屯粮巷村村委会

屯粮巷村，是上海市浦东新区高桥镇个一隻行政村。屯粮巷村村民委员会，简称屯粮巷村村委会^[1]，勒垃高桥镇和龙路685号。^[2]

村里向外地人邪气多，根據2011年个辰光个报导，屯粮巷村伊歇只剩两隻完整个村民小组哉，本地常驻个村民只有100多個人咾，暂住个外地人有2900個人，弄得村里向个环境一天世界，有常时还有治安咾刑事案件。^[3][4]

历史

老底子是月十图、九保。^[5]1959年建立屯粮巷大队，1984年改村制。^[6]:90

西宁王庙

村里向老底子有供奉张瑄个西宁王庙，中华人民共和国成立以前有迎神赛会，西宁王府旗号、灯笼，全写“张”字。^[7]文化大革命个辰光改成川沙县聋哑职业学校。^[8]

村宅（自然村）

• 潘家桥：垃屯粮巷村北面，明朝弘治年间形成个，宅前薛家浜丄有潘家石桥咾叫第個名頭。
• 小厍，垃屯糧巷村東北，明朝弘治年间形成个，因爲勒垃陸凌村南厍个北面，厍比较小咾叫第個名頭。
• 娘娘宫：垃屯粮巷村东南，明初形成个，宅里向老底子有天妃娘娘庙。
• 葛家宅：垃屯粮巷村东南，明朝景泰年间形成个。
• 西黄家宅：垃屯粮巷村西面，明朝弘治年间形成个，西面靠老护塘咾叫第個名頭。
• 屯粮巷：勒垃屯粮巷村当中，明初形成个，本来叫腾阳巷，传说韩世忠咾长毛全勒垃第个巷里向屯过粮咾改名。南面有长毛坟。
• 东朱家宅：垃屯粮巷村西北，明朝弘治年间形成个，是朱姓从苏北搬过来。
• 西朱家宅：垃屯粮巷村西北，是东朱家宅扩宅来个。^[6]:204