上海公共租界越界造路

上海公共租界越界造路（英语：extra-settlement roads）是上海公共租界勒拉伊管理范围以外修路，进而事实上获得路两边一定个行政管辖权个，依附拉租界浪个“准租界”区域。同正式租界区弗一样，公共租界当局勒拉越界造路区域里向，只对道路沿线有警务权，并对同路相关个服务收税收钞票，个块区域个其他行政权还是归中国政府个。

上海公共租界越界造路从太平天国战争个辰光，也就是1860年代开始个，有名个有静安寺路（Bubbling Well Rd.）、新闸路（Sinza Road）、极斯非而路（Jessfield Road）、卡德路（Carter Road）等。1899年上海公共租界大扩展以后，绝大部分越界造路已经并进租界里向哉。但1901年开始，租界貤开始向外头大规模越界造路，准备拿伊拉也并进租界，扩大租界个范围。

19世纪末20世纪初，上海法租界也有弗小个越界造路区，但1914年，上海法租界获得越界造路区个警务权搭税收权，实际上就是法租界大规模扩张，拿所有越界造路区侪吃进去哉。故咾，上海公共租界也计划再次扩张，想拿沪杭铁路以东个越界造路侪吃进租界范围。必过袁世凯政府因承认“二十一条”畀群众铲唻猪头三，伊呒没批准个个租界拓展个合同。碰巧英国政府全力参加第一次世界大战咾，个一大片越界筑路区一直是特殊个“准租界”状态。

20世纪上海公共租界个越界造路包括2大部分：沪西、沪北。拢总修仔靠40条大小马路，当中沪西28条。越界造路顶西面个地方（虹桥路西端）距离公共租界西部边界（静安寺附近）已有靠十公里。所有越界修个路圈出来个区域拢总有47000亩（31平方千米），超过正式租界个面积（33503亩，合22平方千米）。

1925年五卅运动后，大规模越界造路再结束。