上海轨道交通1号线

上海軌道交通1號線是上海第一條地鐵線路，也是上海軌道交通頂頂鬧猛、繁忙、重要個線路之一，勒拉1993年5月28日開始試運營。乃末一號線從南邊爿閔行區莘莊站到北邊爿寶山區富錦路站總共長36.39公里，28隻車站。英文名Shanghai Metro Line 1。標識顏色是紅顏色。

線路數據

• 雙線區間：全線
• 電氣化區間：全線
• 地下區間：上海南站—上海馬戲城
• 地面區間：莘莊—上海南站南
• 高架區間：上海馬戲城北—富錦路

換趁站

• 莘莊
• 上海南站
• 漕寶路
• 上海體育館
• 徐家匯
• 常熟路
• 陝西南路
• 一大會址·黃陂南路
• 人民廣場
• 漢中路
• 上海火車站（出站換趁，單程票弗好換趁）

車站列表

歷史

• 1990年1月19號，1號線一期經國務院同意正式開工建設。按照「分段建設、分段通車」個原則，一期工程劃分成南、中、北三段。
• 1993年1月10號，南段（新龍華站—徐家匯站）上行線造好。
• 1993年5月28號，南段（徐家匯站—錦江樂園站）開始觀光試運行，同時開始規劃延伸到莘莊站。
• 1994年12月10號，南延伸段一期（莘莊站—錦江樂園站）開始施工。
• 1995年4月10號，中段搭仔北段線路（衡山路站—上海火車站站）開通試運營。^[1]
• 1996年12月28號，南延伸段一期（莘莊站—錦江樂園站）造好，通車運營。
• 1997年1月1號，南延伸段一期工程收尾，來上錦江樂園站—莘莊站搭仔上海火車站站—錦江樂園站兩段里向，好分段通車運營。
• 1997年7月1號，莘莊站到上海火車站站儕好通車運營。
• 2000年8月10號，1號線搭仔2號線好一票換趁。
• 2004年12月28號，北延伸段（上海火車站站—共富新村站）通車運營。
• 2005年12月25號，上海地鐵里向所有線路終於儕好做到一票換趁。
• 2007年7月4號，1號線頭一部從6節編組改成8節編組個列車上線調試運營。
• 2007年12月29號，北北延伸段（共富新村站—富錦路站）通車運營。^[2]
• 2021年6月20日，黃陂南路站個名字改脫，變成功一大會址·黃陂南路站。

事故

重大事故

• 2004年3月24號夜到頭，勒拉還嘸沒開通個1號線北延伸段通河新村站北面個折返線浪，122號列車從側面撞拉102號列車高頭，導致102號列車當中編號為92113個C車（不帶受電弓個動車）受損報廢^[3]。
  • 事故原因：弗清爽，還嘸沒公布。

• 2009年12月22號，1號線上海火車站站發生仔上海軌道交通有史以來第二嚴重個事故。5點50分，陝西南路到人民廣場區間發生仔供電接觸網故障，箇一段停運，1號線臨時拆成莘莊—徐家匯、上海火車站—富錦路區間分開跑^[4]。就勒拉7點多鐘，電跳脫箇樁事體快解決脫個辰光，從中山北路站開望上海火車站站個150號車，勒拉開到上海火車站站折返處個辰光，搭正勒拉折返個117號車個側面撞拉一道。還好碰巧伊個辰光兩部車子個速度儕比較慢，而且150號車司機連忙緊急制動，畀渠撞着個117號車是空車，所以150號車上個乘客嘸沒人受傷。箇個事故拿正勒拉恢復正常個1號線運營秩序打亂脫，9點鐘左右，調整成莘莊—徐家匯、汶水路—富錦路區間分開跑，別個區間採用公交車接駁個方式。直到11點48分左右，1號線運營纔逐漸恢復^[5][6]。結果，夜到頭20點40分左右，陝西南路站個變電間失火，導致衡山路到上海火車站箇一段區間又停運^[7]。伊天正好是冬至，還是工作日腳，事故造成上海市區大部分地區地面交通癱瘓。
  • 事故原因：
    • 第一趟供電故障：隧道頂上個碳纖維脫落，導致短路^[8]。
    • 撞車事故：N11-1438軌道區間隔編碼電路配線出仔問題，本來應該向150號列車發送20km/h個速度碼，實際浪發送仔65km/h個速度碼，導致剎車距離弗夠，導致撞車^[9][10]。
    • 第二趟供電故障：因為外頭供電網浪個波動，變壓器壞脫。^[8]

其他事故

• 2007年7月15號下半天3點34分，一男倌勒拉1號線上海體育館站望莘莊方向個站台上車個辰光，夾拉屏蔽門搭列車當中，後些來列車動仔，箇男倌落拉隧道里向當場死脫^[11]。

• 2018年4月23號早上向7點15分，一女倌勒拉1號線寶安公路站望莘莊方向個站台想穿過正勒拉關個屏蔽門搭車門強行上車，結果伊困拉車門搭屏蔽門當中，後些來列車動仔。好消息是，箇個女個畀人安全救出來哉，嘸沒受傷^[12]。

未來個規劃

2018年12月11號，上海市城市軌道交通第三期建設規劃（2018～2023年）畀國家發展改革委批覆，確認1號線要從莘莊站望西南方向再造過去1個站到滬閔路站，新增線路長1.2公里，投資銅鈿35.75億元，項目工期有得4年^[13]。但是，因為線路邊上向個動拆遷量忒大，朆有條件實施^[14]。