南宋
From Wikipedia, the free encyclopedia
Remove ads
南宋是中國歷史中古時期個一個朝代，迭個政權是宋帝國來勒靖康之恥後動盪個結果，創立人是宋徽宗個第九個兒子康王趙構,從1127年一直持續到1276年蒙古人攻陷臨安，到1279年崖山戰役後，畀忽必烈個蒙古帝國徹底滅脫。南宋拿首都（官方稱謂是行在）擺勒臨安，讓杭州成為邪氣繁榮個城市，南宋辰光，南方個經濟穩定繁榮，社會發展迅速。
Remove ads
國號
南宋個國號，是直接沿用宋朝個國號個，來勒南宋存在個辰光，並弗存在南宋迭個名稱，之所以冠南字，是後頭個人，為拿迭個流亡到杭州，統治淮河以南個政權搭老早首都來勒汴京個原有宋朝廷區分，加上去個。
統治集團
南宋搭歷史浪個東晉一式一樣，是一個流亡政權。弗過因為時代弗一樣，伊拉進入吳越個辰光，當地已經嘸東晉初年個吳姓士族勢力抵抗。當地個新型士大夫，儕因為科舉個原因，採取搭趙宋統治集團合作個態度，只有因為戰爭關係，立在早期有過一些有實力個軍閥人物。弗過，個批人，立在之後十幾年之內，也儕畀慢慢削平哉。
趙宋皇族
靖康之變對趙宋統治集團是邪氣大個打擊。因為立在金國攻陷汴京過程中，拿太上皇宋徽宗、皇帝宋欽宗搭宋徽宗所有個兒子，儕捉到北面去。所以趙宋個嫡系，生下來個就只有康王趙構一個人哉。又因為揚州兵變，趙構喪失生育能力，所以，趙宋家族，只好尋宋太祖個後代，繼承皇帝個位置。從南宋個歷史來看，趙宋皇親國戚個權力是弗大個，但分支比較發達。立在泉州等地，儕有上千人居住。遠房個親戚還有趙汝愚這種做到宰相個。
流兵軍頭
北宋實行禁軍制度，權力儕立在中央個禁軍手裏，導致戰鬥能力低下。因為女真戰爭個原因，禁軍制度立在南宋初年是基本弗存在個，宋高宗只好依靠一些立在戰亂當中自家發展起來個勢力對金國進行抵抗。個當中，有好幾個人物成為大型軍閥，比方講有名個中興四傑： 張俊、劉光世、韓世忠搭岳飛就儕是個種出生。伊拉自家有交關私人軍隊，自家個士兵不曉得朝廷號令，唯獨聽從主將個指示。這些軍隊，一直畀趙宋朝廷當做心腹大患。立在穩定政權之後，便開始慢慢剝除。岳飛是挨末一個畀渠做脫個，岳飛個死也標誌伊拉勢力個基本結束。
文官士大夫
南宋延續北宋個傳統，大開科舉考試，又因為北面個疆域儕立在金國境內，所以又客觀上消除老早個南北歧視問題，讓南方人，邪氣是東南地區個吳越、閩越搭江右人，完全掌握晉升機會。南宋辰光吳越地區士大夫眾多，邪氣是湖州、衢州等地，繁榮程度比之後個明清辰光更加明顯。這點也讓吳越地區個知識分子搭地主有盼頭，弗像老早東晉辰光介明顯個排斥土著。所以，吳越地區士大夫對南宋朝廷個支持度一直蠻高，雙方個關係也算曆朝歷代當中頂頂好個。
Remove ads
歷史
詳見：南宋歷史 南宋個歷史，具體從靖康之恥開始算，一般到崖山海戰算作終結，一共持續一個半世紀個辰光。
建立搭動盪
靖康之恥後，金人來勒中原扶植老早個宋朝大臣張邦昌做皇帝，弗過並沒獲得士紳個支持，還遭到普通老百姓個痛恨，金國人撤走之後，張邦昌只好借孟太后個名義，下詔書，讓宋徽宗唯一一個朆畀渠捉牢個兒子——康王趙構繼承宋王朝個皇位。[1]。靖康兩年（公元1127年）五月一號，康王趙構來勒商丘（個辰光叫做應天府）正式登基做皇帝，伊就是後來個宋高宗。弗過，伊手裏向掌握個實際實力並弗多，為平衡權利，只好安撫張邦昌，講伊護國有功，拿伊封做王。高宗即位個第二年，女真人又講張邦昌被廢脫，損害伊拉個利益，重新南下到中原地區。隨後，來勒1129年，女真人又拿劉豫擁立做皇帝，國號齊，作為代理人，加強自家來勒黃河以南個統治。殘餘個宋朝軍隊開始向北攻擊，獲得過一些勝利。[2] 宋高宗來勒金國人個追蹤下一路南竄，有段辰光還逃到海浪，弗過，吳越地區個老百姓儕邪氣反對女真人個殘暴，另外，岳飛韓世忠等地方將領迅速崛起，也讓女真人屢屢受挫。到1130年代後，女真人已經退回江淮地區，隨後，南宋屢次戰勝女真人。宋高宗總算拿伊個朝廷穩定下來，伊下詔升杭州做自家個「行在」。確立宋帝國南遷個基礎，到1130年代末，伊任命秦檜做丞相，向女真人發出求和信號。同時，壓制內部將領個指揮權，伊先後接觸抗金將領韓世忠搭岳飛個兵權，到第二年，又用莫須有個理由，拿岳飛抓牢，隨後殺脫，別個實權將領，假使有異動，也紛紛遭貶謫。[3]
采石之戰搭長期繁榮
來勒紹興和議之後嘸幾年，金國因為內部個宮廷鬥爭，讓完顏亮登基成為統治者，伊率領軍隊，開始向南面進攻。1161年（紹興三十一年）5月，完顏亮正式南下，想滅脫宋朝。個辰光個丞相陳康伯腦子思路清爽，伊運籌帷幄，要求趙構下詔親征建康（南京）。10月，宋軍歌李寶率水兵，用火攻拿金水軍來勒膠西陳家島（或唐島，又稱陳家島海戰）滅脫。11月，虞允文來勒採石（建康西三四十公里，今馬鞍山）擊退女真軍隊個渡江部隊，完顏亮只好跑到瓜洲（今江蘇揚州），宋軍個劉琦、楊存中來勒鎮江（建康東七八十公里）嚴密防守。完顏亮渡江又失敗，11月下旬，伊畀自家個部將殺脫。南宋贏得戰爭。雙方動員個兵力一共有70萬到80萬 。金國失敗之後，南宋國內要求向北面進攻和聲音比較多，個辰光，宋高宗也拿皇位傳把宋太祖支系個趙昚，迭是皇位回到宋太祖個支系浪[4]。1164年，張浚北伐失敗，弗過還是簽訂一份有利宋朝個合約。取消宋金之間個君臣關係，拿歲幣減少到20萬。[5]。宋孝宗雖然一直想北伐，弗過，個辰光個北方流亡人已經慢慢適應江南個生活，南方個經濟來勒大環境穩定個局面下，也迅速趕超北宋個水平。來勒兩浙路搭江南東路、江南西路，儕出現戶口個增長，只有長江以北個江淮地區比較蕭條。宋孝宗應用虞允文、周必大等人，讓朝廷個局面也長期穩定，為南宋四十幾年個穩定奠定基礎。
相國專權
宋孝宗之後個南宋皇帝，大部分嘸啥雄心壯志，權力完全畀相國掌握，所以，相國有能力辰光，國家也就繁榮，相國有野心辰光，國家也有動亂。先後有趙汝愚、韓侂胄、史彌遠立在宋光宗、宋寧宗搭宋理宗個前期，完全掌握權力。個當中，韓侂胄野心頂頂大，曾經要求已經安定個南宋，莫名向漢化深入個金國北伐。並且利用寫手炮製「天道好還，中國有必伸之理」個文章，蠱惑人心。弗過北伐終究是一敗塗地，之後，宋搭金重新修訂合約，增加歲幣等內容，得弗償失。弗過，南宋個經濟，立在迭個階段還是頂頂好個，社會文化發展，也達到空前絕後個水平。個辰光個首都臨安搭周邊各兩浙地區，立在整個世界浪也是數一數二個發達場化。立在中國個歷史浪，嘸幾個階段能達到迭個高度。弗過，極端發達個經濟搭軍事個弱勢形成對比，讓一些儒家文人邪氣弗滿意，伊拉寫作一些具有擴張思想個詩句，對當時個社會進行諷刺，這些詩句，立在後來成為漢民族主義個論點之一。
端平入洛
宋理宗親政之後，北面個金國畀蒙古侵略交關趟數，有眼看上去朝不保夕。個辰光，蒙古就派大臣搭南宋進行談判，邀請南宋對金國進行進攻。弗過，一開始宋嘸理睬伊拉。到金哀宗繼位之後，金國想通過攻擊南宋，彌補自家畀蒙古攻擊造成個損失。南宋只好加入攻金個同盟。之後，金國老快就畀蒙宋個攻擊滅脫。之後蒙古人嘸留在中原。宋國一面拿金哀宗個骨灰拿到臨安祭祀自家祖宗，一面派軍隊進入中原地區。包括老早北宋辰光個首都汴京。個趟事體，後勢來就畀稱呼叫端平入洛。弗過，所謂收復首都，實際浪水分邪氣大，當時朝廷也曉得並弗是啥巨大個勝利。蒙古人立在滅脫金國之後，也直接搭宋國接壤，嘸多少辰光，就又爆發衝突。
地理
南宋個地理，是北宋個延續，弗過，來勒交關層面也有弗同。
首都
南宋開始個辰光，宋高宗趙構來勒商丘稱帝，隨後一路往南跑，伊拿巡幸當名號，先後跑到過揚州、平江府（今江蘇蘇州）、杭州、建康府（今江蘇南京）、紹興府（今浙江紹興）等地，儕拿「行在」名之。之後，到建炎三年二月駐蹕杭州辰光，詔以為行宮。七月，升杭州做臨安府。紹興八年（1138），正式拿臨安府為都城，弗過名義浪，還是叫做行在。[6]
行政區劃
.jpg)
南宋拿全國分成仔十七個路，南宋個分路，儕是對安撫司路來講個。南宋開始個辰光，全國有兩浙東、兩浙西京西南、淮南東淮南西、江南東、江南西、荊湖南、荊湖北、成都府、潼川府、利州、夔州、福建、廣南東廣南西等十六個路。到建炎四年,拿江南東、西兩路並脫，個辰光有十五路。紹興元年(1131)，江南重新分成東、西兩路，之後，還是十六路。紹興十四年，拿利州分成東、西兩路，個辰光是十七路；乾道四年(1168)又拿利州東西合成一路，仍是十六路；淳熙二年(1175)再次分兩路，三年又並脫，五年再分開，紹熙五年(1194)還並脫，慶元二年(1196)又分開來，嘉定三年(1210)複合。帥、漕、憲三司個駐紮地，並弗是一個地方。[7]。具體講，分別是下頭個分法[8]：
- 兩浙西路：臨安府平江府、鎮江府、嘉興府、安吉州、常州、江陰軍
- 江南東路：建康府、寧國府、徽州、池州、饒州、信州、太平州、南康軍、廣德軍
- 江南西路：洪興府、江州、贛州、吉州、袁州、撫州、筠州、興國軍、南安軍、臨江軍、建昌軍
疆域
南宋個國土面積，相對老早個北宋，是縮小個，主要個收縮是因為金國侵略個影響。紹興九年（公元1139年），宋帝國搭檔女真人談判成功，個辰光，確定拿黃河作為邊界。弗過，第二年女真人撕破合約，派軍隊佔領中原搭關中地區。紹興十一年，又達成和解，個趟拿淮河作為邊界。第二年，確定西面邊界，雙方拿大散關到秦嶺作為分界線。之後，迭個邊界大體浪保持穩定。[9]所以，南宋個北面邊界，就等同當今個地理氣候分界線。來勒南面，南宋保持搭北宋差弗多個邊界，對大理國搭越南地區儕保持克制。對貴州地區個少數民族，採取軟硬兼施個做法，遙控統治。
Remove ads
政治
南宋個政治，基本浪照搬北宋個體系個，邪氣是中央官僚制度，基本嘸改變。弗過，因為平民化搭貴族個徹底消亡。到南宋辰光，啥人儕好通過讀書，考科舉當官。經常有平民百姓通過迭個路徑成為士大夫。另一方面，一些出過宰相個大家族，利用南宋孝宗之後，皇帝弗歡喜統治國家個特點，培養自家個勢力，出現好幾代高官個情況，這種家族大部分來自吳越地區，立在江右、閩越也弗少。此外，因為四川地區到杭州比老早到汴京還要遙遠，所以對四川個科舉搭官僚任命採取權宜，讓伊拉立在成都考試，第一名授予探花個身份。
南宋權相
經濟
因為擺脫內亞漕運搭輸血個包袱，加上大量中原勞動力向東南地區轉移，讓南宋獲得充足個勞動人口搭較小個轉移負擔。所以，儘管要搭北面個金國對峙，弗過立在南宋大部分辰光之內，經濟個發達程度立在歷史上卻是空前絕後個。即便到蒙古搭宋國戰爭辰光，東南大部分地區個生活水平也嘸受到太大影響，更嘸明朝、東漢搭唐朝那種老百姓大規模暴動發生。
帝王列表
Remove ads
參考資料
Wikiwand - on
Seamless Wikipedia browsing. On steroids.
Remove ads