海宁市

海寧有牢浙江省個北面頭，嘉興市個南面，錢塘江北岸。市治有牢硤石（老百姓習慣個叫法，厄息實際上是海州街道）。到2005年12月31號為止，海寧全市總面積699.92平方公里，人口一搭刮子64萬，下頭管牢4個街道、8個鎮。

地理

海寧個搭地方，地形狹長，過東過西51.65公里，上南落北28.94公里。地勢比較平坦，從西北到東南向斜落去，地面高程4公尺到8公尺（吳淞高程。下底一樣）。古陸殘嶼搭低丘集中分布牢海寧格東北搭東南兩塊地方。頂頂高個山是高陽山，海拔253.3公尺，另外個山丘儕勿到200公尺。

歷史

海寧也是一座歷史文化名城，是良渚文化發源個場化之一。大約摸子六七千年前頭個新石器時代，海寧個搭地方就有人勒。夏朝個辰光，海寧算牢「天下九州」之一個揚州里向。春秋戰國個辰光，先後歸牢吳國搭越國。那麼吳國產棄之後麼歸楚國勒。秦朝辰光，是長水縣個縣治。三國吳黃武兩年開始叫做鹽官縣。元朝元貞頭年升做鹽官州。為仔錢塘江潮水成災個緣故，為勒祈禱「海濤寧謐」，有牢元朝天曆兩年個辰光改名字叫海寧州，那麼箇個名字一直用到今朝。中華人民共和國成立仔，設為海寧縣。1986年11月，經過國務院個批准撤縣設市。歷史浪海寧縣治基本浪儕有牢鹽官，1949年6月之後設垃硤石。

文化

海寧有幾千年吳越文化個深厚積澱，形成勒交關有名堂個海寧「三大文化」，叫做潮文化、燈文化搭名人文化。歷史浪個名人，有談遷、陳元龍、查慎行、李善蘭、王國維、徐志摩、蔣百里咾啥。

海寧個城市名片有海寧潮、鹽官古城、海寧中國皮革城等特色搭景點。