2025年堪察加半岛地震

2025年堪察加半島地震發生勒協調世界時2025年7月29號23:24（堪察加辰光（UTC+12）2025年7月30號11:24），地震矩規模8.8，是大型逆沖區地震，震中勒垃俄羅斯堪察加半島東岸個阿瓦恰灣，引發場破壞性海嘯。^[1]

箇篇文章記錄着一樁地震。信息作興會得搭牢事體個發展豪𢜶變化。 (8月 2025)

美國地質調查局提供個箇趟主震震度分布圖，震中用五角星標出來

地質背景

參見：太平洋板塊搭鄂霍次克板塊

堪察加半島勒垃太平洋板塊、鄂霍次克板塊當中，老底子勒垃1737年、1923年、1952年發生仔三趟有記錄個大地震。勒垃箇地震前十日天裡向，同一片地方還發生多埭里氏震級6.0以上個地震。

地震震源勒垃千島海溝里向，是北美洲板塊搭仔太平洋板塊當中個隻大型逆沖斷層、板塊擠壓邊界，從千島群島東海岸望東北一路延伸到堪察加半島。白堊紀到現在，箇隻消亡邊界長日活躍，上一趟差弗多規模個大地震是1952年北庫里爾斯克地震。^[2]

震後影響

俄羅斯

震中附近個堪察加彼得羅巴甫洛夫斯克海岸監測到3到4米個海嘯，引發停電，至少4人受傷。^[3][4]勒垃千島群島個北庫里爾斯克更是覷到5米高個海嘯，全城近九成建築物毀脫。^[5]地震過仔麼，俄羅斯堪察加半島個活火山克柳切夫火山開始噴發，火山灰衝到火山口上方毛6000米。^[6]

日本

氣象廳因為堪察加半島附近發生強烈地震，勒垃多塊地方發布海嘯預警^[7]。日本當地辰光上半日10點鐘開始，日本太平洋邊會得碰着1米高個海嘯，後來估北海道到和歌山縣沿海個海嘯高度有得3米，提醒老百姓連忙去高地方避難，離開海岸、河口區域，弗允許去海邊。^[8]當地辰光下半日1點52分，岩手縣久慈港記錄到高1.3米個海嘯。^[9][10]

交通方面，仙台機場個跑道因為海嘯臨時關脫，JR東日本、JR東海、JR北海道個相關鐵路線路也停運哉。^[11]

東京電力公司發布消息表示，9點05分左右，因為隻海嘯，拿福島第一核電廠核污水排海個生活停脫。^[12]

中國

箇趟地震預估會得對中國部分地區沿岸造成災害影響^[13]。自然資源部海嘯預警中心對上海、浙江舟山、台灣咾啥個地方發布海嘯黃色警報，表明海嘯波會得對當地產生0.3（含）~1米個海嘯^[14]。當天下半日，自然資源部海嘯預警中心解除針對上海、浙江沿海個海嘯警報。到夜快，海嘯預警儕解除脫。

台灣氣象署表示，蘭嶼有得12公分海嘯、宜蘭蘇澳觀測到9公分高海嘯、基本浪向沒超過10公分個，對台灣影響弗大^[15][16][17]。

美國

國家氣象局針對關島、美屬薩摩亞、夏威夷、阿拉斯加荷蘭港、舊金山灣區咾啥個太平洋沿岸發布相關個海嘯警告。^[18][19]

墨西哥

墨西哥政府警告表示，從下加利福尼亞州到恰帕斯州個太平洋沿岸有得海嘯，叫居民遠離海灘。^[20]

智利

智利沿海地區記錄到超過1.5米個海嘯。^[21]

大洋洲

新西蘭國家緊急事務管理局針對箇地震引發個海嘯發布警告，表示新西蘭全境會得出現「強勁海流搭仔預測弗出個巨浪」。^[22]湯加、斐濟、庫克群島咾啥個亦發布相關海嘯預警。^[23]來了法屬波利尼西亞，政府警告海嘯會得有2米2。^[24]

相關條目

• 1737年堪察加地震
• 1952年北庫里爾斯克地震
• 1959年堪察加半島地震（英語：1959 Severo-Kurilsk earthquake）
• 環太平洋火山帶