江镇

江鎮，原名江家路口，乃朝勒垃上海市浦東新區祝橋鎮東南部，川南奉公路江鎮河交會處，是老底子江鎮人民政府個地方。歷史丄，清雍正年間，姓江個人勒垃箇𡍲開店，又因為伊勒垃過欽公塘個道口丄，故咾叫箇個名字。江鎮沿咾川南奉公路南北向分布，面積41公頃。十字形主街丄商店多，有得紡織機械、五金、毛巾、塑料、絲綢、服裝等廠。土特產是蘆花掃帚。^[1]

1930年前後，江鎮經六團、川沙到十六鋪個小班輪開通哉。1936年3月份，上川鐵路橫穿江鎮，一路望南延伸到南匯縣祝橋。^[2]1937年淞滬會戰，火車弗得弗停運，江鎮也變得唻一塌糊塗。

江鎮鄉原本是南匯縣祝橋區個，1950年劃畀川沙縣，成立江鎮區，1954年劃畀城南區，1957年撤區並鄉，成為江鎮鄉。1958年人民公社化，成立躍進人民公社，後首來改名江鎮人民公社。1984年政社分設，重建江鎮鄉，有江鎮、華路、沙泥碼頭三隻集鎮。^[3]

1995年，浦東新區撤鄉建鎮，江鎮鄉改名江鎮鎮。1998年9月7號，經上海市府批准，撤銷江鎮、施灣鎮，合併建立機場鎮。^[4]2005年，機場鎮同川沙鎮合併成立川沙新鎮。^[5]2011年，川沙新鎮、祝橋鎮、六灶鎮「撤三並二」，成立新個川沙新鎮搭仔祝橋鎮，江鎮社區劃畀祝橋鎮。^[6][7]