太平天国
From Wikipedia, the free encyclopedia
Remove ads
太平天國（上海閒話吳語拼音：Tha-bin thi-koq）是立在清朝後期個咸豐帝到同治帝統治當中，勒拉滿清帝國南面個廣西爆發個族群色彩宗教暴動。迭個運動個領導人物是廣東客家人洪秀全。之所以叫太平天國，是因為伊認為可以依靠自家個拜上帝教，立在凡間建立烏托邦式樣個理想鄉。迭個運動參考過基督教個一些思想，不過洪秀全拿基督教教義為己所用，已經成為一種新個宗教。立在1850年，因為土客鬥爭失敗，大量客家人加入拜上帝會。引發官府重視，1850年末，洪秀全立在廣西桂平縣金田村造反，宣布要斬殺閻羅妖。之後，洪秀全搭伊個信徒向東流竄，先後立在廣東搭湖南畀當地個鄉紳武裝擊敗，之後順湘江到洞庭湖，突擊武昌成功，並順流南下到江南地區。1853年3月19號，太平天國攻陷江寧府，拿此地改名天京，當做自家個首都。之後出兵對長江中游進行劫掠，伊拉所到之處，無論男女老幼，弗是殺脫，就是裹挾到自家個營盤當中進行宗教汏腦，當做日後個炮灰。1853年底，曾國藩訓練個湘軍開始搭太平天國交戰。1856年，洪秀全集團內部矛盾總爆發，釀成所謂個天京事變。楊秀清、韋昌輝先後畀人殺脫，石達開出走。之後太平天國聲勢大減，拿注意力放到吳越地區。1857年開始，依靠四眼狗陳玉成搭李秀成，開始分別對江東地區搭兩浙開始劫掠。箇當中，因為上海租界存在個關係，大量蘇南個鄉紳得到避風港搭保全。也讓蘇州衰落，上海開始繁榮。皖南地區個形式就嘸介好運道。湘軍搭太平軍展開拉鋸戰，造成當地本地人口毀滅性消失。第二趟鴉片戰爭之後，清廷得到大英帝國搭法蘭西第二帝國個幫忙，讓李鴻章立在上海搭戈登將軍合作，對付太平天國個李秀成。勒拉西面，湘軍也得到慈禧太后個認可，曾國藩獲得充足財政搭軍事獨立性，從1861年開始，太平天國就苟延殘喘哉。弗過，因為江寧府城難以攻克，圍城戰爭持續將近兩年，到1864年才拿江寧府（天京）攻克，洪秀全勒拉迭個事體之前就已經死脫。伊個兒子偷偷畀人護送出境，嘸多少辰光就畀人尋到，殺脫之。太平天國個殘黨鳥飛獸散，有個搭皖北個捻匪混勒一道，開始對中原地區進行劫掠擾亂。有個自家悄悄跑回嶺南個老家。隱居當地。箇當中就有後勢來對孫中山講太平天國往事個老兵。還有一些飄揚渡海，甚至跑到過南美洲個智利，參與當地個內戰。
Remove ads
Wikiwand - on
Seamless Wikipedia browsing. On steroids.
Remove ads