్రం

పురస్కారాలు

ఫిలింఫేర్ అవార్డ్

• ఉత్తమ నటి - తెలుగు - అనార్కలి (1955)
• ఉత్తమ నటి - తెలుగు - సువర్ణ సుందరి (1957)
• ఉత్తమ నటి - తెలుగు - చెంచు లక్ష్మి (1958)
• ఉత్తమ నటి - తెలుగు - జయభేరి (1959)
• ఆచార్య నాగార్జున విశ్వవిద్యాలయం నుండి గౌరవ డాక్టరేట్.
• రఘుపతి వెంకయ్య పురస్కారం - 2005 లో తెలుగు సినీరంగం జీవితకాల సాఫల్యత గురించి.
• రామినేని పురస్కారం - 2006.
• ANR జాతీయ పురస్కారం - 2008.

మరణం

అంజలీ దేవి చెన్నైలో జనవరి 13, 2014 న, 86 సంవత్సరాలు వయస్సులో మృతి చెందారు.^[6]

ఇవీ చూడండి

• అంజలీదేవి నటించిన సినిమాల జాబితా