印度航空171号班机空难
From Wikipedia, the free encyclopedia
Remove ads
印度航空171号班机是一趟打印度艾哈迈达巴德飞望英国伦敦盖特威克机场个国际线定期客运航班。2025年6月12号下半日，一架执飞个个航班个波音787-8客机（注册号VT-ANB），勒垃萨达尔·瓦拉巴伊·帕特尔国际机场起飞以后不多长远就跌勒机场附近。事故发生勒靠近机场、人口稠密个梅加尼讷格尔（Meghani Nagar）住宅区。印度航空官方通告显示，飞机丄向有242个人，有一个幸存者；外加地面丄也死脱起码38个人。
背景
飞机搭航班
出事体个飞机是一架11年机龄个波音787-8梦想客机，注册号VT-ANB，序列号36279。[1][2]个只飞机是波音埃弗雷特工厂造出来个，2014年1月28号交畀拉航空公司。[3][4]飞机丄装仔两台通用电气GEnx-1B67发动机。[5]
个次事故是波音787从2011年投入使用以来头一趟发生致命坠机事故搭机身全损事故，[6]也是印度航空从1985年182号航班爆炸案以来头一趟发生机身全损个空难。[7]个次事故成为仔印度从1996年杰尔基达德里撞机事件以来顶严重个空难。[6]
印度航空从2013年开始运营盖特威克机场航线，事发个辰光每个礼拜有12趟航班打个个机场起飞，里向有5班飞望艾哈迈达巴德。[8]
趁客搭机组人员
根据印度民航总局搭印度航空提供个数据，个趟航班丄向拢共有242人，包括230个趁客（里向有11个小囡搭2个毛毛头），外加2个飞行员咾10个空趁人员。[9][10]趁客名单显示有169个印度人、53个英国人、7个葡萄牙人搭1个加拿大人。[11][12][13]机长是苏米特·萨巴瓦尔（Sumeet Sabharwal）咾，副机长是克莱夫·昆达尔（Clive Kundar）。[14][15]
Remove ads
事故
171号航班勒垃当地时间下半日一点三十八分（UTC时间八点零八分）打艾哈迈达巴德机场廿三号跑道起飞，飞望伦敦盖特威克。根据气象报告显示，伊歇天气稳定，能见度良好。[8]
飞机个ADS-B应答器数据显示顶大高度达到过191米。UTC时间08:08:50，高度约摸70米个辰光信号消失脱，第个辰光飞机还朆越过05号跑道个入口。机组向艾哈迈达巴德空管发出过紧急求救信号。[8]
飞机是爬升阶段跌落来个。根据现场个视频，飞机先是正常爬升，后首来慢慢较降下来，起飞大概30秒后头，从大家个视线里向消失脱，勒一团火球搭浓烟当中坠毁哉。[16]
梅加尼讷格尔个目击者讲渠拉听见仔好几声爆炸，难末看见浓烟滚滚，是飞机撞上建筑物以后滑行。[17]飞机阿末来撞上民用医院园区里向个B·J医学院学生宿舍楼。[8][18]坠毁哉后首，飞机部分完好个稳定翼咾尾锥体龁勒一栋多层建筑个顶丄。[19]坠机以后跟牢发生仔好几趟爆炸。[20]
Remove ads
救援搭善后
艾哈迈达巴德消防搭应急服务部门确认调派仔全市各分区个救援单位。[21]头一通报警电话勒当地时间13点45分打进指挥中心，讷洛拉GIDC马上派出仔两支消防队咾启动仔“全警响应”。连同15名朝上个消防指挥人员，拢共投进仔337名消防员、60部消防车搭20部水罐车。[20]包括消防局个20部个救护车个多支医疗队紧急赶望现场。[20][22]为仔保障救援，通望坠机点搭周边场许所有个道路全封闭脱哉。[21]巴罗达市紧急增援仔廿部消防车。甘地讷格尔消防局、印度石油天然气公司、古加拉特国际金融科技城搭民防组织全参加仔行动。[20]
负责机场安保个中央工业安全部队也参加仔救援。[23]两支边境安全部队也部署勒许。[24]印度陆军约摸130名官兵相帮清理废墟咾救治伤者。一爿军方医院进入待命状态。[10][25]中央后备警察部队出动仔150个人，三支国家灾害响应部队90个人也投入仔救援。[26]西部铁路提供仔灾害管理队、铁路保护部队人员搭包括6个医生、廿个医护个医疗组咾7部救护车。[27]
火势勒一个钟头里向得着仔控制咾，救援还接下去进行仔五个钟头。市政中央工场调用仔159部车子、15部推土机、5部挖掘机、25部卡车咾1台压路机来清理现场。130个工程师、一百朝上个卫生部门人员参与仔善后，市立医院全面启动仔应急机制。[20]坠机后首机场马上全面停航哉，[28]到当日晏点辰光恢复仔有限个运营。[16]
伤亡
根据高级警官维沙卡·达布拉尔（Vishaka Dabral）个通报： 民用医院拢共接收仔269具遗体（包括飞机丄个241个人咾地丄个28个人），[8][29][30][31]死脱个人包括维贾伊·鲁帕尼，渠是2016年到2021年个古吉拉特邦首席部长。[32]起码五十个畀飞机撞着个宿舍里向个医学生住仔院，41个人伤着哉。[8]到6月13日，警方告诉BBC新闻，有6具遗体已经交畀拉死者屋里向哉。[33]
飞机丄只有一个40岁个英国公民一家头活下来哉。[30]渠坐勒11A座位，贴牢紧急出口。[34]治疗渠个医生讲，渠意识有点糊涂咾，身丄向有好几处受伤，必过已经无得危险哉。[35]渠拉兄弟也勒许个架飞机丄咾，渠朆活下来。[36]
调查
印度飞机事故调查局主导个趟空难个调查。[37]英国航空事故调查局[38]搭美国国家运输安全委员会派出专家组来帮忙拉哉。[10][22]美国联邦航空管理局表示会得立即组建团队来配合美国国家运输安全委员会个工作。[39]6月13号，印度国家安全卫队寻仔28个钟头，总算勒垃坠机现场寻着哉记录飞行技术数据个黑匣子。[17][40][41]同一日天，古吉拉特反恐小组从残骸里向寻着哉数字视频记录仪。[42]
印度民航总局搭印度航空也启动仔独立调查。[43]6月13号，印度民航总局下令从6月15日开始对印度航空所有个787客机实施起飞前头个技术安全检查。[44]
Remove ads
反应
国内
印度总理纳伦德拉·莫迪勒X（原推特）丄向遇难者表达仔哀悼。[8][45]6月13号，渠到仔事故现场，还到医院里向望仔飞机丄唯一一个幸存者咾地丄向受伤个老百姓。[46]
内政部长阿米特·沙阿事发后头搭古吉拉特邦首席部长布彭德拉·帕特尔通仔电话。[47]帕特尔讲已经指示官员立即立时三刻开展“救援搭善后工作”，要拿各项安排“当成打仗一样紧急”来落实。[22]反对党领袖拉胡尔·甘地也表示仔哀悼，同时要求豪𢜶提供援助。[48]
国际
各国个元首搭政府首脑纷纷表达致哀，包括英国首相基尔·斯塔默、[49]查尔斯三世国王搭卡米拉王后、[50]加拿大总理马克·卡尼、[51]葡萄牙总理路易斯·蒙特内格罗、[52]中华人民共和国国家主席习近平[53][54]。英国外交部已经勒垃印度搭英国两地组建仔危机应对小组。[55]
参考资料
Wikiwand - on
Seamless Wikipedia browsing. On steroids.
Remove ads