江戶

江户（えど）是日本个首都东京个旧称，也是在1603年到1867年期间江户幕府所在个场许。

江户图屏风丄好望见个初期个江户

作为江户时代日本个政治中心，尽管形式丄个首都是京都，实际丄向行政首都是江户。外加江户城是德川氏个居城，江户自身也是支配天领个德川氏个城下町，盖咾也有侬讴渠武阳（ぶよう）。到著幕末，政治中心移到著京都，第15代将军德川庆喜从来弗曾在江户住过。

弘化年间（1844年-1848年）改订个江户图

据1868年（明治元年）颁布个称江户为东京诏书，江户改称“东京”，后首天皇个东京行幸貤让江户城成为著东京个皇居。翌年，明治新政府也从京都迁到著东京，渠也成为著日本实际丄个首都。外加，因得改称东京咾，管辖町奉行支配地内个东京府厅也开厅哉（1871年，随着废藩置县改为著新东京府）。

江户个城镇大约摸好分成功两爿场许，即江户城西南面至北面个城镇（山之手），搭之东面朝牢著以隅田川为代表个河浜咾护城河个城镇（下町）。江户时期前期，一般性认为山之手是武家邸宅、下町是町人个町；但弗过到著中期后头因得人口增加咾，山之手有得町人町（千代田区个一部分）、下町有得弗少武家邸宅，实际丄个面貌也邪气复杂哉。

历史

德川氏前头个江户

从史料角度话起来，“江户”只地名头一趟出现是在镰仓幕府个历史书《吾妻镜》丄向，盖咾好认为渠是平安时代后期再有个地名。

只名字个来历有得各式各样个话法，弗过顶有力个是讲江是河浜咾海湾，户是入口，合在一淘便是“河浜个入口”。还有侬话“户”用作港城名字个蛮多，盖咾作兴是“河浜个港口”。当时辰光个江户在在武藏国搭下总国国境隅田川河浜口个西许，日比谷海湾则伸入著后首个江户城里势。

太田道灌

江户个开发是由秩父党一族开始个。秩父党来自平安时代后期武藏国秩父地区，经河越沿牢著入间川（玱期个荒川）进入平原地区，外加自称桓武平氏。12世纪，出身于秩父氏个江户重继在江户樱田个高台丄造著城馆（后首个江户城），外加还替自家儿子起名叫江户太郎，形成功著江户氏。渠场儿子江户重长1180年攻打源赖朝个辰光，以当初平家个身份搭赖朝个三浦氏相打；却情，后首貤和解著，成为著镰仓幕府里个御家人。弘长元年10月3日（1261年），因得江户氏一族一人个地头江户长重受正嘉饥馑打击，江户乡前岛村（玱期个东京驿附近）经营弗落去哉咾，捐畀北条氏德宗家并成为其被官，1315年前貤畀德宗家捐畀圆觉寺。昰歇辰光镰仓到奥州个街道，经横跨平川个高桥，通望鸟越（玱期个鸟越神社附近）、浅草。平川是流入日比谷海湾个，沿牢渠老里老早便有得海会村庄。老早底认为平川本生便是流经日本桥串个，乃朝再晓得渠是经江户城三之丸护城河、阿末再望日比谷海湾流得去个。

镰仓幕府倒慝后头，江户氏一族在南北朝骚乱里势跟牢新田义贞，𬮿著南朝个牌头，弗过室町时代便慢慢然衰败起来，到著战国末期则跑到多摩郡喜多见去哉。另外，照应永27年（1420年）纪州熊野神社个御师写个“江户人名目录”来望，江户氏一族个势力貤加是到著多摩川下游个大田区蒲田·六乡·原·鹈之木·丸子咾隅田川下游个金杉·石滨·牛岛，江户乡个国府方、柴崎、古川沿岸个饭仓、小石川沿岸个小日向、涩谷川沿岸个涩谷、善福寺串沿岸个中野，以及阿佐谷多个户荡。

同时，在在江户昰爿地方，关东管领上杉氏一族扇谷上杉家个有力武将咾家老太田资长（后首个太田道灌）进入，在江户氏个居馆遗址丄造起著江户城；照《镰仓大册》个话法，江户城长禄2年（1456年）始建，翌年完工。文明10年（1478年），太田资长剃著发，号为道灌，在以江户城为中心个南关东大显身手，直到文明18年（1486年）畀人家谋杀咾故慝哉。道灌时期平川也是流入日比谷海湾个，当中夹着只江户前岛，西半爿是日比谷入江，东许是江户凑，替之浅草凑咾品川凑一淘，并为中世武藏国个代表港口。江户咾品川靠近利根川（玱期个古利根川·中川）咾荒川个河口，是从北关东内陆到镰仓·小田原·西国方向去个水上交通中转场许。

太田道灌时代，京都因应仁之乱咾荒废哉，盖咾有得行情学者咾僧侣离开京都、投奔有权个道灌，乃便以平川个村为中心形成爻城下町。吉祥寺在当时个乡下头、玱期个大手町附近，在受令搬场前，旁边头全是墓地（玱期个“东京驿八重洲遗迹”）。法恩寺咾净土寺相传也是原本便在北许平川沿岸个城下町个。另外，战国时代还形成著叫“大桥宿”个宿场町，外加，江户城伉河越城组成川越街道咾、伉小田原组成矢仓泽往还也是昰只时期完成个事体，万里集九·宗祗·宗牧咾排文人个东国旅途里也常庄要去江户。

道灌死慝之后，扇谷上杉氏个头头上杉朝良因长享之乱只好隐居江户城。却情，后头朝良貤重握实权、在江户执政；外加，后继个朝兴担江户城替河越城一淘作为扇谷上杉氏在武藏国支配个据点。但弗过，渠在高轮原之战里败畀著后北条氏，江户畀后北条氏支配。后北条本生支配着相模国、伊豆国在哉，再一掌握江户，乃等于支配着东京湾（江户湾）个西半爿。盖咾东半爿个房总半岛各势力（小弓公方、里见氏）决心要替后北条氏对决。后北条氏末期，北条氏政直接支配咾统率著太田氏搭之千叶氏，渠管个场许包括著东京23区个隅田川西面、南面，搭之墨田区、川崎市、多摩地区各一部分。

老早子一径认为德川家康入城辰光个江户穷来像只寒村然介个。但近玱几年，有侬提出讲，照太田道灌搭之渠后首个扇谷上杉氏咾后北条氏个记录替古文书来望，在德川氏进去前头，江户便作为交通要冲发展起来在哉，种传统个相法弗过是为着要讲德川家康咾江户幕府个好言话。外加，因得太田道灌时代个记录里也有得赞赏道灌个要素，有侬疑心家康前头个记录可好作为史实。却情，乃朝一般性认为，在德川家康后首，江户在中世达成个一定成果上头貤有所发展。我伲好期待貤加多个中世期文书研究加入历史考古学，进行对家康前头江户个历史个进一步研究。

德川时代个江户

德川家康

实现担江户只城下町变成功巨大城市个，便是德川家康。

1590年，后北条氏在小田原征伐里势畀丰臣秀吉灭慝，渠个旧领封畀著德川家康。家康受开拓之命，担居城定在关东地区中心江户。同年旧历8月1日（八朔），渠从骏府移居哉，话是因得当时辰光江户城忒破旧。家康对江户城本城个建设弗多，着重建设城下町，削慝著神田山来填日比谷海湾，扩大城镇范围，替家臣咾镇民配置房子。工程一玱头赶光，盖咾恰恰填好个辰光地面还弗曾完全固定，干燥后畀风一吹，埲尘邪气结棍。昰个时期，江户城除慝原经便有个本丸咾二之丸，还有着西丸、三之丸、吹上、北之丸。外加开凿道三堀咾、担平川移到江户前岛中央部，乃朝个西丸下头有得一半以上埋在许（昰个时期个本城话个是里向本丸、二之丸搭之为著家康隐居造个西丸）。

1600年，在关原之战里家康获胜，掌控天下；1603年任征夷大将军，幕府所在地江户个重要性一期头提高，替服侍德川家个各个大名造著交关邸宅。弗单单是原来个大名住在江户，渠场个家臣咾家族，搭之德川氏个旗本咾御家人昰点武士也搬到著江户来住，还带得来交关同乡人，盖咾城镇扩大来邪快。

从爱宕山望江户全景图

另外，江户城搭护城河借着幕府从各大名许头课得来个手传普请得到著修缮，江户城搭之武家邸宅修成功巨大个坚城，外加造著担渠场围在许个大城郭。都市开发个历史在后头都市昰章再话。

1657年明历大火后，因得再建，整个市个范围超过隅田川、继续望东扩大。盖咾人口也弗断增加，18世纪初便超过一百万，大江户八百八町成为爻当时世界出名（也有侬话是世界第一）个大都市。人口个增大，让江户成为爻东日本顶大个消费地，外加也成为爻搭经济先进、替日本各农村连结个大市场上方（近畿地方）相连形成功个中间市场，有得邪气重要个经济地位。当时辰光个江户，畀葛饰北斋两国（玱期个墨田区）个《东都岁时记》咾《富岳三十六景》点作品描述成功是“东都”然个国际大都市。18世纪末19世纪初，江户成为著代替上方个文化中心，经济活动咾参勤交替也交关便当，行行情情个侬在江户替之地方往来，昰也带来爻一种文化个传播。却情，庞大个人口从农村流入江户，也造成功蛮多都市问题。

江户个识字率

幕末，江户男性成年人个识字率超过70%，傍同期个伦盾（20%）、拜利（10%弗到）好好较要高，达到世界丄顶高个水平。罗刹革命家梅掣尼科夫、道国考古学家世利孟全觉着然介个识字情况邪气惊人。外加因得寺子屋个普及、《御触书》个公开发表搭之《瓦版》咾《贷本屋》个繁盛咾，弗单武士，连得农民也会得吟和歌，多数町人全识字。弗过武士阶级人口本生便高咾使得识字率貤加高，实际丄当时日本全国平均识字率大概在20%到50%横里。明治时代后，根据征兵制实施辰光个调查，好读写实用文章个人有得望20%。

从江户到东京

明治天皇

庆应四年/明治元年旧历1月3日（1868年1月27日）个戊辰战争里势，鸟羽伏见之战里幕府军大败，萨长军逼近江户咾，渠陷入著面临战火个危险。昰歇，幕臣胜海舟搭率领萨长军、提议早期停战个西乡隆盛去交涉。同年旧历4月11日（5月3日），在末个将军德川庆喜无血开城降伏，尽管交战派替之官军原旧进行着上野战争，却情江户是逃过着战火（江户无血开城）。

同年旧历7月1日（5月12日），以町地为中心建立爻“江户府”。旧历7月17日（9月6日）“江户”改成著“东京”、“江户府”改成著“东京府”（称江户为东京诏书）。旧历10月13日（11月26日）明治天皇东京行幸，担“江户城”改为著“东京城”。翌年旧历2月19日（1869年3月31日），划定着新个朱引范围，旧历3月16日（4月27日）町地设五十番组制（五十区制）。旧历3月28日（5月9日），明治天皇第二𡉑行幸，称“东京城”为“皇城”，老早底将军住个江户成为爻天皇行在个东京（东京奠都）。旧历11月2日（12月4日），包括武家地个一眼场许也归著东京府管。明治4年旧历6月9日（1871年7月26日）貤改定着朱引，导入著建立在大区小区制丄个六大区制。

在同年旧历7月14日（8月29日）个废藩置县后头，旁边头交关户荡并到著东京里向；明治4年旧历12月27日（1872年2月5日），武家地、町地咾排名字全废慝哉。明治7年（1874年）3月4日，重新编成功著东京十一大区制，明治11年（1878年）11月2日东京十五区成形哉。后首，东京各城镇慢慢然变成功东京市、东京都，并逐眼扩大到著东京都市圈。原本江户里除慝隅田川东许个本所·深川个场许全变成著都心，起到著核心作用在许。

都市

明治期个东京市街（1890年）

江户个范围

江户昰爿场许也叫江户御府内，弗过渠个范围随时期各样。

江户时代初期，江户大概包括乃朝东京都千代田区替之渠周围，渠个外护城河也正是照昰个范围造个。明历大火后头，市区范围扩大，通称“八百八町”。1818年，据朱引个制定，江户市区范围正式确定。玱期话个“大江户”，基本丄便是昰只范围。

神社佛阁

神社

• 神田明神
• 山王权现（日枝神社）
• 根津权现（根津神社）
• 富冈八幡宫
• 筑土神社
• 鸟越神社
• 汤岛天神

寺

• 浅草寺
• 宽永寺
• 增上寺
• 感应寺
• 传通院
• 护国寺
• 泉岳寺

庙

• 汤岛圣堂
• 德川家灵庙

江户近郊

• 目黑不动（泷泉寺）
• 池上本门寺
• 柴又帝释天
• 东海寺
• 豪德寺 - 彦根井伊家个菩提寺
• 深大寺
• 国分寺

江户个日脚替之文化

《目黑新富士》

薄相

• 行乐（参诣、赏花、赏月、观枫、赏雪）
  • 江户近郊 - 飞鸟山、武藏野、深大寺诣上个小金井樱、富士冢
  • 江户至关东各处 - 大山诣上个富士讲
• 歌舞伎 - 市川团十郎 - 十八番、净瑠璃（人偶净瑠璃、常磐津咾啥）
• 落语、讲谈
• 锦绘
• 浮世绘 - 葛饰北斋、歌川广重、东洲斋写乐
• 黄表纸本 - 戏作、洒落本
• 俳谐 - 松尾芭蕉、小林一茶

• 

  代表江户时代町人文化个歌舞伎

  烟火 - 玉屋、键屋
• 净浴

著

• 衣裳
  • 振袖
  • 浴衣
• 鞋袜
  • 下驮 足驮 草履 雪驮

吃

• 江户前寿司（手握寿司・海苔卷）
• 荞麦面
• 天麸罗
• 百珍物（豆腐百珍、蛋百珍、萝卜百珍、甘薯百珍、蒟蒻百珍）
• 初（鲣鱼、落苏、酒、荞麦面）
• 泽庵渍（一种腌萝卜）
• 棒手振・振卖・行商人（盐・味噌・纳豆汁・豆腐・蚬）
• 泥鳅（柳川火锅、泥鳅火锅、油氽）
• 鳗鱼（江户前）
• 铜锣烧、今川烧
• 佃煮
• 纳豆
• 茶泡饭
• 新香
• 目刺（咸沙定鱼干串）
• 蚬汁
• 鹿・野猪猡
• 壶烧盐（上流阶级）
• 白米
• 猪排

担江户作题材个作品

小说

• 冈本绮堂《半七捕物帐》光文社文库
• 池波正太郎《鬼平犯科帐》文春文库
• 宫部美雪《本所深川异奇日记》新人物往来社
• 司马辽太郎《油菜花海》拢六卷 文春文库
• 半村良《小说 浅草向导》新潮文库
• 宇江佐真理《幻声 结发伊三次捕物余话》文春文库
• 那须正干《江户个百太郎》岩崎书店
• 畠中惠《娑婆气》系列新潮文库

随笔

• Edward George Seidensticker 《东京 下町 山之手》
• 宫部美雪 《平成徒步日记》新潮社
• 山本博文《鸢鱼读江户 江户学搭近世史研究》中公文库
• 山本博文《享乐江户 三田村鸢鱼个世界》中公文库

影戏 电视剧

• 《写乐》 导演：篠田正浩
• 忠臣藏相关作品
• 鬼平犯科帐系列
• 钱形平次系列
• 半七捕物帐系列
• 水户黄门系列
• 大江户搜查网系列
• 长七郎江户日记系列
• 暴徒将军系列
• 《红胡须》 导演：黑泽明

出名人物

• 沼间守一 - 政治家、新闻从业员。牛込
• 大田南亩 - 戏作家。牛込
• 夏目漱石 - 作家。早稻田
• 津田梅子 - 教育家。南御徒町
• 青木昆阳 - 儒学家、兰学家。日本桥
• 中沢彦吉 - 政治家、实业家。京桥
• 星亨 - 政治家。筑地小田原町
• 榎本武扬 - 幕臣・政治家、虾夷岛政府总裁、第7代外务大臣。下谷御徒町
• 成岛柳北 - 新闻从业员、戏作家。浅草御厩河岸
• 幸田露伴 - 小说家。下谷三枚桥横町
• 高村光云 - 雕刻家。下谷
• 河合浩蔵 - 建筑家。本所
• 佐々木东洋 - 西医、内科医生。本所

小江户

江户个一大特征是渠个城个城河浜搭之仓库全多来邪邪气气，盖咾替渠相似个栃木市、埼玉县川越市、千叶县香取市个旧佐原市市区咾排关东地区个河港都市也畀人家讴作“小江户”。

另外一个，也有得相对后期扩大著个江户城下町即“大江户”，叫前期个江户城下町“小江户”个。