湖南省

湖南省（湘語長益片新派長沙話：13</sup> lã¹³ sən⁴¹/"}},"i":0}}]}' id="mwRg">/fu¹³ lã¹³ sən⁴¹/），別稱楚、湘楚，三湘四水，是中國一個省份，簡稱湘，勒世界第三大河長江個中游，洞庭湖邊浪。省會是兩千年個古城長沙，省政府來勒於長沙市天心區湘府路。省花是芙蓉（木芙蓉），所以也稱作芙蓉國。

湖南省
簡稱：湘
省會	長沙
面積 - 總面積 - 佔全國面積％ - % 水域面積	第10位 211,829平方千米 2.19% xx%
人口 - 總人口 (2003年底) - 佔全國人口％ - 人口密度	第5位 6500萬 5.19% 325／平方千米
國內生產總值 - 總值 (2005年) - 佔全國生產總值％ - 人均國內生產總值	第9位 19670億人民幣 4.17% 29880人民幣
行政區類別	省

歷史

主文章：湖南歷史

常德會戰

第二次長沙戰役

南楚故地

來勒上古辰光，湖南地區就有人類活動。到原始社會辰光，有三苗、百濮搭揚越（百越）等部落活動，是南方人種創造文明個一個重要通道。根據現在個考古結果，來勒寧鄉縣、安鄉縣、津市市、澧縣、道縣搭平江縣等地，有考古挖掘出土個交關文物作為迭段辰光個證明。到一萬多年前，此地個人類就開種植大米，到五千多年之前個新石器時代。湖南地區個古人類開始定居生活。

到春秋辰光之前，湖南地區大致處於迭個一種半開化個狀態當中。人口也比較稀少。主要活動範圍弗會超過當今個長株潭地區。雖然根據中原民族個神話，此地來勒夏、商搭西周辰光已經是伊拉九州當中個荊州南境。弗過來勒春秋中期之前，即便是屬於半蠻夷個楚國人，也沒對此地有多少開發。一直到戰國辰光開始，此地才因為楚貴族個擴張被歸納到楚國個範圍之內。楚國人來勒長沙-岳陽地區有交關活動，拿璀璨個楚文化傳播到湘江流域，湖南個人口、語言、文化從迭個辰光開始奠定基礎。湘楚也成為湖南個核心文化。

帝國更迭搭開發

秦始皇來勒公園前220年左右征服整個東亞大陸。拿湖南也包括到伊個帝國之內。拿此地設黔中、長沙兩郡；拿之後個漢帝國辰光，此地成為長沙王個封邑。弗過漢武帝削藩，之後此地屬於荊州刺史轄區，轄長沙國、武陵郡、桂陽郡和零陵郡；東漢辰光，此地變動比較少。三國辰光吳國荊州，為荊南五郡；西晉時分屬荊州和廣州；東晉時分屬荊州、湖州、江州；南朝宋、齊、梁時分屬湘州、郢州和小部分荊州，南朝陳個辰光屬於荊州、沅州；

隋文帝統一東亞，建立第二帝國個開皇九年(589年)平南陳，拿湖南境內設長沙、武陵、沅陵、澧陽、巴陵、衡山、桂陽、零陵等八郡；到唐朝辰光，唐玄宗開元二十一年(733年)屬山南東道、江南西道和黔中道、黔中道黔州都督府，到唐代宗廣德二年（764年）來勒衡州置湖南觀察使，從此來勒帝國行政區劃史上開始有「湖南」個名字；弗過，迭個辰光個湖南還是一個典型個荒蠻地區，有一個叫做破天荒個詞彙，就是形容湖南人考科舉總算考上個典故。柳宗元等文人，認為流放到湖南是去煙瘴之地。弗過，杜甫等人，還是來勒湖南留下交關美好個詩句。杜甫有一個墳墓，就來勒湖南。到五代十國時期，楚王馬殷來勒湖南地區為根據地，建立楚國，國都為長沙。馬王保境安民，讓湖南來勒此段辰光有大發展。長沙個馬王堆就是伊拉個遺物。湖南個人口，也從唐朝末年個百萬人增長到北宋初年個兩百多萬，因此，馬王堆湖南個發展有深遠個貢獻，湖湘文化也來勒迭個辰光開始有雛形。

宋元辰光個動盪搭發展

北宋辰光，湖南被囊括到帝國範圍之內。根據帝國個行政劃分，湖南分屬荊湖南路搭荊湖北路。此事，洞庭湖區有大規模開發，湖南個農業開始有大發展。全國個地位迅速上升，成為一個有名個農業省份。到北宋後期，湖南當地個士紳階層開始形成。因為來勒苗族邊界個關係，當地個居民一直要搭少數民族發生衝突。環境也弗是老好，所以湖南個儒家知識分子對經世致用個物事邪氣關注。宋代形成個全國四大書院，湖南就有二個。到北宋末年，湖南人口達到570多萬。北宋末年，湖南爆發民亂，被岳飛鎮壓。到南宋辰光，嶽麓書院成為帝國乃至東亞首屈一指個學術中心，有名個大儒朱熹，就曾來勒此地講學多年。

蒙古人個入侵把湖南帶來交關屠殺。人口減少交關。到蒙古建立伊拉個元朝之後，拿湖南併到湖廣等處行中書省（省會武漢），設湖南宣慰司，來勒衡州（後遷治潭州）；到明朝辰光，朱元璋對湖南地區個居民展開迫害，殺脫幾十萬人。又藉口湖南人口太少，拿湖南搭現在個湖北省併到一道，設置湖廣布政使司（省會武漢）；湖南因為喪失獨立，來勒經濟搭發展高頭儕受到交關影響。明代個湖南，頂重要個事體就是帝國對湘西苗蠻個滅絕搭驅趕。弗同與老早個湖南人，帝國通過移民其他地方個居民，建立類似雲南地區採用個碉堡政策，壓縮苗族個生存空間。所以，湘西個居民儕講當時駐紮部隊個通用語：西南官話。

帝國辰光湖湘文化個形成

明朝末年，朝代更迭，滿洲帝國南下部隊，對湖南展開屠殺。有湘潭屠殺一次性死脫十幾萬人。到清康熙三年（1664年），根據湖南人個抗議，滿洲大皇帝終於分湖廣為湖廣左、右布政使司，其中右司下頭有長寶、岳常澧、衡永郴桂、辰沅永靖4道搭長沙、寶慶、岳州、常德、衡州、辰州、沅州、永州、永順九府。清世宗雍正元年（1723年），終於湖廣右布政使司為湖南布政使司，遷長沙，湖南擺脫湖北個管制，正式成為獨立個實體。

從明末開始，湖南就形成自家個獨特性格搭方式，王夫之來勒明末個學術成果，拿儒家個經世濟用搭湖南本地個湖湘文化結合，形成狂放，實用，浪漫，灑脫個性格，對湖南士紳產生巨大影響。清代個湖南，因為閉關鎖國個關係，湘江流域成為長江向廣州輸送貨物個要道，開始走向繁榮，湘潭、衡陽等地個船舶儕有上萬條，洞庭湖高頭一碧萬頃。農業迅速發展，湘江以西個地區開始廣泛分布人口。到19世紀初，湖南人陶澍坐上總督大位，伊搭林則徐關係邪氣好，對後來個湘軍人物儕有提攜，比如左宗棠，就是伊個女婿。

近代個強勢崛起

1840年之後，帝國動盪，湖南來勒千年個積累之後，終於來勒近代歷史當中大放異彩，成為數一數二個省份，對帝國個發展產生根本性個影響。1852年，曾國藩受命來勒衡州組建湘軍，鎮壓太平天國暴亂。來勒十餘年個征戰當中，湘軍成功拿長毛賊平定，弗僅讓湖南省免於長毛個屠宰，也拯救東南各個省個人民。到1870年代，左宗棠又率領湘軍遠征陝甘，平定陝甘回亂，拯救當地個漢族百姓。之後，左公跨過河西走廊，滅脫來勒新疆個阿古柏回教政權。湘軍來勒建立功勳個同時，讓滿洲帝國個軍事權利搭行政權力被地方政府剝奪交關，到1870年代，全國三分之一個總督搭巡撫儕是湘軍老早個成員。軍事搭權力也讓湖南積累原始財富，能夠修建交關學堂，讓湖南年青一代受到比鄰近幾個省份好交關個教育。為之後個人才湧現打下基礎。

來勒1898年，湖南是唯一支持戊戌變法個省份。1899年和1904年，岳陽、長沙先後被開闢為商埠，常德、湘潭增列為「寄港地」。1903年，長沙人黃興搭宋教仁創立華興會，成為同盟會搭國民黨個主要創始人之一。到1920年代，湖南來勒趙恆惕將軍個倡導下，成為聯省自治頂成功個省份，並且通過自家個憲法。^[1]。 1926年－1927年，北伐戰爭當中，湖南農民運動聲勢頂大，農會成員發展到600萬人。之後，湖南被何健將軍實際統治。1936年，粵漢鐵路全線通車。抗日戰爭當中，國民黨蔣介石個軍隊來勒湖南省境進行過幾次極其慘烈的抗擊日軍個戰役，包括長沙會戰、常德會戰，衡陽戰役搭湘西會戰等。1938年，來勒「焦土抗戰」個錯誤口號下，安徽人張治中燒脫長沙城，事後竟然沒有懲罰，迭個事體被稱為文夕大火。1944年，千年古城衡陽毀於衡陽保衛戰，全城僅剩三棟殘牆。

1946-1949年個內戰當中，湖南人來勒國共兩方軍隊裏向儕佔據重要位置。1949年10月1號，出生湖南湘潭韶山沖個毛澤東來勒北京建立中華人民共和國。

地理

主文章：湖南地理

地形地貌

湘西個武陵源

湖南個東、南、西三面儕有山地包圍，省份個中部搭北部地勢低平，是馬蹄形個丘陵型盆地，屬於江南丘陵地帶。省內個西北面有武陵山脈，西南面有雪峰山脈，南部有五嶺山脈（即南嶺山脈），東面挨牢湘贛交界個羅霄山脈。來勒省份個中心地區，地貌大多是丘陵、盆地搭河谷沖積平原，除脫南嶽衡山山脈高達千米以外，其他地區儕來勒海拔500米之下，頂高個山峰是炎陵搭井岡山交界個井岡山，海拔2122米。湘北有勞大個淡水湖洞庭湖、還有因為湘、資、沅、澧四水尾閭個河湖沖積平原，地勢邪氣低，一般來勒海拔50米以下，所以，湖南個水系呈扇形狀匯入洞庭湖。

湖南以中低山與丘陵為主，丘陵面積有14.9萬平方公里，佔整個省份個70.2％；崗地搭平原約為5.2萬平方公里，佔24.5％；江河湖泊水域面積約為1.1萬平方公里，佔5.3％。湖南是東南個終點，西南個邊界，來勒一般個定義上被認為是中南地區，弗過實際高頭東西個差距要大於南北個差異。湘江流域是湖南個核心地區，過脫邵陽-婁底一線，文化搭地貌就跟貴州等地比較相似哉。湖南個臨近省區有廣東省、江西省、湖北省、貴州省、廣西壯族自治區搭重慶市。

湖南屬於江河中下游流域平原(長江、湘江)等搭檔高原地台帶（雲貴高原）個過渡地帶，所以地理景觀有勁，人文也很有特色：平原經濟發達地區文化和封閉的山地文化個交融。

江河湖泊

湖南河網縱橫，省份內基本上儕是洞庭湖水系，長度5公里以上個河流有5341條，其中以湘江、資江、沅水搭澧水四條河流最大。源自廣西東北部海洋山西麓個湘江全長856公里，為本省流量最大、經濟價值最高、流域最廣個河流；沅水，源自貴州個雲霧山，全長有1033公里，是湖南境內頂長個河流，流量僅次於湘江。

洞庭湖為湖南最重要個湖泊，北接松滋、太平、藕池和調弦（已堵）四口納長江洪水，從岳陽城陵磯匯入長江，有調節長江水量個重要作用，由於江河的沖淤和人工圍墾，湖面逐年縮小。

氣候

湖南是典型個亞熱帶季風氣候，四季比較分明，氣候溫暖，潮濕。有點悶。年均降水量1300-1800毫米，自東南向西北遞減。年平均氣溫16-18°C。極端最高氣溫43.7℃（1951年8月7日，永州），極端最低氣溫-18.1℃（1969年1月31日，臨湘）。

自然資源

湖南礦產資源豐富，是南方，尤其是東南地區礦產資源頂多個省份。已探明個有色金屬礦產有37種。鎢、鉍、銻儲量居全國之首，釩、錫、石墨、重晶石等礦產儲量豐富，居全國前列。大型礦山有世界銻都錫礦山、世界有色金屬博物館柿竹園、水口山鉛鋅礦等。

行政區劃

當今個湖南省，下頭管轄13個地級市搭1個自治州，從更次一級個角度看，總共有35個市轄區、16個縣級市、64個縣、7個自治縣

• 地級市：長沙市、常德市、郴州市、衡陽市、懷化市、婁底市、邵陽市、湘潭市、益陽市、永州市、岳陽市、張家界市、株洲市
• 自治州：湘西土家族苗族自治州

人口

武陵源個雲霧

鳳凰縣沱江段

天心閣

湖南省博物館

嶽麓書院

湖南來勒歷史高頭人口一直弗多，弗過，自從清朝開始，因為番薯搭辣椒引入個關係，人口開始快速增加。當今個湖南，是中華人民共和國人口人口數量老大個省份，到2013年末，湖南總人口已經突破7000萬人，拿旁邊個江西省、湖北省、貴州省儕超過，只比流動人口湧入個廣東省要少。

湖南是一個南方省份，人口密集個程度邪氣高，現在平均每平方公里有319人，高出全國平均人口密度1倍多。全省人口當中，城鎮人口有2752.91萬人，鄉村人口4052.79萬人，老年人口佔全省人口個8.98％。2007年，全省人口出生率為11.96‰，人口死亡率為6.71‰，人口自然增長率為5.25‰。2012年末全省總人口7179.9萬人，常住人口6638.9萬人。人口出生率13.58‰，死亡率7.01‰，人口自然增長率6.57‰。

湖南有1個特大城市，就是省會長沙，還有4個大城市岳陽、株洲、湘潭、衡陽。長株潭構成湖南城市化個核心地區。

文化

湖南屬於東南文化個一部分，歷史高頭受到楚文化、江右文化、吳越文化個影響，搭自家老早個底層文化相結合，形成具有鮮明特點個湖湘文化。湖南擁有自家獨特個語言湘語。飲食高頭遺傳上古個風格，歡喜重辣煙熏個食品。湘菜也是東亞有名個菜系之一，偏好香辣。

湖湘文化

湖湘文化個發端源於北宋辰光，來勒湖南地區，文化個發展受到五代十國辰光楚國個大力推動。到北宋末年，湖湘學派個出現讓楚文化來勒湖南有進一步發展。北宋末年開始，因為通古斯女真人個南下，北宋帝國瓦解。大量中原地區個居民南下，來到江南，江南本地居民也因為人口壓力向江西遷徙，其中一部分又來到湖南，形成湖湘文化個基礎。這些移民，多數具有典型個耕讀特徵，歡喜儒學，湖南個農村儒學發展從此才算真正開始。來勒文化重心南移個歷史進程當中，雖然湖南並沒有同樣屬於東南個江西箇浪成為一個重要個文化中心，弗過，儒學發展也進入快速進程。到南宋，湖南成為以儒學文化為正統個省區，被稱為"瀟湘洙泗", 因為地理環境個原因，湖湘文化重視「經世致用」，擁有典型個「先天下之憂而憂」個性格特徵。湖湘文化個表現形式是整個湖南相當常見個書院教學模式，湖南著名個城南書院、嶽麓書院、石鼓書院長期被認為是儒家文化個中心搭宣傳基地。17世紀王船山個出現讓湖湘文化具備全面個理論體系。湖湘文化個典型表現是重視學問，實用，對美感有敏感個直覺，弗過輕視經濟、管理之類個學科。

軍事傳統

雖然湖南來勒歷史高頭受到東面江西搭浙江移民邪氣大哥影響，弗過因為楚文化個底層基礎搭長期處於向西爭奪生存空間個原因，湖南人邪氣重視軍事訓練搭民團構建。因為湖湘文化當中個實用主義，湖湘地區個知識分子儕對文武雙全個形象充滿嚮往，對來勒自家家鄉編練民團老有興趣。老早個湖南，因為移民搭本地土著關係緊張，經常有械鬥發生。這也為湖南崇尚軍事提供基礎。到18世紀，來勒帝國官方個號召下，湖南人弗斷向南面搭西面擴展土地，擠壓苗族、瑤族個生存空間。同一辰光，會黨組織也來勒湖南有大規模個發展。到19世紀個辰光，湖南已經形成大規模練兵個模式，這也為後頭湘軍個輝煌提供基礎。到20世紀，湖南個將軍層出弗窮，也是受到軍事傳統個影響。

言話

湖南境內個語言以湘語為主。來勒東部一些地方使用贛語，來勒南面用湘南土話，來勒西面有西南官話、瓦鄉話或客家話等少數語言。除此之外，還有包括苗語、勉語（瑤語個主要分支）、侗語搭土家語等少數民族語言。

湘語是湖南自家獨特個語言，是老早楚國語言個嫡系後裔。來勒2000多年之前，通過當時個楚國移民傳播到湖南境內，搭境內個百越方言融合，形成湖南語言個前身。之後歷朝歷代個戰亂讓楚國發源地個人口搭文化徹底變脫，卻讓湖南保存大部分楚國文化。現在個湘語，使用人口有4000多萬，分布來了湖南省大部分地區搭廣西、廣東個個別地區。現在通行個西南官話也受到湘語老大個影響。弗過，因為近來推普個影響，湖南交關年輕人儕弗會講本地語言，開始講口音老重個塑料普通話，這一現象來勒長沙等大城市尤其嚴重。

名人

因為經濟發展比較緩慢，還有帝國燒殺帶來個蕭條。湖南來勒歷史高頭並弗是一個經常出現有名人物個省份，一直到清朝辰光，來勒18世紀後半期，湖南開始湧現一批有能力個士大夫，伊拉為後頭個湖南發展奠定堅固個基礎，讓湖南到20世紀上半期出現交關名人，深刻改寫中國個歷史。

清朝之前個名人

• 懷素——著名書法家，草書為唐朝一絕
• 歐陽詢——著名書法家。
• 王夫之——重要個思想家。

近現代個名人

• 陶澍——清朝中後期個能吏
• 曾國藩——鎮壓太平天國運動個大儒
• 左宗棠——平定回亂、擊敗阿古柏個名臣
• 黃興——中國國民黨初期重要人物
• 蔡鍔——護法戰爭領導者
• 齊白石——國畫大師
• 毛澤東——中國共產黨首任中央委員會主席
• 宋祖英——現代著名歌唱家