Nike

Ang Nike, Inc. (opisyal na binibigkas bilang NAY-ki, pero minsang binibigkas bilang nayk^[4]) ay isang korporasyong multinasyonal na nakabase sa Amerika na nagdidisenyo, lumilinang, gumagawa at nagsasamerkado ng kasuotan, kagamitan at serbisyo na kalimitan ay may kinalaman sa palakasan. Nakabase ang kumpaniyang ito sa Beaverton, Oregon sa kalakhang Portland. Isa ito sa pinakamalaking tagatustos ng mga sapatos at damit pampalakasan^[5] at malaking tagagawa ng mga kagamitang pampalakasan, na may kita ng lagpas ng US$24.1 bilyon sa taong piskal 2012 (nagtatapos sa 31 Mayo, 2012). Mayroon itong mahigit sa 44,000 mga trabahador sa buong mundo. Nagkakahalaga ang tatak lamang ng $10.7 bilyon, kaya isa ito sa mga tatak na may pinakamalaking halaga sa negosyo ng palakasan.^[6]

Nike, Inc.

Uri	Publiko
Nagnenegosyo bilang	NYSE: NKE Dow Jones Industrial Average Component S&P 500 Component
Industriya	Kasuotan, mga accessories
Itinatag	1964 (bilang Blue Ribbon Sports)[1] 1971 (bilang Nike, Inc.)
Nagtatag	Bill Bowerman Phil Knight
Punong-tanggapan	Washington County, Oregon, Estados Unidos (malapit sa Beaverton, Oregon)
Pinaglilingkuran	Buong daigdig
Pangunahing tauhan	Phil Knight (Chairman) Mark Parker (Pangulo at CEO)
Produkto	Kasuotang pangyapak at damit pampalakasan, kagamitan sa palakasan at iba pang mga produktong atletiko at panlibangan
Kita	US$25.3 bilyon (FY 2013)[2]
Kita sa operasyon	US$3.040 bilyon (FY 2012)[3]
Netong kita	US$2.223 bilyon (FY 2012)[3]
Kabuuang pag-aari	US$15.465 bilyon (FY 2012)[3]
Kabuuang equity	US$10.381 bilyon (FY 2012)[3]
Dami ng empleyado	44,000 (2012)[3]
Websayt	nikeinc.com

Itinatag ang kumpaniyang ito noong 25 Enero, 1964, bilang Blue Ribbon Sports nina Bill Bowerman at Phil Knight, at opisyal itong naging Nike, Inc. noong 30 Mayo, 1971. Hinango ang pangalan ng kumpaniya mula kay Nike, (Griyego Νίκη, bigkas [nǐːkɛː]) isang Griyegong diyosa ng tagumpay. Sinasamerkado ng Nike ang mga produkto nito sa ilalim ng kaniyang sariling tatak, gaya ng Nike Golf, Nike Pro, Nike+, Air Jordan, Air Force 1, Nike Dunk, Foamposite, Nike Skateboarding at ang mga sangay nito tulad ng Brand Jordan, Hurley International at Converse. Pagmamay-ari din ng Nike ang Bauer Hockey (na pinangalan muli bilang Nike Bauer) sa pagitan ng 1995 at 2008, at dating nagmamay-ari sa Cole Haan at Umbro.^[7] Liban sa mga kasuotan at kagamitan sa palakasan, nagpapatakbo din ang kumpaniya ng mga tindahan sa ilalim ng pangalang Niketown. Iniisponsor din ng Nike ang maraming mga sikat na atleta at mga koponan sa isports sa buong mundo, nay may kasamang mga kilalang-kilalang mga trademark na "Just Do It" (Gawin mo lang) at ang logong Swoosh.