上海轨道交通浦江线

上海軌道交通浦江線，原名上海軌道交通8號線三期^[1]，是上海地鐵個一條膠輪路軌系統線路，全線拉拉上海市閔行區浦江鎮，連接沈杜公路站搭匯臻路站，全長6.689公里，攏總6座車站，2018年3月31號通車運營。

浦江線列車

概覽

沈杜公路站採用西班牙式站台設計，開兩邊個門

浦江線列車內部

線路北面到上海軌道交通8號線沈杜公路站，到匯臻路站，全長6.689公里，是全高架線，攏總6座車站，工程總投資31.77億元^[2]。從沈杜公路站出發，經過浦江鎮停車場北面個綠化帶到三魯公路後小轉彎向南跑，到閘航路後再小轉彎向西南方向拐進匯臻路，終點站勒拉閘航路匯臻路口^[3]。

浦江線用個車子是龐巴迪Innovia APM300型膠輪路軌系統列車^[4]，是全球頭一條用Innovia APM 300跑個城市通勤線路。線路是上海申通地鐵集團有限公司同法國凱奧雷斯（KEOLIS）集團合資組建個上海申凱公共交通運營管理有限公司先期運營五年^[5][6]。

浦江線用個是±375V帶回流軌個直流第三軌供電形式（包括車輛段）搭無人駕駛系統^[7]。為咾防止乘客跳軌或者異物落進軌道區造成事故，浦江線個所有車站儕設置高個屏蔽門。

車站列表

站名	里程[8] （米）	站間距 （米）	換乘路線	所在地	車站形式	開門方向注1
沈杜公路	0	-	█ 8號線	閔行區	高架二層西班牙式站台	兩側
三魯公路	1972	1972	—		高架二層側式站台	右側
閔瑞路	2985	1013	—		高架三層側式站台注2	右側
浦航路	3761	776	—		高架三層側式站台注2	右側
東城一路	4943	1182	—		高架三層側式站台注2	右側
匯臻路	6293	1350	—		高架三層島式站台	左側

• 注¹：相對列車運行方向來講。
• 注²：本站個上下行兩個方向個付費區並嘸沒連拉一道。

歷史

• 2011年1月28號 8號線延伸線（航天博物館站—匯臻路站）選線專項規劃（調整）公示^[9]
• 2013年4月10號 8號線三期項目報建^[2]
• 2013年4月10號 8號線三期（沈杜公路站—匯臻路站）暨集運系統A線工程個環境影響評價公示^[10]
• 2013年9月27號 8號線三期（沈杜公路站—匯臻路站）暨集運系統A線工程個環境影響評價第二次公示^[11]
• 2013年12月25號 上海市環境保護局受理8號線三期工程環境影響報告書^[12]
• 2014年4月29號 上海市環境保護局批覆8號線三期工程環境影響報告書^[13]
• 2014年7月11號 上海市軌道交通8號線三期暨集運系統（暫名）工程可行性研究報告批覆^[14]
• 2015年12月25號 匯臻路站開工建設
• 2017年5月3號 正式確定箇條線路個名字叫浦江線^[5]
• 2017年9月29號 正式進入全線運營跑圖演練^[15]
• 2018年3月15號 正式通過試運營評審^[16]
• 2018年3月31號 通車試運營^[17]
• 2020年10月1號到8號、17號、18號搭仔24號、25號 對高架橋個伸縮縫實施升級改造，臨時實行單線往返運營^[18]

事故

• 2019年4月9號下半天2點多鐘，雷打忽線，結果浦江線匯臻路站附近個設備畀雷劈着，導致道岔故障、弗停個勒拉叫、煙霧騰騰、還冒火星。事發個辰光還好附近嘸沒車子，嘸沒人受傷。故咾浦江線個列車服務受到影響，列車限速運行，發車間隔拉長到15分鐘。下半天2點37分，上海地鐵官方微博發布消息講箇趟故障已經排除脫哉，全線運營恢復正常^[19][20]。

• 2021年8月13號早浪7點鐘，浦江線線路設備故障，結果運營延誤。截至當天上半天10時，恢復正常運營^[21]。

• 2023年2月15號，浦江線信號設備故障，全線停運^[22]。後些來變成限速運營，車站現場限流，沿線個地面公交短駁車也開出來哉^[23]。到早浪向9點50分，浦江線恢復正常運營^[24]。