江湾跑马厅

江湾跑马厅，又叫江湾跑马场、万国体育场，是上海历史丄一座跑马场。^[1]

历史

因为一开始，上海跑马厅只允许外国人参与，外加叶贻铨申请加入上海跑马总会两趟侪畀总会拒绝，故咾伊自家去开跑马厅。叶贻铨帮虞洽卿勒垃1909年集钞票，勒垃江湾乡投资造仔江湾跑马厅，允许中国人参加赛马。江湾跑马厅个位置勒垃现在东到政民路、西到仁德路、南到纪念路、北到政立路，中心勒垃武川路、武东路路口。投资方还勒垃跑马厅东、南、西3只方向铺仔3条马路：去江湾火车站个叫体育会路、去上海北站方向个叫西体育会路，去虹口公园方向个叫东体育会路。江湾跑马厅伊辰光有跑马场地、看台、高尔夫球场、网球场、棒球场、大自鸣钟。为咾让参加赛马、看赛马比赛个游客有只好休息个地方，叶贻铨特谓造仔叶家花园。^[1][2]

跑马场1910年动工。1911年5月6号，江湾跑马厅开业。开业当天，跑马厅请来法国飞行师勒内·瓦隆开仔部单翼机勒垃场里向进行飞机表演。^[3]

江湾跑马厅成立以后设立董事会，虞洽卿做第一任董事长，叶贻铨做副董事长。为仔同上海跑马厅竞争，江湾跑马厅吸收外国股东，万国体育会（上海运动事业基金董事会）成为江湾跑马厅顶大个股东，江湾跑马厅改名万国体育场，必过大家还是叫伊“江湾跑马厅”。^[1]1917年、1924年，江湾跑马厅扩建两趟，增加看台搭办公大楼。^[4]。一二八事变个辰光，江湾赛马场个活动弗得弗暂停，借上海跑马场进行比赛。1935年，江湾赛马场重新运营。^[5]

淞沪会战爆发，江湾跑马场活动又停哉。1938年，上海跑马总会接收万国体育会个所有财产，江湾跑马厅变成上海跑马总会个。弗过因为万国体育会拖欠银行贷款，1939年2月10号，江湾跑马场弗得弗卖畀日本人公司上海恒产株式会社，变成日本人个农场。中国抗日战争结束以后，江湾跑马场收归国有，中华民国农林部、联勤总司令部接收。上海战役以后，工厂、学堂勒垃江湾跑马厅旧址丄办厂、建校，江湾跑马厅旧址分别畀上海自行车三厂、上海手表三厂、江湾机械厂、上海建筑材料工业学院占用脱。江湾跑马厅个看台、钟楼遗址曾勒垃江湾机械厂里向。^[1]2000年初，江湾机械厂旧址造出来只“三湘世纪花城”个小区，江湾跑马厅旧建筑侪拆光哉。^[6]