冬至

冬至，也叫冬節^[1]，是農曆浪個一個交關重要個節氣，也是傳統節日。勒二千五百多年之前個春秋時代，中國就已經用土圭觀測太陽，測定出冬至，俚是廿四節氣當中最早制訂出個一個，辰光勒每年個陽曆12月21號到23號之間，搿一日天是北半球全年當中白天最短、夜裡最長個一日天。

節氣

冬至是廿四節氣之一，最重要個節氣之一。冬至前是大雪（12月7-9號交節），冬至之後是小寒（翌年1月4-6號交節），冬至是12月21號到12月23號交節。據記載，周代以冬十一月為正月，以冬至為歲首過新年。^[2]

吳地習俗

冬至大如年。蘇州人有「冬至大如年」個叫法，所以特別重視搿個節日。^[3]傳統個姑蘇人家，會勒冬至夜吃冬釀酒。節前，親眷互相送禮，提筐檐盒，謂之冬至盤。節前一夜，俗叫冬至夜，全家團聚吃冬至夜飯。凡是出嫁個囡魚板調迴轉夫家，要是留勒娘家，不利親眷，會窮得「十隻飯籮九隻空」。南瓜弗可以放勒窩裡過夜，板調放勒露天屋面浪，不然要遭災殃。夜飯前頭要祭祖，祭祖個菜板調回鍋燒，弗然吃之會記憶力差個。夜飯個菜特別豐盛，有銅鈿個人家起碼八盆一暖鍋，外加儕是雞、整鴨、大青魚，還有紅燜蹄膀。窩裡有外出個人，也會照樣放一副筷鞥。各種菜儕有個吉祥個名稱。

冬至早浪向起來，有個吃冬至湯糰，有個吃年糕。另外，俗以冬至前後有雨雪，主年夜晴。要是冬至天晴，搿麼年末就多雨雪，路浪泥濘。所以有「乾淨冬至邋遢年，邋遢冬至乾淨年」個講法。

爭議

近年來，中國北方個「冬至吃餃子」習俗畀大眾媒體有意識立在交關平台高頭宣傳，拿迭個活動，變相宣傳成中國個全國習俗。迭個做法，遭到交關反對。弗過，冬至吃餃子個名聲，同時也越來越響，年輕人對「冬至吃餃子」接受度也越來越高。

諺語

• 江南：「清爽冬至邋遢年，邋遢冬至清爽年」。意思是冬至假使是晴天，春節通常要落雨，反之亦然。