Tom Cruise
From Wikipedia, the free encyclopedia
Remove ads
Tom Cruise, (Syracuse "New York", 3 de łujo 1962), el ze un ator e produtor statunitense.
Ła rivista Forbes ło clasifega come una de łe sełebrità piasè famoze al mondo inte'l 2006[1]. Inte ła só carièra da ator el za stà candidà par tre volte ai Premi Oscar, inte ła categoria de mejo ator protagonista par Nato il quattro luglio e Jerry Maguire e de mejo ator non protagonista par Magnolia, vinsendo tre Golden Globe par i tre film sità[2]. Ła major parte de ła critica sinematogràfega ło considara tra łe pì grande star de l''action de senpre[3].
El só primo gran suceso el ze stà el film del 1983 Risky Business - Fuori i vecchi... i figli ballano[4], che'l ze stà descrivesto "un clàsego de ła Zenarasion X e el prensipio de na cariera costrutiva" par l'atore[5]. L'economista Edward Jay Epstein el sostien che Cruise el sia uno dei pochi produtori (i altri i ze George Lucas, Steven Spielberg e Jerry Bruckheimer) che i ze stài capasi de garantir el suceso de un miłiardo de dołari. Da'l 2005 Cruise e Paula Wagner i ze stà nomenài responsabiłi de ła United Artists Studio: Cruise come produtor e Wagner come cao ezecutivo[6]. L'ator l'è anca conosùo par ła só adezion e el sostenjo a Scientology. Łe so notevołi critiche pùbleghe inte i cofronti de ła psichiatria e de l'uzo de farmaci anti-depresivi łe ga susità połemiche e intarese da parte dei media.
Remove ads
Biografia
El ze nasesto el 3 de łujo 1962 a Syracuse, New York,[7] fioło de Mary Lee Pfeiffer, na insenjante de educasion fìzega, e de Thomas Cruise Mapother III, un izenjer ełetrònego morto de cancro inte'l 1984; i só zenitori i ga devorsià co łu el gavea 11 ani. [8] El ga orìzeni inglezi, irlandezi e todesche,[9] derivanti da i só biznoni paterni, William Reibert e Charlotte Louise Voelker; e, prezumibilmente, anca na derivasion da'l Galles da'l só trisavoło paterno, Dylan Henry Mapother, el cuało el ze emigrà da Flint, in Galles, a Louisville, inte'l Kentucky inte'l 1850. El ga do sorèłe, una mazor, Lee Anne, nasùa a Louisville, e n'altra minor, Cass, nasùa a Syracuse. Alto 169 sentimetri, vezetarian, Cruise el ze cuzìn de primo grao de l'ator William Mapother (el nome de Cruise el ze infati Thomas Cruise Mapother IV), che'l ze aparìo insenbre co łu in sìncue film.
El ga frecuentà ła scoła pùblega "Robert Hopkins" par i grai 3, 4 e 5 e ła scòła mèdia "Henry Munro" par el grao 6, a Gloucester, deso Ottawa, inte l'Ontario.[10] Co'l ga avùo 7 ani A ghe ze stà dianjostegà na forma pìtosto seria de dizlesia, che ła ga mejorà co l'età adulta. Ła fameja ła ga visùo inte'l soborgo Gloucester de Beacon Hill, só pare l'è devenjesto consułente de Defeza par łe forse armàe canadezi. Cruise el ze entrà presto inte'l teatro de ła scoła "Robert Hopkins", co ła suparvizion de l'insenjante George Steinburg.[11]
Mentre che'l se ałenava par partesipaar a na conpetision łocałe de wrestling, el ga desidesto de pèrdar pezo par poder rientrar inte łe categorie previste da ła gara, corendo suzo e zozo par łe scałe de caza. Un zbrison el ghe ga cauzà ła łezion de un téndene e Tom el se ga interesà ad altre atività. El ga desidesto cuindi de proar a partesipar a na produsion scołàstega de Bulli e Pupe. Tom s'a mostrà a l'altesa de'l ròło de Nathan Detroit e in cheł'ocazion el ga tirà fora el tałento che'l sarìa stà drioman ła ciave de'l só suceso. El ga desidesto cuindi de trasferirse a New York par deventar ator e'l pare ghe ga domandà: "Cuanto me costarà tuto ciò?".[12] El se ga trasferìo cuindi a New York a l'età de dizisete ani e el se ga prometesto de devenjer famozo rentro tre ani. Grasie a ła só intarpretasion in Bulli e Pupe el ga avesto el só primo azente; Tobe Gibson che'l ghe ga consejà el nome d'arte Tom Cruise.
Remove ads
Cariera
A New York el se ga iscrivesto a i corsi serałi de ła scoła de resitasion "Neighborhood Playhouse", el viveva so un partamento in condivizion sercando de zbarcar el łunario co łaoreti. A'l renovo de'l contrato, el ga desidesto de canbiar azente. El só novo azente el ło ga fazesto zvołar a Los Angeles par el casting de na sit-com e drioman el ło ga fato aparir in Amore senza fine, de Franco Zeffirelli, che l'è stà l'ezordio sinematogràfego de Cruise.
El ga scominsià a chel ponto na cariera da fotomodeło, col se ga incorzesto parò che diverse só foto łe zera finìe in un zornal gay, el ga mołà de far chel łaor, che'l ghe garantiva na serta entrada. Tom el ga desidesto de tornar a Glen Ridge, ma prima el ga fato un provin par Taps - Squilli di rivolta, indove el ga interpretà David Shawn par vołer de'l produtor Stanley Jaffe e ze stà par łu el só primo roło inportante. Tom el ze stà convinto da'l só azente a interpretar inte'l 1982 Un week-end da leone - Una gita da sballo, comedia sexy vietada a i minori. El film parò no'l ze stà ben acołiesto né da ła critica né da'l pùblego. Tom el se ga trasferìo a Los Angeles e el ga firmà un contrato co un novo azente, Paula Wagner. El ga partesipà cuindi a'l cast par el film I ragazzi della 56ª strada de Francis Ford Coppola e el se ga zudegà l'interpretasion de Steve Randle. El ga fazesto po' un provin par Risky Business - Fuori i vecchi... i figli ballano otenjendo el só primo roło da protagonista e na serta notorietà. Inte'l 1983, so'l set de Risky Business, el ga conosesto Rebecca De Mornay, co ła cuała el ga avesto na rełasion de sirca do ani.
Dopo aver interpretà inte'l 1985 Jack in Legend de Ridley Scott, ghe ze stà proponesta ła parte de'l tenente Pete "Maverick" Mitchell in Top Gun de Tony Scott inte'l 1985, film grasie a'l cuało el ze deventà na star, e inte'l steso ano el se ga azudegà ła Walk of Fame. Top Gun el ze stà canpion de incasi inte'l 1986 e el ga stabiłio el record de prenotasion par l'acuisto de'l VHS. Inte'l 1986 el ze protagonista, co Paul Newman, inte Il colore dei soldi. Inte'l 1988 el interpreta el film Cocktail, suceso de critica e de pùblego. Senpre inte'l steso ano el ze protagonista, insieme co Dustin Hoffman, in Rain Man - L'uomo della pioggia. Inte'l film Cruise el interpreta Charlie Babbit, inprenditor e vendidor de auto da corsa, che'l descoverze de aver un fradeło autìstego. A ze el 1989 l'ano inte'l cuało Tom el vien consacrà come ator versatiłe e de gran tałento. Infati l'interpretasion de'l veteran de'l Vietnam Ron Kovic in Nato il quattro luglio de Oliver Stone, ghe vałe un Golden Globe come mejo ator e ła só prima nomination a'l premio Oscar.
Inte'l 1990 ła rivista People ła ło clasifega cofà l'uomo vivente pì sexy de l'ano, a l'età de 28 ani. Tom Cruise, considarà da un mucio de parsone l'omo pì beło de'l mondo, el sèvita ła só carièra intarpretando rołi co łe sfasetadure asè difarenti. A i inisi de i ani novanta, so'l set de Giorni di tuono, Cruise conose Nicole Kidman, che ła deventarà só mujer e co ła cuała el łaorarà inte'l film Cuori ribelli. Inte i ani drio, Tom el resita in film de stragrando suceso, cofà Codice d'onore, darente a Jack Nicholson e Demi Moore, Il socio de Sydney Pollack e Intervista col vampiro, indove el resita in copia co Brad Pitt.
Verso ła metà de i ani nonanta, Cruise el ze romai uno de i a tori pì cuotài de Hollywood e el torna a zbancar i boteghini come l'azente Ethan Hunt in Mission: Impossible de Brian De Palma. Sénpre inte l'isteso ano el ze protagonista de'l film sportivo Jerry Maguire, indove el interpreta un manager che'l ze drio fałir. 'Sta interpretasion ła ghe fa vadanjar ła só segonda nomination a l'Oscar come mejo ator protagonista. El 16 de łujo 1999 vien fora inte łe sałe Eyes Wide Shut, ùltemo film de'l rezista Stanley Kubrick e interpretà da Tom Cruise e da só mujer Nicole Kidman. Ła łaorasion de'l film ła ze durà ben tre ani, fasendoghe renonsiar a'l roło de protagonista in Matrix.[13] Sénpre inte'l 1999 l'interpretasion de'l guru misogino in Magnoliała ghe fa reséver ła tersa nomination a l'Oscar (ła prima come mejo ator non protagonista) e'l só terso Golden Globe, senpre inte ła categoria "mejo ator non protagonista".
Inte'l 2000 el zira el sèvito de Mission: Impossible e l'ano drio Vanilla Sky. Inte'l 2002 el zira Minority Report de Steven Spielberg, traesto da l'omonèmo romanzo de Philip K. Dick e'l conta el documentario Space Station 3D. Inte'l 2003 el ze stà protagonista in L'ultimo samurai, par ła rezìa de Edward Zwick. Dopo Collateral inte'l 2004, ła cubia Cruise-Spielberg ła dà vita a La guerra dei mondi (2005). Inte'l 2006, el reprende el só roło de Ethan Hunt inte'l terso capitoło de ła serie Mission: Impossible, mentre inte'l 2007 el zira Leoni per agnelli co Meryl Streep, direto e interpretà da Robert Redford, el 19 de łujo ghe ze el primo ciak de'l film Operazione Valchiria direto da Bryan Singer, sidià da racuante połèmeghee revardo a ła só intepretasion de'l cołoneło [Claus von Stauffenberg]] che'l tramacia par copar Hitler. Inte'l 2008 vien fora Tropic Thunder, co un cameo de Cruise che'l interpreta ła parte de un produtor sinematogràfego, Les Grossman.
Inte'l 2006 vien publegà ła biografia non autorizada Tom Cruise: L'uomo e l'attore a firma de'l critico siematogràfego ingleze Iain Johnstone; par festejar i trent'ani de carièra, l'8 de majo 2008 vien metesto online el só sito ofisiałe.
Inte'l 2010, Cruise el scominsia łe repreze de ła comedia d'asion Innocenti bugie, in conpanjia de Cameron Diaz e i do torna a resitar insieme dopo Vanilla Sky de'l 2001. Senpre inte'l 2010 l'ator el conferma che'l interpretarà par ła cuarta volta el roło de l'azente Ethan Hunt, in Mission: Impossible - Protocollo fantasma. El film el ze un suceso, incasando tanto de pì de i altri tri epizodi, deventando anca par l'ator el film de mazor incaso da łu intarpretà. A l'inisio de'l 2012 Tom Cruise el entra par primo inte'l cast de'l film Rock of Ages, inte'l roło de ła rockstar Stacee Jaxx, adatamento de'l musical omònemo direto da Adam Shankman e produzesto da New Line/Warner Bros., venjesto fora in Italia el 20 de zunjo 2012. Senpre inte'l 2012 l'ator el ze protagonista de'l film Jack Reacher - La prova decisiva ciapà da'l romanzo La prova decisiva de Lee Child, vegnesto fora inte łe sałe italiane el 3 de zenaro 2013.
Inte'l 2012 Tom Cruise el ze deventà l'ator pì pagà de Hollywood, avendo vadanjà in tuto l'ano 75 miłion de dołari e batendo Leonardo DiCaprio che se ga clasifegà segondo[14]. Ad apriłe 2013 l'ator el ze stà so i grandi schermi co'l film Oblivion, scrivesto e direto da Joseph Kosinski. Inte'l 2014 el ze el protagonista de'l film Edge of Tomorrow - Senza domani in conpanjia de l'atora Emily Blunt, el film ze l'adatamento sinematogràfego de ła light novel All You Need Is Kill, scrivesta da Hiroshi Sakurazaka inte'l 2004. Senpre a l'inisio de'l 2014 Tom Cruise el anunsia l'usìda de un cuìnto capitoło de ła saga Mission: Impossible, co ła rezìa afidà a Christopher McQuarrie.
Inte'l 2015 invese l'ator el finise de zirar un thriller da'l titoło Barry Seal - Una storia americana direzesto da Doug Liman che'l sarà inte łe sałe soło inte'l 2017; senpre inte'l 2015 el taca zirar el sequel de Jack Reacher - La prova decisiva co 'sta volta a ła rezìa Edward Zwick, che'l gaveva za łaorà a ła rezìa co Tom inte'l film L'ultimo samurai, ła cui data d'usìda ła ze el 21 de otobre de'l 2016 e s'intitoła Jack Reacher - Punto di non ritorno. Pardepì, inte'l 2017, el protagonista inte'l film La mummia, reboot de l'omònemo film de'l 1999 direzesto da Stephen Sommers e produzesto da ła Universal Pictures.[15] Inte l'agosto de l'isteso ano el vien insarìo da ła rivista Forbes a'l sètemo posto de i atori pì pagà, co un introito de 43 miłion de dołari.[16] Inte'l 2018 el torna a vestir i pani de Ethan Hunt inte'l sesto capitolo de ła saga de Mission Impossible, da'l titoło Mission: Impossible - Fallout. Durante łe repreze l'ator el ga ciapà łesion de voło e'l ga zirà łu isteso łe sene sensa bezonjo de stuntman.[17]
Remove ads
Vita privà
El 9 de majo 1987 el se ga spozà par ła prima volta co l'atora Mimi Rogers. Seguase de ła rełijon de Scientology, A ze tanto probabiłe che ze stà propio Rogers a convinser el consorte ad aderir a 'sto credo, sielta cuesta che Cruise ga confermà anca dopo el divorsio, avegnùo el 4 de febraro del 1990.
Notasion
Wikiwand - on
Seamless Wikipedia browsing. On steroids.
Remove ads