凱撒

凯撒，又译恺撒（拉丁文：Caesar，公元前100年7月13日－前44年3月15日），罗马共和国末期个军事统帅、政治家，儒略家族成员。

凯撒个胸像雕刻

凯撒虽然出身贵族，弗过家门并弗哪能显赫，伊年轻辰光当过律师，败诉两趟之后放弃。改跑到自家亲戚勒拉小亚细亚个军队里向。个当中，曾经勒拉东方王国个宫廷里充当间谍，有传闻讲伊当过迭个国王个男宠。伊回到罗马之后，想方设法挤到权力阶层。因为伊擅长搞女人，情妇多，所以关系网也灵通。弄到神官个职位。之后伊历任财务官、大祭司、大法官、执政官、监察官、独裁官等职。伊晓得自家弗是罗马第一流个名门，呒办法勒拉元老院出人头地，所以，伊就拿自家个人望寄托在平民身上。一直塑造自家是老百姓个朋友。不过，迭眼侪弗过是权术而已。

公元前60年，伊搭驾驽士·庞培（Pompey）、麻掴撕·李锡尼·克拉苏（Crassus）秘密结成前三头同盟，随后担任执政官，勒拉任期当中排除异己，收买暴民，通过农地法，笼络到交关失地无产者民心。之后，根据三巨头同盟个秘密约定，伊勒拉执政官任满之后，出任控制三个行省大权个高卢总督。伊晓得呒武功做资本是无法搞独裁个，就用8年辰光，恩威并施，逐渐殖民高卢全境（乃朝法国、比利时搭德国莱茵河西面），也野心勃勃个侵略日尔曼搭不列颠。伊勒拉高卢安插势力，排除元老院个官僚，完全拿高卢变成伊自家个独立王国。迭眼举动，也引发元老院个交关责问。公元前50年，庞培搭元老院要求伊辞脱高卢总督个职位，伊呒执行。公元前49年，渠跨越卢比孔河，公然叛国并占领罗马，之后追杀庞培，灭脱反对自家个势力。勒拉元老院设立类似东方帝王个宝座，集大权于一身，开始独裁统治，制定了《儒略历》。

公元前44年，凯撒个独裁让罗马元老院大部分元老再没办法忍受，以布鲁图（Brutus）所领导个元老院成员拿伊暗杀身亡。凯撒死脱之后，其甥孙及养子屋大维（Augustus）击败安东尼（Antony）开创罗马帝国并且成为第一位帝国皇帝。抛开个人个作为弗讲，凯撒是能力邪气强个军事家搭文学家，伊个著作高卢战记是拉丁文学个名作，伊个统治方法搭收买民心个手腕，也为后代个帝王树立标杆。此外，凯撒也是扑克牌里个方块K人物。

注释