上海轨道交通浦江线

上海轨道交通浦江线，原名上海轨道交通8号线三期^[1]，是上海地铁个一条胶轮路轨系统线路，全线拉拉上海市闵行区浦江镇，连接沈杜公路站搭汇臻路站，全长6.689公里，拢总6座车站，2018年3月31号通车运营。

浦江线列车

概览

沈杜公路站采用西班牙式站台设计，开两边个门

浦江线列车内部

线路北面到上海轨道交通8号线沈杜公路站，到汇臻路站，全长6.689公里，是全高架线，拢总6座车站，工程总投资31.77亿元^[2]。从沈杜公路站出发，经过浦江镇停车场北面个绿化带到三鲁公路后小转弯向南跑，到闸航路后再小转弯向西南方向拐进汇臻路，终点站勒拉闸航路汇臻路口^[3]。

浦江线用个车子是庞巴迪Innovia APM300型胶轮路轨系统列车^[4]，是全球头一条用Innovia APM 300跑个城市通勤线路。线路是上海申通地铁集团有限公司同法国凯奥雷斯（KEOLIS）集团合资组建个上海申凯公共交通运营管理有限公司先期运营五年^[5][6]。

浦江线用个是±375V带回流轨个直流第三轨供电形式（包括车辆段）搭无人驾驶系统^[7]。为咾防止乘客跳轨或者异物落进轨道区造成事故，浦江线个所有车站侪设置高个屏蔽门。

车站列表

站名	里程[8] （米）	站间距 （米）	换乘路线	所在地	车站形式	开门方向注1
沈杜公路	0	-	█ 8号线	闵行区	高架二层西班牙式站台	两侧
三鲁公路	1972	1972	—		高架二层侧式站台	右侧
闵瑞路	2985	1013	—		高架三层侧式站台注2	右侧
浦航路	3761	776	—		高架三层侧式站台注2	右侧
东城一路	4943	1182	—		高架三层侧式站台注2	右侧
汇臻路	6293	1350	—		高架三层岛式站台	左侧

• 注¹：相对列车运行方向来讲。
• 注²：本站个上下行两個方向个付费区并呒没连拉一道。

历史

• 2011年1月28号 8号线延伸线（航天博物馆站—汇臻路站）选线专项规划（调整）公示^[9]
• 2013年4月10号 8号线三期项目报建^[2]
• 2013年4月10号 8号线三期（沈杜公路站—汇臻路站）暨集运系统A线工程个环境影响评价公示^[10]
• 2013年9月27号 8号线三期（沈杜公路站—汇臻路站）暨集运系统A线工程个环境影响评价第二次公示^[11]
• 2013年12月25号 上海市环境保护局受理8号线三期工程环境影响报告书^[12]
• 2014年4月29号 上海市环境保护局批复8号线三期工程环境影响报告书^[13]
• 2014年7月11号 上海市轨道交通8号线三期暨集运系统（暂名）工程可行性研究报告批复^[14]
• 2015年12月25号 汇臻路站开工建设
• 2017年5月3号 正式确定箇条线路个名字叫浦江线^[5]
• 2017年9月29号 正式进入全线运营跑图演练^[15]
• 2018年3月15号 正式通过试运营评审^[16]
• 2018年3月31号 通车试运营^[17]
• 2020年10月1号到8号、17号、18号搭仔24号、25号 对高架桥个伸缩缝实施升级改造，临时实行单线往返运营^[18]

事故

• 2019年4月9号下半天2点多钟，雷打忽线，结果浦江线汇臻路站附近个设备畀雷劈着，导致道岔故障、弗停个勒拉叫、烟雾腾腾、还冒火星。事发个辰光还好附近呒没车子，呒没人受伤。故咾浦江线个列车服务受到影响，列车限速运行，发车间隔拉长到15分钟。下半天2点37分，上海地铁官方微博发布消息讲箇趟故障已经排除脱哉，全线运营恢复正常^[19][20]。

• 2021年8月13号早浪7点钟，浦江线线路设备故障，结果运营延误。截至当天上半天10时，恢复正常运营^[21]。

• 2023年2月15号，浦江线信号设备故障，全线停运^[22]。后些来变成限速运营，车站现场限流，沿线个地面公交短驳车也开出来哉^[23]。到早浪向9点50分，浦江线恢复正常运营^[24]。