中国娃娃（照片）

《中國娃娃》（A Chinese baby amid the wreckage）^{[註 1]}是抗日戰爭辰光個一張戰地攝影作品^[4]，1937年勒垃美國《生活雜誌》丄公開個。攝影師是美籍華裔戰地記者王小亭，勒垃淞滬會戰、也就是1937年8月28號個上海南火車站。箇張照片拍個是一個滿身是血個小囡坐勒上海南站個鐵軌丄，嚇得唻哭個弗停，邊浪火車站已經畀日本人炸唻荒廢脫個情況。箇張照片一般性看成是第二次世界大戰個標誌性照片之一^[5]。2003年，箇照片入選《生活雜誌》主持評選個《改變世界個100張照片（英語：100 Photographs that Changed the World）》。

1937年8月28號，禮拜六，上海南火車站個廢墟里向一個哭個小囡個照片。

背景

主文章：淞滬會戰

日本人勒垃贏仔張華浜戰鬥麼，還要對上海進行戰略轟炸，轟炸個目標是張華浜港區、上海南火車站箇種非租界地區。

拍攝過程

王小亭拍個另外一張照片，1937年12月份發表勒美國《觀察》雜誌上

擔架丄正勒垃接受急救個小囡

8月28號上半天，日軍出動百多架次個轟炸機對上海進行戰略性轟炸，當中，日軍飛機十二架次轟炸機執行任務個辰光轟炸南火車站（日軍後些來扯謊講是炸錯脫哉），當場炸死700人。

箇趟轟炸個辰光，勒垃美國赫斯特新聞社做生活個新聞記者王小亭勒垃辦公地點做生活，附近就是南火車站。根據王小亭自家個描述，《中國娃娃》作品是伊逃個辰光拍個。另外，根據相關16mm紀錄片記載，轟炸個辰光，中國一位救難個人越過廢墟抱起個重傷個小囡，擺勒鐵軌邊浪向，立時三刻迴轉去救其他人，箇個小囡就是王小亭《中國娃娃》照片裏向個小囡。

箇卷赫斯特新聞社底片經王小亭沖洗仔麼，通過美國軍艦從上海送到菲律賓馬尼拉，再通過泛美航空飛機運到美國紐約，交畀美國生活雜誌，成為箇隻周刊當期個封面。箇張照片扭轉美國對於中國抗日戰爭個觀點^[6]，也讓箇周刊全世界熱銷。據生活雜誌估計，當期有得1.36億人看過迭張照片^[7]。

後續

日本對箇種事體當然是矢口否認，弗停尋藉口硬爭，一歇扯謊講是炸錯脫，一歇講伊擺拍，還懸賞15萬美金追殺王小亭。^[8]

註釋

1. 箇照片名字交關多頗眾，還有「血腥個禮拜六」（Bloody Saturday）^[1]、「上海火車站的嬰兒」（The Baby in the Shanghai Railroad Station）^[2]、《沒有母親的中國娃娃》（Motherless Chinese Baby）^[3]等各式各樣個名字，《中國娃娃》是中國官方新華網個翻譯。