蔣中正

蔣中正（1887年10月31號—1975年4月5號），字介石^{[注 1]}，浙江奉化人（屬吳越人），中華民國政治人物、軍事人物，從1927年開始間斷性成為國民黨黨魁、國民政府領導人將近半個世紀。

1943年蔣中正就任國民政府主席辰光個肖像

生平

早年

伊勒奉化一個商人屋裡出生，爸爸老早就死脫，從小養成堅韌但歡喜搞事體個性格。

留學日本

年輕辰光留學日本，日文弗曾學到多少，軍事知識也只學到初級軍官個級別，但勒迭個階段結交張群，並勒浙江老鄉會當中接受反清個興中會革命思想，拜陳英士做自家大哥。

參與辛亥革命

之後跟牢孫中山參加反對清帝國個活動，1911年，勒陳其美安排下，

上海生活

中華民國建立之後，伊經常蹲勒上海，同杜月笙、黃金榮之類個黑社會人物關係密切，並參加證券投機活動。偶爾跑到廣東去，幫助孫中山搞搞革命。

成為校長

1920年代初，孫中山決定同蘇聯進行合作，交關國民黨內部個派系反對，但蔣中正表現個邪氣積極，得到孫中山信任，之後個中山艦事體之後，更成為孫中山勒軍事上依賴個人物，成為黃埔軍校個校長。1925年孫中山死脫，蔣中正通過權變，控制廣東個國民黨集團軍事權力，成為同廖仲愷、汪精衛、胡漢民差弗多登基個人物（後三個儕是孫中山歡喜個廣東人，孫中山從來弗曾明確講讓蔣中正繼承伊個地位）。

北伐搭下野

1926年7月，蔣中正就任國民革命軍總司令，開始北伐。因為個辰光北洋軍閥混戰結棍，加上伊個部隊有蘇聯人幫忙個政治教育，所以戰鬥力蠻強，無幾個月頭就推進到長江流域，迭個階段，蔣中正開始搭江浙地區個名流接觸，讓自家勒南京另外成立一個中央。1927年4月，蔣中正勒上海清黨，搭中國共產黨決裂。之後寧漢合流，但蔣中正下野。

重新出山搭新軍閥混戰

1928年，蔣中正重新出山，成為南京國民政府個軍事委員會主席（也是伊「委座」稱呼個由來），先後同廣西個桂系（李宗仁、白崇禧），以及北方個晉系（閻錫山）搭西北軍（馮玉祥）爆發衝突，發生蔣桂戰爭、中原大戰。因為拉攏東北個張學良，蔣中正勒此類混戰當中儕取得勝利。此外，伊搭廣東系個實力也關係搭僵，先後發生軟禁胡漢民、逼迫汪精衛下台，以及兩廣事變。同一階段，伊也積極進行剿共，但失敗過好幾趟，到1934年第五趟個辰光，才勒德國專家個幫助之下成功。

西安事變搭對日戰爭

1936年西安事變之後，蔣停止剿共，同意抵抗日本侵略。1937年盧溝橋事變之後，蔣中正勒江西廬山發表講話，號召對日本全面戰爭。之後，蔣中正拿精銳部隊儕派到上海周邊，對日本進行淞滬戰爭，但最終失敗，只好撤退到武漢，後首來又撤退到重慶。迭個階段，國民革命軍個部隊勒各個戰場儕總體失敗，但依靠體量比較大個關係，還是讓日本弗好徹底拿伊消滅。1941年太平洋戰爭爆發，蔣中正得到美國個幫忙，實力有一定恢復，但伊本人搭美國人派來個第五戰區參謀長史迪威關係搭僵，對美國個觀感，也比較一般。1945年，美國對日本戰爭獲勝，蔣中正也順帶獲勝，個也是伊威望個頂點。

戡亂戰爭

戰後中華民國制定憲法，蔣當選行憲後第一任總統。勒第二次國共內戰當中，因為交關原因，國民黨軍隊勒東北地區、華北地區儕輸把共產黨，並且因此喪失大部分精銳部隊。蔣中正只好第三趟下野，讓李宗仁接替擔任總統。弗過，下野之後個蔣中正，積極謀劃跑到台灣。1949年4月，南京失守，李宗仁搭其餘個部長跑到廣州，弗過，無幾天，交關人就到台北去拜見蔣介石哉。之後，李宗仁跑到美國弗回來，蔣介石就勒台灣重新上台，自稱恢復自家職務，重新成為總統。

威權台灣

勒台灣，蔣仍舊以總統身份勒台上，並且勒老百姓當中，拼命打造自家個領袖形象，強制壓迫台灣本地人、本地言語、本地歷史記憶，強行推廣長城長江為代表個中華民族大一統記憶。勒職務上，一腳到1975年過世，伊從來弗曾退位，弗過到晚年，有意識培養自家長子蔣經國接班。勒台灣個廿幾年當中，蔣中正一直號稱要反攻大陸、反共復國，但從來弗曾進行真正個大規模軍事活動。

屋裡

1927年12月1號，蔣中正搭第四房老婆宋美齡搞婚禮

蔣介石個屋裡，是世代立在浙東明州府下頭奉化縣居住個吳越人。伊個爸爸叫做蔣肇聰，1895年死脫。媽媽叫做王采玉，1921年死脫。1901年，蔣中正立在媽媽個安排下頭，搭毛福梅成親，毛福梅是伊個原配。弗過，蔣討厭迭個包辦婚姻，對毛福梅也無多少感情。之後伊離開溪口鎮後，毛福梅一直搭王太夫人合住。但毛福梅還是幫伊生下唯一個合法親骨肉蔣經國。

1911年，蔣中正拿姚冶誠變成自家個側室。弗過，讓伊蹲在蘇州，弗去奉化。迭個辰光，蔣立在日本。搭戴季陶關係密切。同時搭戴季陶個女伴重松金子也有過關係。重松幫戴季陶生下一個兒子。過繼畀蔣中正。蔣拿迭個小孩交畀姚撫養，個就是後勢來個蔣緯國。

1921年，蔣介石追求女學生陳潔如得手，就弗管之前個婚姻，鋪開老大個場面，立在上海永安大樓舉辦大型婚宴，讓張靜江見證自家搭陳潔如個婚禮。弗過，之後，因為蔣中正個地位攀升，伊又想攀上新個家族，獲得更加大個政治資本，個能。到1924年個辰光，伊開始自家追求宋美齡。到1927年，強行拿陳潔如送到美國。隨後，立在自家下野個辰光，宣布搭宋美齡結婚。

1927年12月1號，蔣中正搭宋美齡立在上海結婚，同時搭之前個三個老婆儕離婚。按照宋家個要求，蔣還皈依基督教，成為基督徒。1930年10月受基督新教洗禮^[1]:187。

著作

蔣中正歡喜寫日記，也寫過一些其他材料，包括《西安半月記》、《中國之命運》，《蘇俄在中國》之類。

蔣介石日記

蔣介石日記是蔣中正所寫日記個匯編，乃朝由美國史丹佛大學胡佛研究所圖書檔案館收藏，已允許研究人員閱覽。^[2]:10

飲食

蔣介石歡喜吃個物事是雞蛋搭雞湯。蔣介石對雞湯個歡喜是有名個。早浪吃飯儕會吃一碗溫度蠻高個雞湯。中餐搭晚餐也基本靠雞湯調味。因為牙齒、腸胃儕弗靈光，蔣介石也歡喜吃芋頭，伊歡喜吃雞汁芋頭，也歡喜吃芋頭白菜搭芋頭青菜。蔣介石吃肉老少，吃雞蛋是解饞。也歡喜吃筍。歡喜油燜鮮筍，筍尖炒豆腐。立在水產當中，蔣介石歡喜吃西湖醋魚搭寧波特有個一些海鮮。

註釋

1. 名、字典出《易經》豫卦六二：「介於石，不終日，貞吉。象曰：不終日，貞吉。以中正也」