基督宗教

早期歷史

迭個宗教立在2000年之前立在乃朝個巴勒斯坦地區發源。立在開始辰光是猶太教內部個一個小團體。到聖保祿改革之後，成為面向各個族群個普世宗教。到公元2世紀，已經傳遍整個東地中海。公元3世紀後半階段。基督教吸納交關知識分子替羅馬上層進入，也引發羅馬帝國皇帝戴克里先對基督教個迫害。到312年，君士坦丁大帝開始擁護基督教。到4世紀後半段，基督教成為羅馬國教。同時，因為內部對三位一體解釋弗同，開始出現頂早個分裂。乃朝個東方亞述教會替亞美尼亞教會就是迭個階段形成個。

東西對立

公元5世紀，西羅馬帝國滅亡，羅馬主教依靠教會，立在西歐開始掌握實際個基層控制權。立在帝國東部個君士坦丁堡，教會更加本地化，希臘化。君士坦丁堡替羅馬之間個對立從此開始。公元7世紀，羅馬教宗改革教會，建立修道院，教階制度。同時定居西歐個日耳曼人逐漸拋棄異端，接受羅馬教宗個領導。東方個拜占庭帝國南部領土畀回教侵略占領。導致拜占庭帝國進一步希臘化。羅馬教宗開始不服從拜占庭皇帝個指示。到9世紀，羅馬教宗加冕法蘭克王國國王查理曼為皇帝。又過100年不到，加冕東法蘭克國王奧托為神聖羅馬帝國皇帝。替拜占庭分庭抗禮。1054年，羅馬替拜占庭相互絕罰對方個最高宗教領袖。東西教會正式分裂。

立在迭個階段，儘管存在對立替回教徒個侵略，但基督教個傳播一直嘸停歇。立在東面，亞述教會拿基督教傳播到中華帝國個核心地區，乃朝西安還有亞述教會（立在中國稱為景教)個碑文。立在北歐，橫行搶劫個維京人立在9-10世紀大部分儕皈依基督教。立在東歐，斯拉夫人替本來屬於游牧民族個馬扎爾人、保加爾人儕皈依基督教。基輔羅斯大公弗拉基米爾立在10世紀末期帶領羅斯人接受拜占庭個洗禮。

中世紀替十字軍

進入11世紀，基督宗教立在西歐建立全面個統治地位。因為個辰光西歐流行封建領主制度，城市流行自治制度。所以，只有教會成為涵蓋各個地區，提供交關服務個組織性機構。教會立在中世紀歐洲發揮邪氣巨大個影響，醫院、大學、乃至軍事組織當中，儕有教會個身影，各國君主加冕也需要教會出面才好算成功。這也讓羅馬教會積累交關財富。一些老羅馬貴族家庭立在7世紀就開始拿小孩送入教會，乃朝羅馬成為權貴個聚集地區。教會個腐敗現象開始滋生。一些修士對迭個現象邪氣弗滿意，伊拉成立自家個苦修組織。倡導回到基督教個本源。個當中，西多會替方濟各會影響頂大。教會對這些修士以禮相待，支持伊拉個舉動，弗過，對反抗教會權威個異端，則利用貴族替自家個軍事組織加以消滅。例如法國南部普羅旺斯個異端，就畀羅馬派遣個十字軍滅脫。

11世紀，東羅馬帝國立在小亞細亞慘敗，突厥回回開始湧入小亞細亞，拜占庭帝國無力防守東方穆斯林個侵略，所以懇請西方基督教會出力幫忙。1099年，教宗號召十字軍東征開始。十字軍勢如破竹，到1100年就占領耶路撒冷，解放當地個基督徒。並且立在地中海東岸，建立交關替拜占庭保持合作關係個基督教王國（例如邪氣有名個耶路撒冷王國)。十字軍個成功立在西歐掀起宗教狂熱。此後為保護聖地個基督教王國，先後又發動交關趟十字軍東征，弗過動機有好有壞，比方第四趟十字軍東征就是針對拜占庭帝國個，釀成災難性後果。到13世紀末，因為歐洲宗教熱情個減退，十字軍王國逐漸消滅脫哉。

十字軍東征樹立教會個權威，但到14世紀開始，反而成為教會個包袱。大量回到歐洲個十字軍成為當地一霸，最終只好靠秘密方式進行處決（聖殿騎士團畀人滅脫）。到14世紀，天主教本身發生教宗對立，西歐國家分為兩派，一部分擁護羅馬教宗，一部分擁護阿維尼翁教宗。此時，東方個東正教陷入水深火熱當中。突厥人開始大規模進入巴爾幹，立在1389年擊敗塞爾維亞之後，成為巴爾幹個主宰勢力。同時，北面個羅斯地區，立在13世紀畀內亞個蒙古帝國征服。到15世紀才徹底獨立。拜占庭個東正教立在回教個陰影下，交關希臘人替中東基督徒皈依回教。

宗教改革搭地理大發現

立在15世紀，基督教主要個範圍集中立在歐洲，東面、南面儕受到回教個包圍。弗過，立在15世紀當中階段，東面信奉東正教個莫斯科大公國統一俄羅斯，建立一個尊崇拜占庭帝國作為法統個東正教國家，並開始朝西伯利亞擴張。立在歐洲大陸西南面個伊比利亞半島，西班牙搭葡萄牙趕走回教徒。同時開始向大西洋探索。西班牙個哥倫布發現美洲之後，天主教開始大規模傳播，並讓當地本身崇拜自家神明個印第安人皈依。地理大發現擴充基督教個範圍，也讓基督教真正成為全球宗教。立在同一階段，因為羅馬教廷發生個一些權力分配毛病，立在德國個馬丁路德開始反對教宗，並且得到神聖羅馬帝國蠻多諸侯個支持，最後，演變成反對羅馬天主教個自我分裂運動。之後，又有加爾文之類個人響應，羅馬教宗搭西班牙國王卡洛斯一世想鎮壓，弗過同時又面臨奧斯曼帝國搭法國個威脅，弗好完全撲滅新教浪潮。到16世紀當中階段《奧格斯堡條約》簽署之後，新教分家已經形成定局。立在迭個階段，也發生英格蘭國王亨利八世因為自家婚姻搭財政，拿天主教驅逐，自立教會個事體。迭個事體也創造出乃朝個英國聖公會。

歷史

早期歷史

東西對立

中世紀替十字軍

宗教改革搭地理大發現

派別

內部連接

Wikiwand - on