五代十国
From Wikipedia, the free encyclopedia
Remove ads
五代十國（吳拼：Ng-Dai--Zhik-Kuek，廣義上向是897年-979年，狹義丄是907年－979年），是唐朝晏期開始，一直到宋朝滅脫北漢當中個歷史階段。昰隻階段一般分成五代（907年－960年）搭十國（897年－979年）。五代十國是唐帝國藩鎮割據搭唐朝晏期農民戰爭後勢力分配個結果。唐朝滅脫之後，各地個藩鎮大部分全擔自家當國王。在華北地區，有頂大軍事實力個藩鎮國家獲得別個國家個認可，箇個便是所謂個「五代」。點國家裏向，交關是沙陀族創立個。茲五隻大國雖然實力大險，但弗過自家內部也有交關矛盾，無能力征服別個藩鎮，蓋咾用藩鎮型個辦法做妥協。南方搭北方別個藩鎮，一眼自立爲帝，一眼奉五代當渠場個宗主國，在當中，有十個國家存在個年數比較長，擔渠場叫做十國。昰段辰光，常莊有叛亂上位個事幹，茲也讓中原一直有戰爭，北方個統治者多重武輕文。弗過，南方個經濟發展快險。[1]
Remove ads
歷史
五代個序幕
五代十國個歷史，是從朱溫擔唐昭宗殺脫，又廢脫唐朝個末代皇帝之後，開始個。弗過在昰個階段之前，唐帝國就已經在黃巢個打擊下，名存實亡。在唐昭宗在位個辰光，天下大致強大個土豪搭地頭有十幾個，在中原地區比較鬧猛個，就有朱溫、秦宗權、河朔三鎮、李克用等，此外，隴西個李茂貞搭幽州個劉仁恭也擁有一定個勢力。朱溫在904年擔唐昭宗從李茂貞手裏向搶出來，隨後擔長安城拆脫，強迫唐帝國遷都到洛陽，之後想效仿曹操，掃滅帝國其餘個藩鎮勢力。弗過，在清河之戰當中，畀江淮軍閥楊行密打敗，又輸畀河東個沙陀人酋長李克用，所以，渠個梁國，擁有個土地，只有中原加上河北個一些地區，並弗是一個全帝國政權。弗過，朱溫還是迫不及待，取代唐帝國，在907年正式稱帝。
軍閥混戰搭南方個安定
朱溫稱帝個辰光，黃河北面交關地面全弗是渠個，此外，南方個吳國、前蜀也弗承認渠個統治。渠仰仗河南地區經濟水平個恢復，發動交關趟討伐河東個戰爭，弗過，全無何成果，相反，李克用個兒子李存勖越來越鬧猛，擔幽州地面個勢力削平，還擔契丹打跑脫。顯示出老大個野心。朱溫擔渠麼辦法，在自家個生活浪尋花頭，搭自家個兒媳發生關係。終於，讓自家個兒子發動篡位，朱溫畀人殺脫，之後，梁末帝擺平其餘勢力，成為梁朝最後一個皇帝。之後，梁國搭河東個晉國在夾河地區對峙七八年，反覆交關趟，老百姓遭殃。最後，到923年，李存勖滅脫後梁，到中原即位，建立後唐個統治。 搭中原個形式相反，在南面，大部分國家全採取休養生息個做法，吳搭吳越在膠着之後，也在919年舉行無錫和談，結束敵對歷史。弗過即便有戰爭個辰光，江南大部分地區也是和平穩定個。經濟全得到快速恢復，一些老早弗是老發達個地區，比方講：湖南、江西、福建。也得到迅速開發，湖南個馬楚國重視商業，迅速致富。福建個閩國重視海外貿易，讓泉州港更加繁榮。南漢也對海外貿易有大發展。巴蜀地區個王建，常年息兵，並且招攬中原地區個士大夫來蜀國避難，讓蜀地個文化空前繁榮。可以講，五代個前期，南方各個國家個經濟全快速恢復，呈現出欣欣向榮個面貌，搭兵荒馬亂個北面完全兩樣。
後唐個稱霸搭政權更迭
後唐建立之後，在政治浪自稱是唐王朝個繼承人，渠場個軍隊，保持沙陀人個特點，戰鬥力比較彪悍。中原地區別個軍閥，比方講老早自稱岐王個李茂貞，全向後唐稱臣。後唐擔北方所有個地方全佔領。還想武力吞併南方，到李存勖派大軍攻擊前蜀，三個月就擔此國滅脫。設置節度使，直接統治。又派信任個將軍高季興到南面個南平，擔任荊南節度使。南面交關國家，全向後唐稱臣。李存勖自家邪氣得意，每天全搭一幫伶人一道玩樂。有空還歡喜自家演戲，渠對待手下個大臣弗信任。最後演變成政變，自家死脫，唐明宗即位。個辰光，南方幾個國家全保持穩定發展，經濟實力開始完全超過北方。後唐在唐明宗個辰光保持短期穩定，弗過，到唐末帝登基後，因為中央搭藩鎮個矛盾重新尖銳，最後，讓鎮守勒北方邊境個幾個節度使先後叛亂，這些節度使已經沒有老早河朔三鎮個戰鬥力，全是仰仗新興個北方民族契丹個實力南侵。沙陀人石敬瑭對待契丹頂頂忠心，自家認遼國國主為爸爸。又承諾割讓幽雲十六州，所以，遼國幫助渠南下奪取皇位。後唐打弗過渠場，昰個辰光，在巴蜀地區個後唐將領先後自立，孟知祥獲得勝利，建立後蜀。後唐終究畀契丹搭石敬瑭個聯軍滅脫，之後，石敬瑭在契丹人個支持下頭，登基稱帝，建立後晉。
勢力變更搭後周崛起
後晉擔幽雲十六州割讓畀契丹之後，北方個邊界沒險要好守衛。在石敬瑭個辰光，中原就有交關節度使並弗服從渠個統治，石敬瑭為保持平衡，也儘量滿足渠場個要求，這讓中央政府個權威更加推板。石敬瑭死脫之後，繼承人嘸秉承渠討好契丹個政策，反過來擔契丹當做敵人。這讓契丹人弗開心，最後，遼國人南下，擔後晉滅脫。弗過，契丹人弗好適應中原個統治，各地個藩鎮也保有邪氣大個戰鬥力，讓契丹人弗好一歇就征服。所以，到一年之後，渠場就只好歸去哉。個辰光，老早石敬瑭手下個大將劉知遠趁機奪取權力，自稱皇帝，建立[[後漢]。個辰光，中原王朝因為北方個壓力，無何心向關注南面個情況，南方個國家，也發生一些兼併活動。主要是南唐想成為南朝，先後利用動蕩機會，擔鄰近個閩國搭馬楚滅脫，弗過，南唐個統治方法存在問題，湖南搭閩南之後又有新個政權誕生，分別是佔領馬楚老早疆域個武平節度使搭佔據閩南三府個清源軍節度使。兩個地方基本保持老早個自立狀態，南唐反過來，因為用兵失敗，元氣傷害蠻嚴重。在攻滅閩國個過程當中，吳越為保持自家個勢力，出兵佔領福州。後漢對渠場個做法嘸多少干預，劉知遠即位沒多少辰光，渠個太子就猝死。之後，渠也傷心過度，當年死脫。之後即位個漢隱帝弗會統治，殺伐功臣，讓大將郭威造反，上演黃袍加身，奪取皇位。建立後周，劉知遠個阿弟在河東地區自立，依然打漢個國號，歷史浪擔昰個殘餘政權叫做後漢，也當成十國之一。
南北局面明朗搭趙匡胤上位
郭威建立自家個政權之後，先後擔蠻多藩鎮勢力削平，又信任自家個養子柴榮。廢脫老早一些苛政，吸引老百姓回流。弗過，就一兩年渠就死脫，柴榮即位，昰個人按照內亞標準是典型明君，戰爭能力邪氣強，同時又有水平吸納文人，壓迫武人，同時對佛教邪氣推板。955年，發動第三趟滅佛運動，查封蠻多佛廟，擔收繳個鈔票當做對其餘國家用兵個資本。955年，渠擊潰後蜀，佔領漢中地區。第二年，擊潰南唐，獲得南唐江北個土地，個能，讓南唐南北朝個夢想泡湯。之後，對北漢搭北漢身後個契丹用兵，收復燕雲十六州當中個瀛洲、莫州。弗過渠之後得病死脫，自家個小兒子柴宗訓即位，後周個禁衛軍頭目趙匡胤立在陳橋發動兵變（歷史浪叫做陳橋兵變），得到軍頭用戶，之後，開回開封，廢脫周恭帝，後周滅亡，北宋建立，渠就是後勢來個宋太祖。
宋帝國個侵略搭十國完結
一般帝國文人擔北宋建立當成五代十國終結個節點。個能是弗準確個。個辰光，老早唐帝國個境內還有將近十個自主勢力，個當中，包括:江浙地區個吳越國、湖湘地區個武平節度使、閩南地區個清源節度使、江右搭江東地區個南唐(個辰光自稱江南國主）、嶺南地區個南漢帝國、巴蜀地區個蜀帝國（後蜀）、江漢地區個南平國、河東地區，契丹人個保護國北漢國、以及從南漢手當中脫離自立個大越國、河西地區個定難節度使(後勢來個西夏前身之類。趙匡胤朝南朝北，對先攻擊何地擔弗頂主意。渠個心腹趙普奉勸渠先對比較便當個南面下手，再攻擊北難搞個遊牧帝國契丹，趙匡胤聽從，成為趙宋帝國個國策。
963年，趙宋首先擔周行逢死脫之後，無主心骨個湖湘地區強行兼併，之後，對後蜀用兵，無戰鬥力個盆地人，一個多月就潰敗。個能，趙宋獲得對東南其餘國家個戰略優勢，之後，見風使舵個南平國老快就自動請降。趙宋對南漢用兵，南漢個盟友南唐個辰光個君王是文人李後主，縮手縮腳，弗敢幫助南漢，一年之後，南漢滅亡，趙宋開始拉吳越國，對南唐用兵。南唐一敗塗地，975年，遭到吞併。順便擔清源軍也一併吞脫。個能，到趙匡胤死脫個辰光，就剩下來南面個吳越國搭北面個北漢還有名義獨立。之後，趙匡胤莫名其妙死脫，渠個阿弟趙匡義登基，強行命令吳越國納土歸宋(後世文人擔昰個吹捧成吳越主動行為），弗過，渠對北漢用兵邪氣失敗，雖然挨末階段吞脫北漢，弗過畀遼國擊破交關趟數，燕雲十六州還是立在遼國手當中。但對內，趙宋就宣稱自家大一統完成哉。所以，978年一般也當做是五代十國徹底完結個節點。
Remove ads
組織形態
五代十國辰光，上層政治制度搭三國類似，立在唐朝表層下頭，有交關變化。一般講起來，中央朝廷設置管理行政個三省六部、管理財政個三司搭管理軍事個樞密院。因為戰爭多，所以，樞密院權利邪氣搭，宰相一般要獲得樞密使頭銜，才算當真掌握權利。各國內部也沿襲中原王朝個做法，弗過，一般對中原稱藩個國家，官職全降低一檔，南漢，南唐之類自稱帝國個，就完全搭中原一致哉。
經濟
個段辰光，是帝國內部經濟水平轉變個重要階段。安史之亂、藩鎮割據替黃巢之亂個因素，讓中原替河北地區因為戰亂一塌糊塗，有能力個人口全流移南方，當地田園嘸人耕種。到五代十國辰光，軍閥在北面開展始終未能平熄，北方個經濟開始落後，人口一直減少。到後周挨末階段才逐漸恢復，弗過，從此刻開始，經濟水平已經弗好搭南面比較。南面各個國家，因為各自有邦國，經濟長期穩定，吳越國、閩國、馬楚、後蜀、南唐、南漢個經濟全有良好發展，吳越國對太湖地區進行灌溉工作，徹底讓此地成為糧倉替繁榮地帶。南唐替之前各楊吳對江淮替江右開發，讓兩地個發展水平超過唐帝國辰光。馬楚替閩國對各自國家個開發，也讓湖湘替八閩成為文化繁榮個地區。南漢發展對外貿易，替十幾個國家通商。蜀國閉關自守，經濟邪氣富足。處於渠場當中個南平國，也一直保境安民，發展過境貿易，讓南方個經濟高速發展。
政治實體列表
五代十國辰光，有交關政治勢力登台，所謂「十國」，只是一個籠統個稱呼，實際浪稱王個弗止昰個數量。有一些節度使，雖然講沒有稱王，弗過渠場個統治，搭國王也無何區別。一些邊緣地區個政治實體，後頭逐步走向獨立。
朝代
所謂五代，就是五個鏈接起來個中原朝代個稱謂。弗過，昰五個朝代並弗好統一帝國本身，只弗過時佔據中原地區個大型軍閥勢力。個當中，後唐、後晉、後漢全是沙陀人建立個王朝。
十國
沒列入十國個政權
- 歧國
- 武平節度使
- 清源節度使
- 靜海節度使
- 朔方節度使
- 定難軍節度使
參考資料
Wikiwand - on
Seamless Wikipedia browsing. On steroids.
Remove ads